Х.Баттулгын айдас Н.Энхбаярыг үгүй хийх нь

Гуравдагчдын орон зайд үйлээ үзэж буй МАХН-ын дүрмийн шинэчлэлийг Улсын Дээд шүүхээс бас л хүлээн авсангүй. Ямар дүрэм зохиосон болоод Дээд шүүхийн таалалд нийцэхгүй байгааг мэдэх юм алга, ямартай ч “Хүн ална, хүрээ тална” гэсэн заалт ороогүй нь лавтай. Эндээс харвал Н.Энхбаярыг хавчсан, түүнээс айсан хэвээр байгааг эндээс харж болно. Үнэндээ Н.Энхбаяр МАХН-тай байхад МАН ч айна, АН ч айна, Ерөнхийлөгч ч айна. Тиймээс МАХН-ын дүрмийн шинэчлэлийг Улсын Дээд шүүхэд бүртгэхгүй байх сонирхол аль аль талд нь бий. Хуучин дүрмийн дагуу гишүүдийг нь турхирч байгаад Н.Энхбаяраас МАХН-ын салгаж авах сонирхол нэлээд эртнээс эхтэй бөгөөд үүнийх нь золиос нь О.Баасанхүү юм. Түүнд МАХН-ыг дунд нь талцуулж Бага чуулган, Их хурлыг хийх зориг байлаа ч хөрөнгө байхгүй гэдгийг бүгдээрээ мэднэ. Тэгэхээр хэн нэгэн түүнийг хатгаж байна гэсэн үг. Тиймдээ ч Н.Энхбаяр яаран дааран МАХН-ын Бага чуулганыг энэ сарын 27-ны өдөр хуралдуулахаар зэхжээ.    

Тэгэхээр О.Баасанхүүгийн зохион байгуулсан МАХН-ын Их хурлаас авч үзье. Түүний хувьд гишүүд дэмжигчдийн зардал чирэгдлийг дааж, өндөр үнэтэй зочид буудалд байрлуулан намын Их хурал зохион байгуулна гэдэг хэн нэгний дэмжлэггүйгээр хийчих ажил биш аж. Энэ нь эдийн засгийн чадавхийн хувьд шүү дээ. Зөвхөн Баянгол зочид буудлын зардалд ямар хэмжээний мөнгө зарцуулах билээ. Үүний цаана ямар нэгэн хөшүүрэг бий хэмээн тухайн үед хэвлэлүүд онцолж байв. Үнэн хэрэгтээ хагас тэрбумын өртөг давсан хөрөнгө гаргаад хурал хийчих хүн мөн үү гэвэл эргэлзээ төрөхөөс өөр аргагүй.

О.Баасанхүү нь Их Тэнгэрийн аманд Бага чуулганыг зохион байгуулж, хурлын зочид төлөөлөгчдийг бялууртал дайлсан, Их хурлыг Төрийн ордонд зохион байгуулж, зочид төлөөлөгчдийг Ерөнхийлөгч Х.Баттулгын Баянгол зочид буудалд тансаглуулсан зэргээс бүх зүйл тодорхой харагдана. Нөгөө талаар Н.Энхбаярыг бурхан хэмээн шүтдэг гишүүд дэмжигчдийг уруу татахад юу нөлөөлөх вэ. О.Баасанхүүгийн УИХ-ын гишүүн гэх хоосон сэтэр тэдэнд огт нөлөөлөхгүй. Гагцхүү мөнгө мөнгө мөнгө !!! шүү дээ.

Тэгэхээр МАХН-ын гишүүд дэмжигчдийн толгойг эргүүлэхэд хурал зохион байгуулахаас арав, хорь дахин их мөнгө орно гэж төсөөлөөд үз. О.Баасанхүү битгий хэл Н.Энхбаяр өөрөө цаашаа болно гэхээр О.Баасанхүүгийн ар талд эрх мэдэл, асар их мөнгө байна даа. Үүнийг мэдэрсэн Н.Энхбаяр хориг арга хэмжээ авч, МАХН-ын Бага чуулганыг яаравчлан хуралдуулахаар шийдсэн бөгөөд Их хурлын ч тов гарч таарна.

