Г.Солтан: Би хууль бус зүйл хийгээгүй

Прокурорын байгууллагаас УИХ-ын гишүүн Г.Солтан, Л.Энхболд, Б.Ундармаа, Г.Дамба-Очир нарын бүрэн эрхийг түдгэлзүүлэн шалгах саналыг УИХ-д хүргүүлээд байгаа. Уг асуудлыг УИХ-ын Халдашгүй байдлын дэд хороо өчигдөр /2019.01.09/ хуралдаж хэлэлцсэн ба УИХ-ын гишүүн Г.Солтан Баян-Өлгий аймагт албан томилолтоор явж байгаад өчигдрийн хуралд оролцож чадаагүй тул Дэд хорооны хуралдааныг өнөөдөр /2019.01.10/ үргэлжлүүлэхээр болж тарсан юм.

Тэгвэл УИХ-ын гишүүн Г.Солтан Улаанбаатар хотод ирсэн тул яг одоо Төрийн ордонд УИХ-ын халдашгүй байдлын дэд хороо хуралдахаар бэлтгэж байна. Хуралдааныг 09.30 цагт товлосон ч хараахан эхлүүгүй байна.

УИХ-ын гишүүн Г.Солтантай холбогдож, өнөөдрийн хурлын талаар байр суурийг нь асуухад "Би тойрогтоо ажиллаж байгаад сая хотод ирлээ. Одоо УИХ-ын Халдашгүй байдлын дэд хороо хуралдах гэж байна. Би хууль бус зүйл хийгээгүй. Намайг МАНАН бүлэглэлийг эсэргүүцэж, байр сууриа илэрхийлсний төлөө прокурорын байгууллагаас бүрэн эрхийг минь түдгэлзүүлж, шалгуулах саналыг УИХ-д хүргүүлж байх шиг байна" гэлээ.