Үнэт цаасны 31 компани хувь нийлүүлсэн хөрөнгөө зохих хэмжээнд хүргэжээ
Санхүүгийн зохицуулах хороо үнэт цаасны зах зээлд зарим зохицуулалттай үйл ажиллагаа эрхлэх этгээдийн хувь нийлүүлсэн хөрөнгийн доод хэмжээг шинэчлэн баталсан. Энэ хүрээнд 2017 оны нэгдүгээр сарын 1-ний өдрөөс баримтлах хувь нийлүүлсэн хөрөнгийн доод хэмжээг хөрөнгө оруулалтын зөвлөхийн үйл ажиллагаанд 30 сая, үнэт цаасны брокер 100 сая, дилер 200 сая, андеррайтер 1.0 тэрбум төгрөг байхаар тус тус тогтоосон юм.
Өнөөдрийн байдлаар үнэт цаасны зах зээлд дээрх үйл ажиллагааг тусгай зөвшөөрлийн дагуу нийт 53 аж ахуйн нэгж эрхэлж буйн 11 нь хөрөнгө оруулалтын зөвлөх, брокер, дилер, андеррайтерийн үйл ажиллагааг давхар гүйцэтгэж байгаа бол 1 компани хөрөнгө оруулалтын зөвлөх, брокер, дилерийн, 11 нь брокер, дилер, андеррайтерийн, 19 нь брокер, дилерийн үйлчилгээг хавсарч, мөн 11 нь зөвхөн дилерийн үйл ажиллагаа явуулж байна.
Хэд хэдэн төрлийн тусгай зөвшөөрлийг давхар эзэмшиж буй компаниудад тухайн үйл ажиллагаа бүрт ногдох хувь нийлүүлсэн хөрөнгийг нэг бүрчлэн хангах шаардлагыг Хороо тавьж буй бөгөөд тухайлбал, хөрөнгө оруулалтын зөвлөх, брокер, дилер, андеррайтерийн үйл ажиллагааг бүгдийг нь эрхлэхээр тусгай зөвшөөрөл авсан компани нийтдээ 1 330 сая төгрөгийн хувь нийлүүлсэн хөрөнгө буюу дүрмийн сантай байх учиртай. Дээрх тогтоолын хэрэгжилтийг нягтлан үзэхэд өнөөдрийн байдлаар 53 компанийн 31 нь хувь нийлүүлсэн хөрөнгөө бүрэн бүрдүүлээд ажиллаж байгаа бол 22 нь бүрдүүлэх шатандаа явж байна гэж Санхүүгийн зохицуулах хорооноос мэдэгдлээ.
Холбоотой мэдээ
Сэтгэгдэл ( 0 )