С.Зоригийн амийг хөнөөсөн хэргийн захиалагчаар сэжиглэгдсэн Б.Булганы тухай ХЭН, ЮУ ХЭЛЭВ

Zindaa.mn сайт Дуулиан булангийнхаа ээлжит дугаар төр, нийгмийн зүтгэлтэн С.Зоригийн хэргийн эргэн тойрноос онцлон хүргэж байна. Ямар нэгэн дүгнэлт хийдэггүй, бодит байдлыг хүргэдэг онцлогтой булан юм.  Б.Булганы тухай гэр бүлийнхэн, хууль, хяналтынхан, хэрэгт холбогдогч зарим хэрэгтэй ар гэрийнхэн юу хэлснийг тоймлон хүргэж байна.

С.Зоригийн амь насыг хөнөөсөн хэрэгт сэжиглэгдэж байгаа Т.Чимгээд 24 жил Б.Содномдаржаа, Ц.Амгаланбаатар нарт 25 жилийн хорих ял оноосон юм. Тэд  23 жилийг нь гянданд, үлдсэн нэг, хоёр жилийг нь онцгой дэглэмтэй хорих ангид эдлэх юм. Төр нийгмийн нэр зүтгэлтэн С.Зоригийг одоогоос 18 жилийн өмнө буюу 1998 оны аравдугаар сарын 2-нд онц хэрцгийгээр хөнөөсөн юм. Гэвч хэрэг гарснаас хойш нэр бүхий хүмүүсийг эл хэрэгт сэжигтнээр татан, шалгаж байсан ч өнөөг хүртэл гэмт этгээдийг илрүүлээгүй. Захиалагчтай хэрэг гэдэг нь тодорхой болсон учраас Ажлын хэсэг байгуулсан.

Хамгийн сүүлд түүнийг Зоригийн амь насыг хөнөөх захиалга өгсөн, хамтран оролцогч гэж буруутган Тагнуулын ерөнхий газраас байцаалт авсан. Г.Эрдэнэбат: Булган захиалагчтай хэргийн холбогдогч. Бид захиалагчийг илрүүлэхээр ажиллаж байна” гэж "Цензургүй яриа" нэвтрүүлэгт оролцохдоо хэлсэн юм.

Б.Булганыг эрүүдэн шүүсэн, шүүгээгүй

 С.Зориг агсны хамтран амьдрагч Б.Булганыг  хэргийн гүйцэтгэгч нарыг илрүүлж байгаатай холбогдуулан хууль, хяналтынхан цагдан хорьсон. Энэ үеэр түүнийг эрүүдэн шүүж байна гэсэн хардлага, яриа гарч байлаа. Б.Булганы ээж Д..Байгальмаа “Ар гэр, өмгөөлөгчийг нь уулзуулдаггүй, эргэлт оруулдаггүй.

Хувцсыг нь хоёрхон удаа сольсон. 24 цагийн гэрэлтэй нөхцөлд байлгадаг” гэж хэвлэлийнхэнд хандсан. ХЭҮК-ын дарга “Ирсэн гомдлын дагуу ажиллалаа. Мөрдөн шалгах явцад эрүү шүүлтийн элемент байсныг үгүйсгэхгүй. Гэхдээ хэвлэлээр гарсан шиг айхавтар юм байхгүй” гэснээс түүнийг эрүүдэн шүүсэн, шүүгээгүй  гэх маргаан гараад байлаа.

  Г.Бясман: Булганыг яллагдагчаар татсан зүйл ангийг хэлэх боломжгүй

(Нийслэлийн прокурорын газрын олон нийттэй харилцах ажил хариуцсан хяналтын прокурор)

 -"ТЕГ-ын мөрдөн шалгах хэлтсээс, ЦЕГ-ын мөрдөн байцаах албатай хамтарсан ажлын хэсгээс шалгаж байгаа УИХ-ын гишүүн, дэд бүтцийн хөгжлийн сайдын үүрэг гүйцэтгэгч асан С.Зоригийн амь насыг хохироосон эрүүгийн дугаартай хэргийг шалгах ажиллагааны явцад С.Зоригийн хамтран амьдрагч Б.Булганд дөрөвдүгээр сарын 18-нд эрүүгийн хэрэг үүсгэж, яллагдагчаар татсан тогтоолыг танилцуулж, байцаалт авсан. Одоогоор энэхүү хэрэгт мөрдөн шалгах ажиллагааг үргэлжлүүлэн явуулж байна. Тиймээс дэлгэрэнгүй мэдээлэл өгөх боломжгүй”. Түүнийг Эрүүгийн хуулийн яг ямар зүйл ангиар хэрэгт татсаныг хэлээгүй юм.

