АТГ-ын дарга, дэд даргад Г.Уянгын санал болгосон З.Энхболд, Г.Баасан нар боломжит хувилбар мөн үү?

АТГ-ын даргын бүрэн эрхийн хугацаа дуусаагүй ч...

Ерөнхийлөгч Х.Баттулга АТГ-ын дарга Х.Энхжаргал, дэд дарга Ц.Нямдорж нарын бүрэн эрхийн хугацаа дууссан гэж үзээд  албан ёсны цахим хуудсаараа дамжуулан олон нийтийн дунд долоо хоногийн хугацаанд  явуулах санал асуулгыг өчигдрөөс зарлачихлаа. Долоо хоногийн дараа АТГ-ын удирдлагуудад нэр дэвшигчид тодорхой болно. Санал асуулгад оролцох эргэн шалгуур хангасан гэж үзсэн хүнийхээ нэрийг  бичих аж. АТГ-ын дарга Х.Энхжаргалын бүрэн эрхийн хугацаа үнэхээр дууссан уу. Хуулийнхаа дагуу асуудал явж байна уу. 

Авлигын эсрэг хуулийн 21.5-д Авлигатай тэмцэх газрын дарга, дэд дарга нөхөн томилогдвол түүний бүрэн эрх нь томилогдсон өдрөөс эхлэн энэ хуулийн 21.1-д заасан бүрэн эрхийн хугацаа дуустал үргэлжилнэ гэж заажээ.  Эндээс харвал Х.Энхжаргалын бүрэн эрхийн хугацаа дуусаагүй байна. Тэр 2016 оны долдугаар сарын 6-ны өдөр АТГ-ын даргаар томилогдсон. Харин Ерөнхийлөгч АТГ-ын даргыг санал болгох бүрэн эрхтэй байдаг. Асуудалд энэ  өнцгөөс хандсан нь илт. Ерөнхийлөгчийн Тамгын газрын дарга З.Энхболдын хэлснээр Хуульчдын баг нь Х.Энхжаргалын бүрэн эрхийн хугацаа дууссан гэж үзжээ. З.Энхболд “Төрийн албаны зөвлөлийн хоёр гишүүн Хадхүү, Даваа-Очир нарыг нөхөн томилогдсон хугацаа дууссан  шалтгаанаар чөлөөлсөн. Хуульч О.Алтангэрэл Үндсэн хуулийн Цэцэд хандахад хууль зөрчөөгүй” гэсэн. АТГ-ын даргыг ийм нөхцөл байдалтай адилтган бүрэн эрх нь дууссан гэж үзэж байгаа” гэв.Нэгэнт галт тэрэг хөдөлсөн учраас санал асуулгатай зэрэгцэн авлигатай тэмцэх байгууллагын дараагийн даргын эрэлд хүссэн ч эс хүссэн ч мордоно.  АТГ-ын даргад тодорхой шалгуур тавигдана. Хэн дуртай нь хийх ажил биш.  Авлигын эсрэг хуулийн 21.2.1 21.2.1-д Авлигатай тэмцэх газрын даргад нэр дэвшигч нь төрийн албанд 15-аас доошгүй жил ажилласан, 45 нас хүрсэн, эрх зүйч мэргэжилтэй, удирдах болон мэргэжлийн ажлын мэдлэг туршлагатай, сүүлийн 5 жил улс төрийн албан тушаал эрхэлж байгаагүй.  21.2.2.Авлигатай тэмцэх газрын дэд даргад нэр дэвшигч нь төрийн албанд 10-аас доошгүй жил ажилласан, эрх зүйч мэргэжилтэй, гүйцэтгэх болон мөрдөн байцаах ажлын мэдлэг туршлагатай, сүүлийн 5 жил улс төрийн албан тушаал эрхэлж байгаагүй гэж заажээ.

Г.Баасан шалгуурт тэнцэхгүй

АТГ-ын дарга болно гэж хамгийн их хөөрцөглөж догдолсон, хүлээсэн хүн бол АТГ-ын дэргэдэх Олон нийтийн зөвлөлийн дарга Г.Баасан. “Надад санал ирвэл АТГ-ын дарга болно. Би шалгуурт тэнцэж байгаа. Миний аз жаргалтай амьдралын эхлэл” гэж сэтгэлийн хөдөлгөөнөө дарж ядан ярилцлага өгсөн түүнийг шалгуурт тэнцэхгүй байгааг санал асуулга зарласан Ерөнхийлөгчийн Тамгын газрын дарга З.Энхболд хэлчихлээ.

Г.Баасангийн хувьд дэд даргад  ч тэнцэхгүй аж. Гудамжны тэмцэгч явснаас төрийн албанд ажиллаж үзээгүй нэгэн. Н.Алтанхуягийг Ерөнхий сайд байхад зөвлөх хийснийг нь эс тооцвол. АТГ-ын дарга түүний хувьд мөрөөдөл болон үлдэж байна. Цахим орчинд Г.Баасанг АТГ-ын дарга болгох ёстой гэж бичсэн хүмүүсийн ярианд хэт итгэсэн нэгэн.

