Нефть нэрэх үйлдвэрт дургүйцлээ илэрхийлсэн импортлогчид

Өнгөрөгч долоо хоногт Дорноговь аймгийн Алтанширээ сумын нутагт Газрын тос нэрэх үйлдвэрийн шав тавьж Засгийн газар зоримог алхам хийсэн нь шатахуун импортлогчдын дургүйг илтэд хүргэв үү яав. Ямартай ч эсэргүүцэж байгаагийн нэг хэлбэр гэж ойлгож болохоор асуудал дэгдэв. Импортлогчид шатахууны үнэ нэмэхийн зэрэгцээ эртнээс яригдаж байсан хуурамч шатахууны асуудал ч дөрөө харшуулан босов. Уг нь бол манай импорлогч боссуудын дунд нэг ч орос, хятадын иргэн байхгүй. Тэд бүгд Монгол Улсын иргэн бөгөөд энэ газар шороонд унаж, энд хөл тэнцэж хүн болсон. Тэгэхээр импортлогчид маань эх орон нь нэг ч гэсэн үйлдвэртэй болохыг дэмжих нь зүйн хэрэг.    

Нефть нэрэх үйлдвэрийн тухайд бол олон жилийн тушид улстөрчид шоу хийх зорилгоор шав тавьж ирсэн ч нэг ч үйлдвэр баригдаагүй болохоор иргэд олон нийт ч итгэхээ больсон. Харин энэ удаад Монгол Улсын Засгийн газраас үйлдвэрийн ажлыг эрчимтэй эхлүүлж, Техник эдийн засгийн үндэслэлээ гаргачихсан, хөрөнгийн эх үүсвэрээ шийдчихсэн, зам барилгын ажил нь гараанаас гарч байгаа болохоор иргэд олон нийтийн итгэл сэргэж энэхүү ажлыг дэмжиж сууна. Үүний зэрэгцээ нефтийн импортоос асар их ашиг олдог импортлогчид маань дургүйхэн байна уу гэсэн сэжигийг нийгэмд өгчихлөө.

Уг нь энэхүү бүтээн байгуулалтыг эхлүүлсэн Засгийн газар нь тогтвортой байгаад, сонгуулийн үр дүнд шинээр Засгийн газар байгуулагдлаа ч Газрын тосны үйлдвэр барих ажлыг гацаалгүй барьж чадвал хугацаа ёсоор 2022 онд үйлдвэр барих ажил дуусах ёстой. Манай нөхцөлд шинээр Засгийн газар гарч ирэхээр өмнөх Засгийн газрынхаа хийж байсан зөв, буруу ямар ч ажлыг гацаадаг жишиг бий. Тэгэхээр энэ мэт томоохон төслийг гацаалгүй үргэлжүүлэх нь Монгол Улсад хэрэгтэй. Уг нь үндэсний хэмжээний том бүтээн байгуулалт эхлүүлсэн Засгийн газрыг үргэлжүүлэн ажиллуулаад эцсийг нь үзэх нь хамгийн зөв арга гэдэг ч манай нөхцөлд сонгуулийн үр дүнгээс хамаарах тул ямар ч арга байхгүй. Гагцхүү сонгогч олны итгэл, ирээдүйгээ харсан сонголт л үүнд тус болох учиртай.  

Нефть нэрэх үйлдвэр ашиглалтад орлоо бол нефть импортлогчид тэртээ тэргүй импортоо зогсооно. Тэд дотоодын зах зээл дээр дур зоргоороо үнэ тогтоодог монополь эрхээ хазаарлуулахаас гадна Засгийн газарт шантааж үзүүлэх ямар ч хэрэггүй болох учраас ийн эсэргүүцэж байна уу гэх хардлага нийгэмд бий боллоо. Уг нь ОХУ-аас орж ирж байгаа шатахууны үнэ тонн тутамд нэг ам.доллар нэмэгдсэн юм билээ. Энэ бол дотоодын зах зээл дээр нэг литр тутамд 50 төгрөг нэмэх шалтгаан биш гэдгийг салбарын мэргэжилтнүүд хэлж байна.

С.Ууганбаяр

www.zindaa.mn