Нефть нэрэх үйлдвэрийн замын зураг бэлэн болжээ

Зүүнбаянгийн нефть нэрэх үйлдвэр үүдээ барьсан цагаас шахам Нефть нэрэх үйлдвэр барих тухай ярьж, тэр тусмаа сүүлийн 20 гаруй жил үйлдвэрийн шав тавьсан ч баригдаж байсан нь үгүй. Харин өнгөрөгч өвөл Засгийн газрын хуралдаанаар Дорноговь аймгийн Алтанширээ сумын нутагт Нефть нэрэх үйлдвэр барихаар болсон билээ.

Тиймээс Засгийн газрын хуралдаанаас Алтанширээ сумын нутаг дахь 150 га талбайг улсын тусгай хэрэгцээнд авахаар тогтож энэ дагуу бусад ажлыг гүйцэтгэж эхэлсэн юм. Сайншандаас газрын тос боловсруулах үйлдвэр хүртэлх салаа төмөр зам, хүнд даацын тусгай зориулалтын автозам, эрчим хүч дамжуулах шугам зэргийг төрийн өмчит компани, байгууллага хариуцаж гүйцэтгэхээр болсон юм. Тиймээс үүний дагуу Сайншандаас Нефть боловсруулах үйлдвэр хүртэл баригдах төмөр замын ажлын зураг төслийг хийж гүйцэтгэсэн байна. Тус төмөр замын зураг төслийг Төмөр замын харъяа Барилга зураг зүйн газрынхан хийж гүйцэтгэсэн бөгөөд зам баригдаж дуусах хүртэл Улаанбаатар төмөр зам болон бусад гүйцэтгэгч талуудтай хамтран ажиллах юм байна.

Мөнхүү бүтээн байгуулалтын энэ томоохон ажлын үе шат бүрт Тагнуулын ерөнхий газар, Авлигатай тэмцэх газар, Цагдаагийн ерөнхий газар, Мэргэжлийн хяналтын ерөнхий газар зэрэг байгууллагын төлөөллөөс бүрдсэн Ажлын хэсэг байнгын хяналт тавих юм гэж барихаар төлөвлөжээ.

Дашрамд дурдахад, үйлдвэрийн нарийвчилсан Техник эдийн засгийн үндэслэлийг  Энэтхэгийн Төрийн өмчит “EIL” компани хийж байгаа юм. Нарийвчилсан тоо, баримтыг гуравдугаар сарын сүүлээр танилцуулах бөгөөд Энэтхэгийн нэгэн компани төмөр зам барих ажилд оролцох хүсэлтээ манай улсын Засгийн газарт ирүүлсэн байна.

Энэ байршлыг сонгохдоо дэд бүтэцтэй ойрхон, түүхий эдээ Дорнодын XIX, XXI талбайгаас татах боломжтойг харгалзан үзсэн бөгөөд төмөр замаар Улаанбаатар хот болон бусад бүс рүү тээвэрлэх боломжтой гэдгийг холбогдох албаныхан тайлбарласан юм.

Н.Баатар

www.zindaa.mn