Айдас хүйдэс дүүрэн Ерөнхийлөгчийн сонгуульд өрсөлдсөн Х.Баттулгад айсуй 2021 он л бодогдож суугаа гэдэгт эргэлзэх ямар ч хэрэггүй. Түүнд өнөөдөртөө Н.Энхбаяраас өөр айх хүн алга. Өнөөдөртөө шүү. Тэгэхээр Ерөнхийлөгчийн суудалд заларч байгаа хүн ганц хүчтэй өрсөлдөгчдөө найр тавина гэдэг аль ч төрийн үед, аль ч цаг хугацаанд байсангүй. Н.Энхбаярын өөрийнх нь гашуун туршлага ч халуунаараа байна.

Нөгөө талаас нийгэмд МАН, АН хэмээх хоёр их айлаас уйдах хандлага нэгэнт бий болсныг нуух хэрэггүй. Энэ хэрээр гуравдагчдын орон зайд тодорсон аль ч намыг сонгоход бэлэн болж, нийгэм өөрөө эрэлхийлэлд нэгэнт морджээ. Ийм хандлагыг анзаарсан олигархиуд гуравдагч этгээдийн орон зайд тодорч болохуйц МАХН-ыг үгүй хийх бодлого эхнээсээ хэрэгжиж байна гэх судлаачид цөөнгүй бий.

Олигархиудын зүгээс Н.Энхбаярт хандаж буй хандлагыг Ерөнхийлөгч маань уухайлан дэмжихээр Н.Энхбаяр л хөөрхий болно.

Мөн О.Баасанхүүгийн хувьд өөрөө УИХ-ын гишүүн, түүнийг араас нь уухайлах МАН, АН, Ерөнхийлөгч байна гээд давуу тал олон байна. Тэгэхээр Н.Энхбаярт ямар шаанс байна вэ. Тийм гээд хэлчих зүйл одоогоор алга. Гагцхүү Гавьяат хуульч Ц.Шаравдорж шүүх прокуророос эхлээд Үндсэн хуулийн цэц хүртэл Н.Энхбаярыг тамгатай нь үлдээх тал дээр сэтгэл чилээн явахаас үл хэтэрнэ.  Н.Энхбаярт үүнээс өөр гэрэл гэгээ огт алга.

Олонхийн таамаглаж байгаа шиг олигархийн далд захиалгаар МАХН-ыг сарниах гэж байгаа бол Н.Энхбаярт ямар ч хуулийн заалт байгаад үйлчлэхгүй. Буруу байсан ч эсрэг талд шийдвэр гарна.

Гуравдагчдыг удаа дараа “намнаж” байсан туршлага манай олигархиудад бий. Намуудын жагсаалтад гуравт эрэмбэ эдэлдэг Ногоон намын хувь заяаг мөн ч олон тийш залж саармагжуулсан даа. “Иргэний Зориг Ногоон Нам”, “Иргэний Зориг нам”, “Ногоон Нам” гэх мэтээр хувираад байсан нь хэдэн уйдамтгай гишүүдийн үйлдэл огт биш юм. Олигархиудын хавчиж боосон үйлдлийн дагуу л хувирч байсан акц болов уу. Хамгийн сүүлд гэхэд Г.Уянга нарын ТТЭНН-ыг, С.Ганбаатар нарын ХҮН-ыг гээд юу ч биш болгосон. Дарга нарыг нь ч хэн ч биш болгосон. Г.Уянга Ерөнхийлөгч Х.Баттулгад дагаар орж, С.Ганбаатар Н.Энхбаярт дагаар орчихсон байх жишээтэй. Гуравдагчдын хувь заяа олигархиуд байсан цагт хэзээ ч сайнаар төгсөхгүй.

Н.Баатар

www.zindaa.mn