Н.Энхбаяр, С.Эрдэнэ хоёрын үерхэл

АН-ын дарга С.Эрдэнэ үзэл баримтлал, өш хонзонгоо умартан МАХН-ын дарга Н.Энхбаярт тал засахыг бодоход ихээхэн зүдэрчээ гэж бодож болох. Намаасаа тойрохоо зуруулаад байгаа О.Баасанхүүг эс тооцвол УИХ-д суудалгүй МАХН-д тал засч байгаагийн цаана зөвхөн өнөөдөр орон нутагт явагдах нөхөн сонгууль бус айсуй 2020 оны сонгуулийн бэлтгэл нөхөрлөл бололтой. Улс төр ажиглагчид, судлаачид, сонгогчдын зүгээс нисгэж байгаа зүйл бол ирэх сонгуульд гуравдагч хүчний орон зай нэлээд тэлэх хандлагатай байгааг ч удаа дараа дуулгасан нь ч нөлөөлсөн байх. Өнөөдөр улстөрийн баруун зүүний магнайг эзлэн буй АН, МАН-д итгэх сонгогчдын тоо эрс буурсан үзүүлэлтийг ч судалгааны байгууллагууд удаа дараа гаргах болсон. Нийгэмд буй энэ үзэгдэл нь С.Эрдэнэ даргыг Н.Энхбаярт ханд хаяхад нөлөөлсөн байж таарна. Хамгийн гол нь сонгогчдын сэтгэл зүй гэдэг өдөр өдрөөр хувирч, өөрчлөгдөж байдаг хуультай гэдгийг мартаж болохгүй.

Улс төрд мөнхийн эрх ашиг гэж бий гэдэгчлэн С.Эрдэнэ, Н.Энхбаяр хоёр сэмхэн бөөрөө нийлүүлэх нь айсуй 2020 оны сонгуульд ялалтын туг хатгах гэсэн хэтийн гэнэн мөрөөдөл. Түүнээс бус 2008 оны сонгуульд өрсөлдсөн С.Эрдэнэ будилаан хутгасан учраас ял тулгуулж байхад Монгол Улсын Ерөнхийлөгчөөр ажиллаж байсан Н.Энхбаяр ч нөлөөлж байсан гэдэг. Гагцхүү 2009 оны Ерөнхийлөгчийн сонгуульд Н.Энхбаяр ялагдаж, Ц.Элбэгдорж ялсан учраас С.Эрдэнэ өршөөгдөж, өршөөгдөхөөр барахгүй УИХ-ын гишүүний тангараг өргөсөн билээ. Хэрвээ Н.Энхбаяр ахин ялалт байгуулсан бол С.Эрдэнэ юуны УИХ-ын гишүүн, юун сайд, намын дарга байх билээ. Ёстой хэн ч биш байх байлаа. Гэтэл өнөөдөр “хонь чоно явсан” хоёр эрхэм бөөрөө нийлүүлж байгаагийн цаана өнөөх улс төр дэх мөнхийн эрх ашиг аж.

Үүнээс өмнө буюу 2012-2016 онд АН Төрийн эрх барихдаа Н.Алтанхуяг дарга Н.Энхбаяртай хамтран ажиллах гэрээ байгуулан Засгийн газарт хүртэл хамтарч үзсэн гэхээр энэ хоёр хүчинд эртний сайхан үерхлийн түүх ч бий. Мөнхүү МАХН-тай хамтарсан засаг байгуулж ажиллаад амжилт олоогүй түүх ч бий. Засаг хойморлож суусан АН-ыг 2016 онд ялагдахад хамтран ажилласан МАХН-ын нөлөө байсныг ч мартаж болохгүй. Гэхдээ чухам С.Эрдэнэ дарга энэ үерхэлээ аль хүртэл явуулах сонирхол байгааг таах аргагүй.

Яг энэ мөчид сумын Иргэдийн Төлөөлөгчдийн хурлын нөхөн сонгууль 11 аймгийн 24 суманд явагдахаар товлогдож, МАН, АН, МАХН-аас нийт 53 нэр дэвшигч, бие даагч дөрвөн хүн өрсөлдөхөө мэдэгдэж бүртгүүлсэн. Тиймээс энэ сонгуулиар хоёр аймгийн ИТХ-ын дахин сонгуульд МАН-2, АН-2 хүн нэр дэвшүүлэхээр болсон байна. 2016 онд орон нутгийн сонгуульд Төв аймагт АН, МАХН  “Төв нутаг” эвсэл байгуулж оролцсон. Энэ удаа Төв аймгийн зарим суманд АН, МАХН-ныхан хамтарч оролцохоор болсон мэдээлэл бий. Ямартай ч арга ядсан АН-ын дарга С.Эрдэнийн өнөөдрийн сонголт бол үүнээс өөр байхгүй.

Н.Баатар

www,zindaa,mn