С.Зоригийн амийг хөнөөлгөсөн захиалагч, зохион байгуулагч нь Б.БУЛГАН УУ?

Zindaa.mn сайт "Дуулиан" булангийнхаа ээлжит дугаараар төр, нийгмийн нэрт зүтгэлтэн С.Зоригийн амь насыг хөнөөсөн хэргийн эргэн тойрны үйл явцаас хүргэж байна. Түүний хамтран амьдрагч байсан Б.Булганыг яллагдагчаар татсан нь нийгэмд дуулиан болоод байгаа юм. 

Төр, нийгмийн нэрт зүтгэлтэн, Дэд бүтцийн сайд агсан С.Зоригийн амь насыг хөнөөсөн хэрэгт Т.Чимгээ, Ц.Амгаланбаатар, Б.Содномдаржаа нарыг буруутган 23-24 жилийн хорих ял оноосон. Гэхдээ захиалагчийн хэргийг тусгаарласан. Захиалагчийг илрүүлэх Ажлын хэсгийг Тагнуулын Ерөнхий газрын Мөрдөн байцаах хэлтэс, Цагдаагийн Ерөнхий газрын Мөрдөн байцаах газрын Онц хүнд гэмт хэрэг мөрдөх хэлтсийн мөрдөн байцаагчдын бүрэлдэхүүнтэйгээр байгуулсан. Ажлын хэсгийн ажилд Нийслэлийн прокурорын газраас хяналт тавьжээ.

  Харин хяналт тавьсан Нийслэлийн Прокурорын газраас Б.Булганыг С.Зоригийг хөнөөсөн хэргийн захиалагч, зохион байгуулагчид буруутган эрүүгийн хэрэг үүсгэж, яллагдагчаар татсан тухайгаа мэдэгдлээ.

Б.Булган яллагдагчаар татагдсанаа яагаад нуусан бэ?

Энэ сарын 18-ны өдөр С.Зориг агсны хамтран амьдрагч байсан Б.Булган Тагнуулын ерөнхий газарт, өмгөөлөгчийн хамт ирсэн юм. С.Зоригийн амийг хөнөөсөн хэрэгтнүүдийг шийтгэснээс хойш нам жим байсан Б.Булган яагаад гэнэт олны өмнө гарч ирэв. Эл асуулт хариулт нэхсэн. Булган энэ тухайгаа хэвлэлийнхэнд юу ч хэлээгүй. Харин өмгөөлөгч Ц.Гүенбат нь “Мөрдөн байцаалтын нууцын баталгаан дээр гарын үсэг зурсан. Мэдүүлгээсээ буцсан зүйл байхгүй. Анхны өгсөн мэдүүлэг, аман зураг хэвээрээ байгаа” гэж л хэллээ. Өөр мэдээлэлгүй хоцорсон, сэтгүүлчид. Гэвч маргааш нь хэрэг явдал тодорхой болов. Б.Булган Тагнуулын ерөнхий газарт яллагдагчаар дуудагдсан байжээ. Харин өмгөөлөгч Ц.Гүенбат худлаа ярьсан байна.

Ямар зүйл ангиар яллагдагчаар татав  

Нийслэлийн Прокурорын  газраас  Б.Булганыг С.Зоригийн амь насыг хөнөөсөн хэргийн зохион байгуулагч, захиалагчийг илрүүлэх шалгалтын явцад гарч ирсэн шинэ нотлох баримтуудыг үндэслэн яллагдагчаар татсаныг мэдэгдлээ. НПГ-ын Хяналтын прокурор Г.Бясман "ТЕГ-ын мөрдөн шалгах хэлтсээс, ЦЕГ-ын мөрдөн байцаах албатай хамтарсан ажлын хэсгээс шалгаж байгаа УИХ-ын гишүүн, дэд бүтцийн сайд агсан С.Зориг  амь насыг хохироосон эрүүгийн .... дугаартай хэргийг зохион байгуулсан, захиалсан үйл явцыг шалгах үед   шинээр цугларсан нотлох баримтуудаар  С.Зоригийн хамтран амьдрагч Б.Булганд эрүүгийн хэрэг үүсгэх нөхцөл байдал үүссэн. Түүнд яллагдагчаар татсан тогтоолыг танилцуулж, байцаалт авсан. Мөрдөн шалгах ажиллагааг үргэлжлүүлж байна" гэлээ. Хамгийн ноцтой нь Б.Булганыг саатуулсан эсэхийг бас ямар зүйл ангиар эрүүгийн хэрэг үүсгэснийг хэлэх боломжгүй гэж нууцалсан. Хэргийн гол сэжиг энд байна. Нийслэлийн Прокурорын мэдэгдэлд “С.Зориг агсны амь насыг хөнөөсөн хэргийг зохион байгуулсан, захиалсан үйл явцыг шалгах үед....” гэсэн нь өөрийн эрхгүй анхаарал татаж байгаа юм.

Б.Батжаргал: Хэрэг гарахаас өмнө Булган нар Зоригийн гэрт байсан

Ажлын хэсгийнхэн С.Зоригийн амь насыг хөнөөлгөсөн захиалагч, зохион байгуулагчийг илрүүлэх ажлаа үндсэндээ мухарласан бололтой. Тиймээс Б.Булганыг яллагдагчаар татлаа.  Өөрөөр хэлбэл, захиалагч, зохион байгуулагч нь Б.Булган эсвэл тэднийг мэдэж байгаа цор ганц гэрч нь. Эцсийн шийдвэрийг шүүх дэнсэлнэ. 

  Б.Булганы талаар нэгэн сэжигтэй, ноцтой гэмээр зүйлийг Нийслэлийн прокурорын газрын Хэрэг бүртгэх, мөрдөн байцаах ажиллагаанд хяналт тавих Нэгдүгээр хэлтсийн хяналтын прокурор Б.Батжаргалтай  хэвлэлд өгсөн ярилцлагадаа дурдсан байдаг  юм. Тэрбээр, “Ц.Амгаланбаатарын мэдүүлэгт нэг сонин зүйл байдаг. Тэр мэдүүлэгт “Хэрэг гарсан өдөр, аллага үйлдэхээс өмнө Т.Чимгээ, Т.Содномдаржаа, Б.Отгонбаатар бид дөрөв С.Зоригийн гэрт очсон. Тэгэхэд хоол хийсэн байдалтай байсан. Тэр хоолноос бид дөрөв идсэн. Одоо санаж байгаагаар мах чанасан байсан. Хоол идсэний дараа Б.Отгонбаатар гарч яваад, Т.Чимгээ, Т.Содномдаржаа бид гурав Б.Булгантай хамт тамхилсан. Б.Булган тамхи татдаг хүн байсан. Бид нар тамхиныхаа үнсийг будаатай аяганд хийсэн” гэж мэдүүлсэн байдаг. Тухайн хэргийн газраас олдсон нотлох баримтууд дунд тамхины үнстэй будаатай аяга олдсон. Маш ноцтой гэмээр мэдээлэл.  Мөн “Захиалагчийг шалгах мөрдөн байцаалтын ажиллагааны явцад Б.Булган хэн ч болж болно” гэж байлаа. Ёстой л Б.Булганыг хэн болгох нь хуулийнхны асуудал болчихлоо.

Д.Дамдиндорж

www.zindaa.mn