Шүүх, хүчний байгууллагын үүрэг гүйцэтгэх болсон Ардчилсан нам

Цагдаа, шүүх, прокурор, АТГ-ын ажлыг өмнөөс нь хийх болсон Ардчилсан намын бүлэг хуралдаад Сангийн сайд Ч.Хүрэлбаатар, Хууль зүй дотоод хэргийн сайд Ц.Нямдорж нарыг огцруулах асуудлаар Ерөнхий сайдад шаардлага хүргүүлснээ мэдэгдэв. Ингэхдээ дээрх эрх бүхий дөрвөн байгууллага байсаар байтал АН-ынхан Төрийн ордонд нэр бүхий нөхдөд “ял” тулгаад авав. Чухам АН-аас хэн нь мөрдөн гүйцэтгэх ажиллагаа явуулаад, хэн нь шүүхийн өмнөөс тогтоол гаргаж, хэн нь прокурорын өмнөөс яллах дүгнэлт үйлдсэн юм бүү мэд. Ямартай ч Засгийн газрын хоёр сайдыг доорх үндэслэлээр “яллах”-аа мэдэгдэж эрх бүхий байгууллагаас толгой дээгүүр загнав. Уг нь хуулинд харш баймаар юм.

Тодотговол, тэд Сангийн сайд Ч.Хүрэлбаатарыг “Ах нар нь Хотгор шанагын уурхайн лицензийг зарсантай холбоотойгоор АТГ–аас шалгаж байна. Мөн төсвийн тухай хуулийг зөрчиж, тодотгол хийхгүй яваа нь огцрох үндэслэл” гэсэн юм. Гэтэл Ч.Хүрэлбаатар сайд өөрөө хүсэлт гаргаад АТГ-т шалгуулж, бусад холбогдох байгууллагаас ямар ч буруугүй гэдгийг тогтоосон атал АН-ынхан АТГ, шүүх, цагдаагийн байгууллагын өмнөөс ажлыг нь хийж, хийхдээ холбогдох байгууллагаас ч дээгүүр мэдэгдлийг Төрийн ордонд тунхаглаад авлаа.

Нөгөө талаас Хууль зүй, дотоод хэргийн сайд Ц.Нямдоржийн хувьд амьдарч буй түрээсийн байр нь Эрдэнэтийн 51 хувьтай холбоотой Ш.Батхүү, Төрийн банкнаас гаргасан Г.Алтангийн зээлтэй хамааралтай учраас огцрох хангалттай шалтгаан гэж үзжээ. Харин энэ хэрэг явдал нь олон жилийн өмнөөс эхтэй бөгөөд Ш.Батхүү гэгч нөхөр хийсэн хэрэгтээ тодорхой ял эдэлж байсан түүх нь бий. Одоо ч шалгагдаад явж байна. Энэ хэргийг мөрдөж эзэн холбогдогч тогтоосон байгууллага нь Цагдаагийн газар, хэргийг хэлэлцэж тохирох хариуцлага тооцсон газар нь Монгол Улсын шүүх, хэрэгт хяналт тавьж дүгнэлт үйлдсэн байгууллага нь Прокурор байж таарна. Гэтэл дээрх эрх бүхий байгууллагаас өнөөдрийг хүртэл Ц.Нямдоржийг гэм буруутай гэж тооцсон нь үгүй атал аанай л АН-ынхан ийнхүү “яллах дүгнэлт” үйлдэснээ мэдэгдээд байна.

АН-ын бүлгийн энэ мэт бусдыг гүтгэсэн, шүүх эрх мэдлийн байгууллагын өмнүүр орж мэдэгдэл хийж байгаа явдал нь хэрээс хэтэрсэн улстөржилт гэж дүгнэхээс өөр аргагүй. Тэдний хувьд Засгийн газраас хоёр сайдыг нь эргүүлэн татах замаар Засгийн газрын байр суурийг ганхуулах, улс орныг бужигнуулах санаархал нуугдаж байгаа нь илт. Эдийн засгийг сэргээх, тодорхой зорилгын хүрээнд байгуулагдсан У.Хүрэлсүхийн Засгийн газар богино хугацаанд төлөвлөгөөгөө зурж их ажлынхаа гараанаас нэгэнт гарчихсан энэ цагт Засгийн газрын сайдуудын талаар худал хуурмаг мэдээлэл цацаж ард түмнийг төөрөлдүүлэх оролдлого хийж суугаад олон хүн харамсаж буй. Нөгөө талаар шударга үнэний дуу хоолой болж явдаг, тэр тусмаа АН-ын бүлэгт ихээхэн халтай зүйлийг илчилж гаргадаг Ц.Нямдоржийг онилсон нь ч санаандгүй хэрэг биш биз ээ.

Тэд засаглаж байхдаа өөрийн болгох гэсэн “Эрдэнэт” үйлдвэр, Дубайн гэрээ болон С.Зориг агсантай холбоотой хэргийн тухайд гээд тэдэнд харшлах зүйлийг Ц.Нямдорж ярьдаг, шалгахыг шаарддаг учраас энэхүү дайралт ирсэн гэхэд болно.

Олон учир шалтгааны улмаас АН-ынхан шүүх эрх мэдлийн өмнүүр орж худал хуурмаг мэдээлэл тарааж байгаад холбогдох байгууллага ч анхаарна биз ээ.

С.Ууганбаяр

www.zindaa.mn