АН-ынхны сонгууль арай л эрт эхэлж байна уу

Аливаа сөрөг хүчний үндсэн үүргийн хувьд УИХ дахь АН-ын бүлгээс өнөөдөр хэвлэлийн хурал зарлаж, хаврын ээлжит чуулганы үйл ажиллагаанд хийсэн дүгнэлтээ олон нийтэд танилцууллаа. Юуны өмнө сөрөг хүчний зүгээс хаврын чуулганаар хэлэлцэх ёстой гол гол хуулийн төслүүдийг хэлэлцэж чадсангүй харамсалтай байна хэмээн толгой сэгсэрч байна лээ.

Үүнд, Хөдөлмөрийн тухай хууль, Хөрөнгө оруулалтын банкны тухай хууль, Жижиг дунд үйлдвэрлэлийг дэмжих тухай хуулийн өөрчлөлт, Татварын ерөнхий хууль болон Аж ахуйн нэгжийн орлогын албан татварын тухай хууль гээд олон хуулийг хэлэлцэж амжаагүй болон зарим хуульд анхаарах ёстой хэмээв. Харин “Тавантолгойн ордыг эдийн засгийн эргэлтэд оруулах ажлыг эрчимжүүлэх тухай хууль”-тай санал нэгдэж байгаагаа дуулгасан. Бас яахав, ганц ч гэсэн зүйлтэй санал нэгдэж байна гэдэг сайн хэрэг гэж бодохоос өөр аргагүй.

Ийнхүү нэгэн ангид мөр зэрэгцэн суугаа гишүүдээ бут ниргээд эцэс сүүлд нь өнөөх л “Хүүхдийн мөнгө”-ийг 80 хувьд олгосон нь ирээдүйг алагчилан үзсэн хэмээн уйлан хайлан Монгол Улсын ирээдүйг хачин ихээр хайрлав. Бүр эцэст нь Хаврын чуулганы үйл ажиллагаанд дүгнэлт хийх бус МАН-ын мөрийн хөтөлбөрт анализ дүгнэлт хийж хадуурлаа. Тэдний хэлж байгаагаар МАН-ын мөрийн хөтөлбөрөөс ганц ч зүйл биелээгүй бөгөөд цаашид ч ард түмэн юу ч хүлээх хэрэггүй, “биднийг сонгохгүй яасан юм, одоо биднийг сонгоод өг” гэхдээ туллаа. Үүнээс гадна Ж.Эрдэнэбатын болон өдгөөгийн Засгийн газрын ажилд дүн тавьж гээд ерөөсөө л сонгуулийн пиар сурталчилгааг жинхэнэ утгаар нь хийж чадав. Тэд өнөөдрйин эдийн засгийн статистик баримт үзүүүлэлтийг төдийлөн дурдахгүй байгаа нь манай эдийн засагт эерэг дүн байгааг төвөггүйхэн гэрчилнэ. Түүнээс уруудсан үзүүлэлтэй байгаа бол тэд юуны өмнө дурдах учиртай.

УИХ-д арай гэж бүлэг бүрдүүлж байгаа АН-ынхан ийнхүү арай л эрт сонгуулиа эхлүүлэв үү гэх хүмүүс ч байсан юм. Өнөөдрийн хувьд Төрийн ордон эл хульхан, УИХ-ын чуулганы хуралдаан завсарласан болохоор гишүүд ч тойрог тойрогтоо заларсан бололтой. Гагцхүү хар үүрээр сонгуулийнхаа сурталчилгааг эхлүүлж байгаа АН-ын бүлгээс ганц нэгэн гишүүн харагдсан.

“Сайнтай муутай байж сав дүүрдэг” гэдэг дээ. Эрх биш энэ парламент Хаврын чуулганы хугацаанд 100 хэрэггүй хууль батлаад хэрэгтэйг нь таягдаад байгаагүй нь лавтай. Тэгэхээр өөрсдийнхөө суудаг парламентийн Хаврын чуулганы үйл аижллагаанд “онцмуу” дүн тавьж 100 хувь харлуулж харагдуулахыг хичээж байгааг сонгуулийн хар технологи нэгэнт ажиллаад эхэлжээ гэж харж болохоор. Нөгөө талаар хэдийгээр хэрүүл тэмцэлтэй ч эрх баригчдаас бүрдсэн хоёр ч Засгийн газарт алдаа оноо бий. Гэтэл дандаа алдааг нь түүж харагдуулж байгаа нь ч үүнийг гэрчилнэ. Түүнээс бус хамгийн сүүлийн үеийн жишээ дурдахад, Дорноговь аймгийн Алтанширээ сумын нутагт Газрын тос нэрэх үйлдвэр шаваа тавьж, хөрөнгө мөнгөний асуудал ч шийдэгдсэн гээд эерэг зүйл олон байгааг иргэд олон нийт мэдэж л байгаа шүү дээ.

Энэ бүгдээс харахад АН сонгуулийнхаа ажлыг нэгэнт эхэлжээ гэж харж болохоор.  

Н.Баатар

www.zindaa.mn