Д.Дорлигжав татгалзсан

Ерөнхийлөгч Х.Баттулгын МоАХ-нд албан ёсоор багтдаг түүний түлхээсээр Хууль зүйн сайд  болтлоо дэвшсэн нэгэн. АТГ-ын дарга солигдох таамаг гарахтай зэрэгцэн тус газрыг толгойлж болох эрхмүүдийн нэгээр түүнийг нэрлэсэн.

Харин өөрөө “Би АТГ-ын дарга болохгүй” гэсэн байр сууриа илэрхийллээ. Илэрхийлээд зогсохгүй одоогийн дарга Х.Энхжаргалын бүрэн эрхийн хугацаа дуусаагүй. 2016 оны долдугаар сарын 6-нд томилогдсон гэдгийг хэлсэн юм. Уг нь,Ерөнхий прокурор, “Эрдэнэт” үйлдвэрийн ерөнхий захирал зэрэг өндөр албан тушаал хашсан нэгэн.

  Б.Билэгт яах вэ? 

Ард түмнээсээ санал асууж байгаа. Нэртэй боловч хэрхэн оролцсоныг олон нийтэд яаж тайлагнах нь Ерөнхийлөгч түүний Ажлын албаны мэдэлд буй. Хэрэв олон нийтээс АТГ-ын даргад Б.Билэгтийг санал болгосон тохиолдолд яах вэ. Тэр хууль хүчний байгууллагыг толгойлсон туршлагатай.

Мөн л Х.Баттулгын МоАХ-ны угшилтай. Цагдаагийн ерөнхий газрын дарга, Шүүхийн шийдвэр гүйцэтгэх Ерөнхий газрын дарга,Тагнуулын ерөнхий газрын даргаар ажиллаж байсан. Хүчний байгууллагад өндөр албан тушаал хаших одтой нэгэн. Цагдаагийн ерөнхий газрын дарга байхдаа Хууль зүйн сайдаар ажиллаж байсан Х.Тэмүүжинтэйгээ “дайн” зарласан удаатай. Сайд дээрээ гүйцэтгэх ажиллагаа явуулсан гэж хардагдсан. Эцэстээ түүнийг огцруулсан. Салбарынхаа сайд дээр гүйцэтгэх ажиллагаа явуулсан дарга АТГ-ын толгойлсон тохиолдолд яаж ажиллах бол.

 Эцэст нь, З.Энхболд  зөв сонголт уу?

“Хатуу самар” гэгддэг З.Энхболдыг санал болгосон тохиолдолд Ерөнхийлөгч дэмжээд УИХ-д хэлэлцүүлэхээр оруулах нь ямар ч саадгүй. Харин УИХ дээр хүлээж авах уу. Түүнийг зуумтгай л гэлцдэг. УИХ-ын дарга хийж байхдаа гишүүддээ ширүүлдэг байдал нь олны дургүйцлийг хүргэсэн. “Надад таалагдахгүй байна” гээд микрофоныг нь хаана.“Хэлийг чинь ойлгохгүй байна” гэх зэргээр гишүүдээрээ даажигнаж асан энэ хүн АТГ-ын дарга болсон тохиолдолд асуудалд улс төрийн өнцгөөс хандаад  эхэлбэл аюултай. 

 Уул уурхай салбарыг атгасан, олигарх 30 гэр бүлийнхээ эрэлд гарах уу. 200 гэр бүл болгох уу гээд түүнд асуудал их. АТГ-ын дарга болсон тохиолдолд дургүйгээ хүргэсэн хүмүүсийг олигарх гэр бүлийн тоонд оруулж 2000-д  ч хүргэж мэднэ гэж зарим улс төрч болгоомжилж байгаа болов уу. Ерөнхийлөгч олон нийтийн санал асуулгаар АТГ-ын дарга, дэд даргад нэр дэвшигчийг тодруулж санал болгоно гэж З.Энхболдыг мэдэгдсэнтэй бараг зэрэгцэн бусад байгууллагын дарга  нарыг ч олон нийтээс асуудаг болох уу гэсэн асуулт, шүүмжлэл дагалдаж байна. Тэр өөрөө ямар нэгэн байр суурь илэрхийлээгүй бөгөөд АТГ-ын даргад Б.Билэгтийг дэмжиж зүтгүүлж байгаа гэсэн мэдээлэл гарсан. Ерөнхийлөгчийн зөвлөх Г.Уянга АТГ-ын даргад З.Энхболдыг, дэд даргад Г.Баасангийн нэрийг санал болгосноос харахад Ерөнхийлөгчийн тойрон хүрээлэгчдээс АТГ-ын дарга тодрох нь тодорхой байна.

А.Эрдэнэ

www.zindaa.mn