”Херо” Б.Баатар Ж.Ариунжаргалын шинэ уран бүтээлд клип хийж өгнө

Монголын дуу хоолойг дэлхийд гаргах зорилготой “The Voice of Mongolia” шоу өчигдөр шилдгүүдээ тодрууллаа. Хагас шигшээгээс ялагчийн төлөө дөрвөн шүүгчийн багаас тус бүр нэг оролцогч тунаж үлдсэн. Шүүгч Д.Отгонбаярын багаас  А.Болормаа, С.Ононбатын багаас Б.Өсөхбаяр, Төрийн соёрхолт Л.Болдын багаас Ж.Ариунжаргал, дуучин Д.Уламбаярын багаас Ц.Энгүүн нар шалгарсан юм. Ингээд шоуны ялагчаар шүүгч Укагийн оролцогч Ц.Энгүүн тодорсон. 

Харин шилдэг оролцогч Ж.Ариунжаргалд үзэгчид ихээхэн итгэл хүлээлгэж байсан боловч харамсалтай нь шилдэг хоёрт багтаж шүүгчийнхээ зохиож өгсөн дууг дуулах боломжгүй болсон билээ. Энэ талаар Ж.Ариунжаргал өөрийн цахим хуудаснаа “Намайг дэмжсэн бүх хүмүүстээ маш их баярлалаа. Тайзан дээр эмоциосоо болоод ерөөсөө үг хэлж чадсангүй. Дуулсныхаа дараа фэйсбүүк, инстаграм хуудсаа шалгасан, олон хүмүүс намайг магтаж амжилт хүссэн байна. Бүх хүмүүстээ маш их баярлалаа. Би энэ хүртэл явсандаа харамсахгүй ч нэг л зүйлд харамсаж байна. Тэр нь юу вэ гэхээр  сүүлийн шатанд  сонгогдсон хоёр оролцогч шүүгчийнхээ зохиож өгсөн дууг дуулах эрхтэй  байсан. Миний  дуулах байсан дуу Д.Болд ахын зохиож өгсөн үнэхээр гоёмсог, хэний ч санаанд оромгүй маш гоё дуу байсан. Би түүнийг дуулахыг үнэхээр их хүссэн. Гэхдээ мэдээж юм санаснаар болдоггүй, би та бүхэнд тэр дуугаа хүргээгүй дээ л хамгийн их харамсаж байна” хэмээн бичжээ. 

Тэрбээр тун удахгүй шинэхэн уран бүтээлээр үзэгчидтэйгээ уулзах гэнэ. Харин шинэ уран бүтээлийг нь “Hero” студийн захирал Б.Баатар "гоё" клипп хийж өгөхөө амлалаа. Тэрээр ийм нэгэн пост оруулжээ.  "Энэ охинд урлагийн хүнд байх нэг тийм сүнслэг мэдрэмж байна! шинэ дуунд нь гоё клип хийж өгнө !! Неro entertainment. Авьяасыг уралдуулдаггүй юм" гэжээ

А.Түвшин