Г.Тэнгэр, Н.Чимгүүндарь “хөгшид”-ийг хэзээ томилох юм бэ?

Монгол Улсын Ерөнхийлөгчөөс удтал хүлээлт үүсгээд байсан зургаан улсад суух нэр бүхий Элчин сайдуудад зарлиг гарган, итгэмжлэх жуух бичгийг гардуулсан мэдээлэл байна. Харин энэ үеэр Н.Чимгүүндарь, Г.Тэнгэр нарыг бас л Элчин сайдад зөвшөөрсөнгүй. Үүний цаана улстөрийн шантааж, олон учир шалтгаан байгааг хэвлэлүүд онцолж л байдаг. Харин Ерөнхийлөгч Х.Баттулгын зүгээс “Элчин сайдаар ажиллахаар болсон эдгээр нэр дэвшигчид нь тухайн албыг хаших насны шалгуурыг хангаагүй” хэмээдэг.

Г.Тэнгэрийн хувьд өдгөө 45 насны босгоор давж буй “өвгөн” эр. Өөрөөр хэлбэл, Үндсэн хуульд зааснаар Монгол Улсын Ерөнхийлөгчийн сонгуульд нэр дэвшин өрсөлдөх эрхтэй болчихсон хүн. Н.Чимгүүндарийн хувьд 36 насны босгоор алхасан эмэгтэй. Тодотгож хэлбэл, манай улсын дүрэм журмаар залуу гэсэн тодотголоосоо хасагдаж буй “авгай”. “Ажилд авна” гэсэн зар харахад “35 наснаас дээш” гэдэг биз дээ. Дотоодын зах зээл дээр бол ажиллах боломжгүй “хөгшин” хүн. Залуучуудын аварга шалгаруулах тэмцээн гэхээр 35 наснаас дээш бол хөгшин гээд хасаж орхидог. Үүнээс харвал Н.Чимгүүндарь хасагдаж, Г.Тэнгэр хөгшин төгцгөөрөө дуудуулаад хөөгдөх тийм л нас санж. Энэ мэтээс харвал дээрх хоёр эрхэмд “насны шалгуур” ярьж саад тавих нь илүүц харагдана.

Ингэхээр дээрх хоёр эрхмийг Ерөнхийлөгч Х.Баттулга тэтгэвэртээ гарахаар нь жуух бичгээ өргөн барих гээгүй бол Элчин сайдаар суух улсад нь явуулж, эзэнтэй болгомоор юм. Уг нь дээрх хоёр улсад Монгол Улсыг төлөөлөх Элчин сайдгүй байгаа нь улс хоорондын дипломат харилцаа болон бусад зүйлд сөргөөр нөлөөлөх вий гэсэн болгоомжлол дипломатчдын хүрээнд гардаг юм билээ. Тэгэхээр Элчин сайдад сойгдоод уяан дээрээ удаан эргэцэн буй хоёр эрхмийн намтрыг аваад үзье. Элчин сайдын албанд тэнцэх эсэхийг эндээс харахад гэмгүй.

Г.Тэнгэр

Тэрбээр 1994 онд Токио хотын Гадаад хэлний сургууль, 1998 онд Япон улсын Ёкохамагийн Үндэсний дээд сургууль, 2016 онд МУИС-ийн Нийгмийн ухааны сургуулийг төгссөн. Англи, япон хэлний мэдлэгтэй, төрийн албанд есөн жил, дипломат албанд нэг жил ажилласан. Тухайн орныхоо хэл, ёс заншлыг мэдэх хүн. Тэр тусмаа Гадаад хэргийн дэд сайдаар ажиллаж байсан туршлага ч түүнд бий. Энэ хэрийн боловсрол, өдий зэргийн туршлагатай Г.Тэнгэрээс өөр хүнийг Элчин сайдад томилно гээд хайвал ёстой л Х.Баттулгын “насны шалгуур”-т тохирсон тэтгэврийн хүн л олдоно. Эсвэл нам дагасан нэг дурын нөхөр дипломат албаны нэр нүүрийг барах хэрэг гарна.   

Н.Чимгүүндарь

Тэрбээр 2006 онд Москвагийн Олон улсын харилцааны дээд сургууль, 2016 онд Францын Үндэсний удирдлагын их сургууль төгсөж, Нидерландын Клингендалийн их сургуульд олон улсын харилцааны чиглэлээр мэргэжил дээшлүүлсэн. Франц, орос, англи хэлний мэдлэгтэй, “Тэргүүн итгэмжит” дипломат цолтой, дипломат албанд 11 жил ажилласан. Үүнээс харвал Н.Чимгүүндарьд өндөр боловсрол байна уу гэвэл байна, өргөн туршлага байна уу гэвэл байна. Ид ухааны бяр зааж ажиллах насан дээрээ явна гээд аль ч талаасаа болохгүй зүйл алга. Н.Чимгүүндариас өөр Элчин сайдад тэнцэх хүн хайна гэвэл Ерөнхийлөгчийн Үндсэн хуулийн цэцэд зүтгүүлээд уначихадаг тэтгэврийн авгай мэтхэн л тааралдана.

Жич,

Ерөнхийлөгч Х.Баттулга нас хүйс, мэдлэг боловсрол, ажлын туршлага гээд бүхий л зүйл дээр тэнцэх хэмжээний хоёр залууг Элчин сайдад томилох зарлиг гаргаж, итгэмжит жуух бичгийг өргөн барихгүй байгаа нь цаанаа улс төрийн шалтгаантай хэмээн үзэж буй. Учир нь Ерөнхийлөгчийн зүгээс Үндсэн хуулийн цэцээс эхлээд УИХ-аар хэлэлцэн баталдаг эрх бүхий байгууллагын хэд хэдэн томилгоонд өөрийн гэх хүмүүсээ зүтгүүлсэн ч УИХ-ын босго даваагүй. Тиймээс УИХ-ын олонхиос оруулж ирсэн зарим Элчин сайдыг батламжлахгүй шантааж үзүүлж байна гэх таамаг ч байдаг. Дээрх нөхцөл байдлаас харахад энэ таамаг тийм хол зөрөхгүй байна. Тэгэхээр Төрийн алтан аргамж болсон диполмат албаны ажлыг гацаанаас гаргах эсэх нь Ерөнхийлөгчийн гарт үлдэж байгаа юм. Үүнээс гадна улс хоорондын харилцаанаас эхлээд олон зүйлд саад болж байгааг ч албан хүмүүс цохон тэмдэглэж байна.  

С.Ууганбаяр

www.zindaa.mn