С.Эрдэнэ өөрийнхөө тавьсан өрийг өрөөлөөс асуув

Ардчилсан намын дарга С.Эрдэнэ Ерөнхий сайд У.Хүрэлсүхэд хандан Монгол Улсын өрийн асуудлаар асуулга тавьсан байна. Тэгэхдээ эдийн засгийн байдал гайгүй сэргэж 6,1 хувьд хүрсэн атал Монгол Улсын өр яагаад өсөөд байна гэх утга бүхий албан бичгийг илгээжээ. Ингэхдээ гадаад өр 2016 оны зургадугаар сард 24 тэрбум 260 сая ам.доллар байсан бол 2018 оны зургадугаар сард 27 тэрбум 245 сая ам.доллар болж даруй гурван тэрбум 500 сая ам.доллараар нэмэгдсэн шалтгаан"-ыг тайлбарла гэсэн хариу нэхжээ. Уг нь үүний хариулт их амархан.

Сүүлийн гучаад жил улстөржиж ярьсан Газрын тос нэрэх үйлдвэрийн ажлыг нэг тэрбум ам.долларын хөнгөлөлттэй зээлээр эхлүүлсэн. Тодотгож хэлбэл, та бүхний зориглон хийгээгүй их ажлыг нэгэнт эхлүүлээд мөдхөн шатахуун түлшний хараат байхаа болих гэж байна. Үүнд нэг тэрбум байтугай нэг хэсэг тэрбум ам.долларын зээл авсан ч багадах хэрэг гэдгийг нийт монголчууд хүлээн зөвшөөрч таарна. Хэн ч гэсэн хямд шатахуун түлш хэрэглэхийг л зорино биз дээ.

Мөнхүү нийслэлчүүдийн ганц зовлон болоод буй Цэвэрлэх байгууламжийн ажлыг БНХАУ-ын хөнгөлөлттэй зээл буюу 300 сая ам.доллараар эхлүүлчихлээ, төсвөөс ч 10 орчим тэрбум төгрөг гаргачихлаа. Төв цэвэрлэх байгууламжийн талаар мөн ч олон жил улстөржиж хэрэлдсэн дээ. С.Эрдэнэ мэт нь лав хийчих ажил биш. Дээр нь нэмээд АН-ыг засаглаж байх үед Эдийн засгийн хөгжлийн сайд Н.Батбаярын АНУ-д гал тахиж байж зээлсэн “Чингис” бондын 1,5 тэрбум ам.доллар, бусад бондын эргэн төлөлт, хүү гээд нэг тэрбум хол давсан ам.долларын төлөлтийг хийсэн гэхээр С.Эрдэнэ даргын яриад байгаа гурван тэрбум гаруй ам.доллар ч багдана. Энэ мэт дурдаад байвал оновчтой бүтээн байгуулалтын чиглэлд чамгүй хөрөнгө оруулалт хийсэн баримтаар байгаа учраас тэр болгоныг дурдаад яахав.

Хамгийн наад захын жишээ дурдахад, “Чингис” бондын мөнгөөр юу хийсэн бэ гэхээр хэдэн аймагт хатуу хучилттай зам оруулсан гэх хөрөнгө мөнгөний тооцоо харуулдаг. Гэтэл хатуу хучилттай замынхаа өргөн нарийнаас идчихсэн учраас өнөөдөр ч энэ асуудлаар АТГ-т шалгагдаж байгаа нөхөд байгаагаас гадна зам эвдэрч дахин засварт орсон газар цөөнгүй байгааг бид баримтаар мэднэ.

“Чингис” бондын мөнгөнд ”гар дүрсэн” хэргээр Эдийн засгийн байнгын хорооны дарга асан Б.Гарамгайбаатар, Эдийн засгийн хөгжлийн сайд асан Н.Батбаяр нараас эхлээд хууль хяналтын байгууллагаар шалгагдаж байгаа нөхдийг дурдвал чамгүй тоо гарна. Үүнээс харвал С.Эрдэнэ дарга өөрийнхөө тавьсан, идсэн уусан мөнгийг өрөөлөөс асууж байгаа мэт сонсогдоно.

Н.Баатар

www.zindaa.mn