Хошуу цорвойсон Н.Номтойбаяр нар

Их ялалтын уухай хадаасан улстөрийн ууган хүчин 2016 онд Засгийн газраа эмхлэн байгуулахдаа хэдэн залуусыг танхимдаа багтаасан. Тухайн үед МАН залуусаа дэмжиж байна, тэднийг Төрийн албанд туршлагжуулах гэж байна гэх зэргээр шуугиан дэгдээж байв. Төрийн алба, сайдын сэнтий гэдэг бол “туршлага суух” гэж хашдаг алба биш гэдгийг тэд нэгдүгээрт ойлгоогүй. Хоёрдугаарт, тухайн сонгуульд олон шинэ тутам залуус орж ирсэн учраас залуусынхаа хэл амыг дарах гэсэн арга нь тэднийг танхимд багтаасан байх. Гуравдугаарт, өнөөх алдарт “60 тэрбум”-ын хэлтэрхий ч байсан байхыг үгүйсгэхгүй. Тухайн үед Г.Доржзодовын буянаар агентлаг, газар, хэлтсийн дарга нараас эхлээд сайдын сэнтийг хүртэл мөнгөөр үнэлсэн бичлэг нь нийгэмд тархасан биз дээ.  

Эдгээр залуусын дунд сайдын алба залгуулах бүү хэл сум удирдсан ч туршлага байгаагүй гэдгийг монголчууд бид бүгд мэднэ. Тэдний хувьд нийслэлээ болъё гэхэд дүүрэг, аймгийн Иргэдийн хуралд ч ажиллаж үзээгүй ийм цагаанаас цагаан гартнууд байсан нь Ж.Эрдэнэбатын Засгийн газрыг ганхахад хүргэсэн байж таарна. Төрийн алба, тэр тусмаа сайдын алба гэдэг бол “үхэхээс бусдыг үзэж үйл тамаа цайсан” нэгэн л хаших ёстой алба шүү дээ. Гэтэл "амных нь салиа арилаагүй" хүүхдүүдийг аваачаад тавьж байдаг нь ёстой л том тэнэглэл болсон.

Гэтэл Ж.Эрдэнэбатын Засгийн газар ямар ч туршлагагүй хэдэн залуусыг багтаа авсан нь жинхэнэ утгаараа гай удсан. Өдгөө ч энэ туршлагагүй нөхдийн балаг, үлдэгдэл нь Төрд Дэд сайд нэртэйгээр оршсоор байна. Гэтэл гэнэт өндөр авсан залуус маань нэг л өдөр албаа өгөх болсонд ихэд эгдүүцсэн. “Хааны алба халаатай, эзний алба ээлжтэй” гэдгийг тэд яаж ухаж ойлгох вэ дээ. Төрийн бага дунд аль ч шатанд алба залгуулж үзээгүй амьтад хойно буруутгах ямар ч аргагүй. Тийм учраас сайдын суудлыг мөнхийн юм шиг санаж явсан залуус маань өнөөдөр ч уур цухалдаа багтарч ядан яваа бололтой.

Тухайлбал, Нийгмийн хамгаалал, хөдөлмөрийн сайдаар ажиллаж байсан Н.Номтойбаяр хэвлэлд байр сууриа илэрхийлэхдээ “Би У.Хүрэлсүхийн Засгийн газрыг огцруулах санал хураавал саналаа өгнө. Кноп дарахад бэлэн” гэдгээ мэдэгдэснээс харвал өнөөх л бухимдал нэвт ханхлана. Яахав, залуу гишүүний хувиар болох болохгүй зүйлийг шүүмжилсэн нь сайн хэрэг боловч ирээдүйн ялалтаа сүйтгэж байгаагаа тэр ухаарсангүй. Өнөөдөр МАН тогоон дотроо эсрэг тэсрэг байр суурьтай байгаад байвал айсуй 2020 онд ялалт авчирахад ихээхэн хүндрэл тулгарна. Аливаа улстөрийн хүчний эрхэм зорилго бол ялалт мөн биз дээ.

Тэр тусмаа бухимдлаа тайлж чадахгүй яваа залуусыг ард түмэн унагаж байж санаагаа амраана. Ард түмэн чинь аливаа зүйлийг ухаж тунгаадаг юм шүү дээ. Нөгөө талаар МАН хэдэн гишүүнтэй билээ, хэдэн дэмжигчид байгаа билээ. Олны дүгнэж байгаагаар бол МАН-д ахмад гишүүд олон бий гэдэг, мөн дэмжигчдийн дийлэнх хэсэг нь ч ахмадууд гэдэг. Тэгэхээр энэ ахмадууд юунд дургүй байдаг вэ гэхээр тогоо руугаа нулимж байгаа хүмүүст яснаасаа дургүй байдаг юм. Тэдэнд ямар ч эрх ашиг хэрэггүй, зөвхөн үзэл бодлоо дагадаг юм. Ингэж төлөвшсөн байдаг юм. Тиймээс хошуу цорвойж байгаа залуус өнөөдрөөс болгоомжлох хэрэгтэйг сануулах нь юу юунаас чухал болоод байна. Аав ээж, амраг садандаа туньж байгаа юм шиг Төрийн албыг хошуу цорвойж авдаггүй, бас өгдөггүй юм. Эцэст нь хэлэхэд МАН-ын энэ мэт залуус МАН-д балаг болно. Өөрсдөө тэртээ тэргүй унаж таарах ч балаг л болно.

Н.Баатар

www.zindaa.mn