Инээж хөхрөхгүй юм бол амьд яваад яах юм

Яах юм бэ?

Шаналахгvй юм бол сэтгэл зүрхээр яах юм
Шартахгvй юм бол хатуу архиар яах юм
Цэнгэхгvй юм бол гоо охидоор яах юм
Цэцэглэхгvй юм бол гоё моносоор яах юм
Анхилахгvй юм бол ум зандангаар яах юм
Амраглахгvй юм бол уяхан охидоор яах юм

Үнсэхгvй юм бол ягаахан уруулаар яах юм
Үгvйлэхгvй юм бол ялдамхан харцаар яах юм
Уйлахгvй юм бол усан нулимсаар яах юм
Уулзахгvй юм бол гvн уйтгараар яах юм
Тэврэхгvй юм бол хоёр гараар яах юм
Тэвчээргvй юм бол хайр сэтгэлээр яах юм

Тоглохгvй юм бол хаш шатраар яах юм
Тоосрохгvй юм бол харгуй замаар яах юм
Дэгдэхгvй юм бол туулайн бvжингээр яах юм
Дэврэхгvй юм бол залуу насаар яах юм
Ургахгvй юм бол амууны үрээр яах юм
Урсахгvй юм бол гол усаар яах юм

Хашихгvй юм бол эрэг байгаад яах юм
Хашрахгvй юм бол алдаж, оноод яах юм
Шаргихгvй юм бол намрын тариагаар яах юм
Шатахгvй юм бол найраг шvлгээр яах юм
Ган тайлахгvй юм бол хур бороогоор яах юм
Газар хороохгvй юм бол хvлэг мориор яах юм

Ааруул даахгvй юм бол араа шvдээр яах юм
Авгай тоохгvй юм бол харцуул хүүгээр яах юм
Буруу номтон юм бол эрдэм заагаад яах юм
Буян хийхгvй юм бол амьд яваад яах юм
Цас будрахгvй юм бол өвөл байгаад ч яах юм
Цаг хожихгvй юм бол эрдэмтэн гээд яах юм

Ээжийгээ дээдлэхгvй юм бол толгой байгаад яах юм
Эх орноо хайрлахгvй юм бол иргэн байгаад яах юм
Ард тvмнээ хvндлэхгvй юм бол ухаантай байгаад яах юм
Ах дvvсээ тэтгэхгvй юм бол төрөл байгаад яах юм
Итгэж залбирахгvй юм бол бурхан шvтээд яах юм
Инээж хөхрөхгvй юм бол амьд яваад яах юм

Гол горхи хоржигнохгvй юм бол хавар ирээд яах юм
Гоё цэцэг дэлбээлэхгvй юм бол зун болоод яах юм
Алсаас гялалзахгvй юм бол одод байгаад яах юм
Алтарсан навчис хийсэхгvй юм бол намар байгаад яах юм
Урдаас харж чадахгvй юм бол ирээдvйг дуудаад яах юм
Уймраа чавганц шиг юм бол залуу насаар ч яах юм

Уянгалан дуулахгvй юм бол хоолой заяагаад ч яах юм
Учирлаж сурахгvй юм бол хэлтэй байгаад ч яах юм
Саран, наран үгүй юм бол тэнгэр цэлийгээд ч яах юм
Саруул ухаан үгүй юм бол тэнхээтэй хvнээр ч яах юм
Хавар, намар үгүй юм бол өвөл, зунаар ч яах юм
Харанхуй шөнө үгүй юм бол гэгээн өдрөөр ч яах юм

Авьяас билэг үгүй юм бол яруу найрагчаар ч яах юм
Авах гээх нь үгүй юм бол судар номоор ч яах юм
Хортой дайсан үгүй юм бол буу сумаар ч яах юм
Ховор эрдэнэ үгүй юм бол эрэл сурлаар ч яах юм
Хол ойр нь үгүй юм бол орон зайгаар ч яах юм
Хоосон чанар үгүй юм бол бодитой байгаад ч яах юм

Цай чанах нь үгүй юм бол эхнэр аваад ч яах юм
Цамцаа оёх нь үгүй юм бол нөхөрт гараад ч яах юм
Үйлс залгах үгүй юм бол үр хүүхдээр ч яах юм
Үнэн, худлыг ялгахгvй юм бол багш ламаар ч яах юм
Иш нь vгvй юм бол сvх байгаад ч яах юм
Ир нь vгvй юм бол илд байгаад ч яах юм

Нум нь vгvй юм бол сум байгаад ч яах юм
Нууц нь vгvй юм бол тvр байгаад ч яах юм
Унших нь vгvй юм бол ном хураагаад ч яах юм
Ухаантай нь vгvй юм бол олон тvмэн нь яах юм
Алс хэт нь vгvй юм бол их санаагаар ч яах юм
Ард тvмэн нь vгvй юм бол их мэргэдээр ч яах юм

Очирбатын Дашбалбар

1955 онд Сүхбаатар аймгийн Наран суманд төржээ. 1984 онд Горькийн нэрэмжит утга зохиолын дээд сургууль төгсчээ. Түүний уран бүтээлийг үнэлж 1988 онд МЗЭ-ийн шагнал, 1996 онд төрийн шагнал хүртсэн. “Оддын аялгуу”, “Жаахан шарга”, “Гэрэлт хайр”, “Гол ус намуухан урсана”, “Зүүдний мөнгөн шувуу”, “Бие биеэ хайрла, хүмүүс ээ” зэрэг 10 гаруй ном хэвлүүлжээ. Түүний “Талын хөх чоно”, “Дарьганга аялгуу”, “Тэнгэр шиг бай”, “Янжинлхамыг баясгах дуулал” зэрэг шүлгүүд нь олны дунд тархаж, талархал хүртсэн шилдэг бүтээлүүд юм. Монголын авьяаслаг, гал цогтой, үнэнч шударга үгтэй энэ найрагчийн долоо хоног эхэллээ. Наран ургах дорнын цэнхэр хязгаараас төрсөн эрхэм шүлэгчийн найргийн дээжээс хүртэнэ үү! 

Zindaa.mn-Үндэсний чөлөөт мэдээллийн портал