Б.Батжаргал: Мөрдөн байцаалтын явцад Булган хэн ч болж болно

(Нийслэлийн прокурорын газрын Хэрэг  бүртгэх мөрдөн байцаах ажиллагаанд хяналт тавих нэгдүгээр хэлтсийн хяналтын прокурор)

 Захиалагчийг шалгах мөрдөн байцаалтын ажиллагааны явцад Б.Булган хэн ч болж болно  үүнээс гадна Ц.Амгаланбаатарын мэдүүлэгт нэг сонин зүйл байдаг. Тэр мэдүүлэгт ‘Хэрэг гарсан өдөр; аллага үйлдэхээс өмнө Т.Чимгээ, Т.Содномдаржаа, Б.Отгонбаатар бид дөрөв С.Зоригийн гэрт очсон.Тэгэхэд хоол хийсэн байдалтай байсан. Тэр хоолноос бид дөрөв идсэн. Одоо санаж байгаагаар мах чанасан байсан. Хоол идсэний дараа Б.Отгонбаатар гарч яваад: Т.Чимгээ, Т.Содномдаржаа бид гурав Б.Булгантай хамт тамхилсан. Б.Булган тамхи татдаг хүн байсан. Бид нар тамхиныхаа үнсийг будаатай аяганд хийсэн” гэж мэдүүлсэн байдаг. Тухайн хэргийн газраас олдсон нотлох баримтууд дунд тамхины үнстэй будаатай аяга олдсон гэдэг.

Г.Эрдэнэбат: Булганыг хамжигчаар шалгаад хөөн хэлэлцэх хугацаа дуусч хэрэгсэхгүй болгож байсан

(Г.Эрдэнэбат: Улсын ерөнхий прокурорын орлогч С.Зоригийг хөнөөсөн хэргийг илрүүлэх Ажлын  хэсгийн ахлагч)

-С.Зориг агсны хамтран амьдрагч асан Булганыг одоо  яллагдагчаар татсан. Анх гэрч, хамжигчаар тооцон шалгаад, хөөн хэлэлцэх хуулийн хугацаа  2015 онд дууссан учраас хэргийг хэрэгсэхгүй болгосон. Одоо Б.Булганыг  Зоригийг хөнөөсөн хэрэгт захиалга өгсөн, хамтран зохион байгуулсан гэж сэжиглэн шалгаж байгаа. Энэ хэргийг шалгаж дуусаагүй байна.Тодорхой хэсгийг эцэслэн шалгаж дуусахаар юу болох нь вэ гэдэг нь чухал. Зарим хүн энэ хэрэгт ямар оролцоотой байсан бэ гэдэг нь хэргийг шалгах ажиллагаа дуусахаар эцэслэн шийдэгдэх байх.

Ц.Марууш: Булган миний охиныг энэ хэрэгт хамаагүй гээд хэлээсэй

(Ялтан  Т.Чимгээгийн ээж)

“Булган алуурчдыг харсан цор ганц гэрч. Тэр хүн энэ хэргийг миний охиныг хийгээгүй. Биш ээ гээд хэлээд өгөөсэй. Булганаас эгч нь ингэж л хүсч байна. Би охинтойгоо уулзахаас үнэхээр халширч байгаа. Ээжээ, би энэ хэргийг хийгээгүй шүү дээ гээд уйлаад байдаг юм.

Л.Жавзмаа: Булган миний хүүг алуурчин биш гэсэн байсан 

(Б.Содномдаржаагийн ээж)

-Би Булганыг танихгүй, мэдэхгүй. Түүнтэй уулзаж байгаагүй. Ямар ч гэсэн тэр миний хүүг алуурчин биш л гэж хэлсэн юм билээ. Би ингэж сонссон. 

Д.Дамдиндорж

www.zindaa.mn