Н.Энхбаяр, О.Баасанхүү хоёрын хэн нь барьцаа ахиулах вэ?

-Нэг нь МАХН-ын даргын суудлаа авч үлдэх, нөгөө нь МАХН-ын дарга болох хүслээр л хязгаарлагдаж байгааг эс тооцвол мань хоёр өнөөдөр гарааны яг ижил төвшинд зогсч байна-

Нэгэн цагт Ерөнхий сайд, УИХ-ын дарга, Ерөнхийлөгч гээд төрийн бүхий л өндөр албан тушаалыг хашиж явсан Н.Энхбаярт өнөөдөр МАХН-ын дарга гэх “жижигхэн” албан тушаал, түүнийг нь гэрчлэх ганцхан модон тамга л үлдсэн. Харин нэгэн цагт Н.Энхбаярын өмгөөлөгчөөр нь ажиллаж, түүний төлөө үгээ хэлж, түүнийг үхэн хатан хамгаалж ирсэн О.Баасанхүүд Н.Энхбаярыг бодвол УИХ-ын гишүүн гэх хууль батлалцах эрх мэдэл, парламентын гишүүний албан тушаал байна. Гэсэн ч нэг нь МАХН-ын даргын суудлаа авч үлдэх, нөгөө нь МАХН-ын дарга болох хүслээр хязгаарлагдаж байгааг эс тооцвол мань хоёр өнөөдөр гарааны яг ижил төвшинд зогсч байна.

Өөрөөр хэлбэл, О.Баасанхүүд МАХН-ын дарга болох, Н.Энхбаярт МАХН-ын даргаараа үлдэх хүсэл бий. Хэдийгээр мань хоёрын хүсэл үүгээрээ өөр ч, түүнд хүрэх “зовлон” нь нэг юм. Учир нь, МАХН-ын 35 мянга гаруй гишүүний нэг хэсэг нь Н.Энхбаярыг, үлдсэн хэсэг нь О.Баасанхүүг дэмжиж байгаа билээ. Тэд бүгд л өөр, өөрийн дэмжиж, итгэж байгаа хүнээ намын даргаараа сонгож, намынхаа модон тамгыг гардуулж өгөх сонирхолтой. Энэ мэт шалтаг, шалтгаанаас үүдэж МАХН доторх “талцал” жинхэнэ утгаараа өрнөж байна.

Тэгвэл О.Баасанхүү гишүүнийг намаасаа хөөсөн гэдгийг Н.Энхбаярын талынхан өнгөрсөн хугацаанд найман удаа мэдэгдсэн. Харин О.Баасанхүү гишүүн намаасаа гараагүй, МАХН-ын гишүүн хэвээрээ гэдгээ ч мөн адил найман удаа илэрхийлжээ. О.Баасанхүү гишүүний зохион байгуулсан МАХН-ын II Их чуулганд Н.Энхбаяр оролцоогүй шиг Н.Энхбаярын зохион байгуулах МАХН-ын II Их чуулганд О.Баасанхүү ч оролцоогүй.

Бүтэн зургаан жил намын даргын суудалд тухалсан Н.Энхбаяр өнөөг хэр нь улс төрийн ямар нэгэн хариуцлага хүлээгээгүй нь магадгүй О.Баасанхүүд "том" боломж байхыг үгүйсгэхгүй. Гэхдээ улстөрчийнх нь хувьд мань эрийг Н.Энхбаяртай харьцуулахад тэр дэндүү "жижигхэн". Ямартай ч энэ хоёрын нэг нь намын дарга болох, нөгөө нь намын даргаараа үлдэх хүсэлтэй нь хөдлөшгүй үнэн. Харин түүнд хүрэх зам, "зовлон" хоёр нь ижилхэн байгаа нь тэдний хооронд жинхэнэ утгаараа "дайн"-ыг эхлүүлээд байгаа юм. Олон нийт Н.Энхбаяр намын даргаараа үлдэх үү, О.Баасанхүү МАХН-ын шинэ дарга болох уу гэдгийг харах л үлдээд байна.

Тэгвэл өнөөдөр /2018.09.24/ Улсын Дээд шүүхийн Иргэний хэргийн танхим МАХН-аас гаргасан хүсэлтийг хэлэлцэнэ. МАХН-ын зүгээс намынхаа шинэчлэн найруулсан дүрэм, мөрийн хөтөлбөрөө бүртгүүлэх хүсэлт ирүүлжээ. Уг хүсэлтийг Н.Энхбаярын талаас гаргасан байна. Нөгөө талд УИХ-ын гишүүн О.Баасанхүү ч МАХН-ын дүрмийн өөрчлөлт, мөрийн хөтөлбөрөө бүртгүүлэхээс гадна намын даргаар бүртгүүлэх хүсэлтээ хүргүүлээд байгаа юм. Өөрөөр хэлбэл, Улсын Дээд шүүх өнөөдөр Н.Энхбаярын талаас гаргасан хүсэлтийг улс төрийн намын бүртгэлд шинэчлэн бүртгэх эсэхээ шийднэ. Хэрэв хүсэлтийг хангахаас татгалзвал УИХ-ын гишүүн О.Баасанхүүг МАХН-ын даргаар сонгогдох магадлал өндөр юм.

Б.ТӨРБАТ

WWW.ZINDAA.MN