Агаарын бохирдлын талаарх сонсголд иргэдийг оролцуулна

М.Хангал | Zindaa.mn
2019 оны 01 сарын 21

УИХ-ын Байгаль орчин, хүнс, хөдөө аж ахуйн байнгын хорооноос агаарын бохирдлын асуудлаар ерөнхий хяналтын сонсголыг 2019.01.30-нд Төрийн ордонд зохион байгуулахаар болсон байна. Агаарын бохирдлыг бууруулах чиглэлийн бодлого шийдвэр, хууль тогтоомжийг хэрэгжүүлэх чиг үүрэг бүхий байгууллага, албан тушаалтны үйл ажиллагаанд хяналт тавих, хэрэгжүүлсэн арга хэмжээ, түүнд төсөвлөгдсөн хөрөнгийн зарцуулалт, үр дүнг тодруулах зорилготой уг сонсголд иргэн, хуулийн этгээд, хэвлэл мэдээллийн байгууллагуудын төлөөлөл оролцох эрхтэй бөгөөд 2019.01.23-ны өдрийн 17.30 цагаас өмнө бүртгүүлэх шаардлагатай юм байна.


Ерөнхий хяналтын сонсголд оролцох хуулийн этгээдийн төлөөлөл, иргэн нь овог, нэр, оршин суугаа газрын буюу шуудангийн хаяг, гарын үсэг, холбогдох утасны дугаарыг бичсэн хүсэлтийг бичгээр болон sonsgol@parliament.mn цахим шууданд захидал илгээн бүртгүүлэх аж.


Оролцогчдын тоо хязгаартай тул хүсэлт ирүүлсэн дарааллаар баталгаажих бөгөөд бүртгэл дуусмагц нэрсийг УИХ-ын цахим хуудсанд байрлуулна.


Шуудангийн хаяг: 14201 Улаанбаатар хот, Сүхбаатар дүүрэг, Жанжин Д.Сүхбаатарын талбай 1, Төрийн ордон-401, Байгаль орчин, хүнс, хөдөө аж ахуйн байнгын хороо. /Лавлах утас: 51-261240/

Сэтгэгдэл ( 0 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
Top