Яавал МОНГОЛ ЯЛАХ вэ, ЕРӨНХИЙЛӨГЧ өө!

Швейцарийн Альпийн нурууны өндөр оргилын бэлд дэлхийн өнгийг тодорхойлогч улс орнуудын удирдагчид, өндөр албан тушаалтнууд, урлаг соёл, бизнесийн салбарын нөлөө бүхий эрхмүүд ээлжит уулзалтаа хийж, дэлхийн ирээдүйн талаар санаа, бодлоо уралдуулав. Хятадын дэд Ерөнхийлөгч, Японы Ерөнхий сайд, ОХУ-ын Гадаад хэргийн сайдаас авахуулаад Нобелийн хамгийн залуу шагналтан Малала Юсуфзай хүртэл үзэл бодлоо илэрхийллээ. Гэвч ардчилсан Монгол Улсын төрийн тэргүүн болж, Монгол ялна гэх уриагаар гарч ирсэн Ерөнхийлөгч Х.Баттулга энэ уулзалтаас гурав дахь удаагаа татгалзлаа. Ерөнхийлөгч болсноосоо хойш тэр Монгол Улсыг төлөөлж оролцоогүй хэрэг.

Монгол Улсыг гадаад улс орнуудад сурталчлах үүрэг төрийн тэргүүнд бий. Шударга ёс ярьж, ЖДҮ-тэй тэмцэнэ гэж илэрхийлсэн, Ерөнхий прокурорын газар очиж, өмнөх албан тушаалтнуудаа шалгахыг  шаардсан, эрх баригч намын зодоонд оролцож, парламентыг тараах санаачилга гаргасан байж болно. Энэ бүхэн ард түмэнд таалагдсан байж ч болно.

Дотоодын дэвжээн дээр тэр давж чадахгүй ч сайн дэвж байгаа. Гэхдээ олон улсад төлөөлж дэвээ, шаваагаа үзүүлээ гэж энэ суудал байдаг юм.

Өмнө нь төрийн тэргүүний албыг хашиж байсан Ц.Элбэгдорж хоёр бүрэн эрхийнхээ хугацаанд алгасалгүй оролцож, Монгол Улс бүс нутаг төдийгүй олон улсын харилцаанд жин даахуйц нөлөөтэй гэдгээ ам бардам хэлж байлаа. Түүнийг энд л ноолдог болохоос гадаадад төлөөлөх, үзэл бодлоо түгээх эрхээ бусад Ерөнхийлөгчдөөс хувь илүү илэрхийлж байсныг “ялах” тэмүүлэлтэй одоогийн Ерөнхийлөгчийн өнгөн дээр сайн мэдэрч байна.

Энэ удаагийн ДАВОС-оор юу ярилцсан тухайд анхаарал хандуулъя. Ерөнхийлөгч маань очоогүй учраас иргэд маань мэдээлэл дутуу ч байгаа байх. Тэнд Аж үйлдвэрийн дөрөв дэх хувьсгал аль хэдийнэ эхэлснийг, Хятадын эдийн засгийн уналттай байдал бүс нутагтай аюул учруулж болохыг, популизмын хэнээрхэл дэлхийд газар авсныг, ажиллах хүчний бодлогоо өөрчлөхгүй бол хиймэл оюун ухаан бүх салбарт хүч түрэн орж ирснийг, аж үйлдвэрийн шинэ хувьсгалтай холбогдуулж цаг уурын өөрчлөлттэй тэмцэх хэрэгтэй болсныг ихэд нухацтайхан ярилцав.

Улс орнуудын голлох намууд эдийн засгийн өөрчлөлт, нийгмийн байгууллын бодлогоо өөрчлөн тогтвортой, хүчтэй хөгжлийн цогц бодлоготой болохыг ч ач холбогдол өгч ярилцлаа. Дэлхий дахин тэнд тэс ондоо хөгжил ярьж, хүнээ хөгжүүлэх нь цорын ганц гаргалгаа болохыг ойлгон ухаарч байх хооронд Монголын удирдагчид энүүхэндээ улс төрийн хэрүүлээ хийсэн хэвээр сууна. Үндсэндээ бид ярианд оролцолгүй дэлхий нийтийн чиг шугамаас тээр хойно хоцорчихлоо.

Ерөнхийлөгч яг одоо сар шинийн баярын өмнө шагнал гардуулах хүмүүсийн тодорхойлолттой танилцан, гарын үсгээ зурж суугаа байх. Энүүхэндээ л "алдартай" одон медалиа хэнд тараахаа мэдэхгүй байх хооронд дэлхий нийт биднийг гайхан харж байна. Утаа, авлига, улс төрийн хямрал зэргээр дэлхий биднийг төсөөлж байгаа. Ямар сайндаа биднийг “Азийн Украин” гэж шоглон нэрлэж байх вэ? Чухамдаа үүнийг Монгол улсын гадаад харилцааг олон улсад төлөөлөх ёстой Төрийн тэргүүн маань хэрхэн тунгааж буй бол...

Гадаад улс орнуудад Монголыг зөвөөр таниулж, хурал цуглаанд оролцох нь ямар учиртай байдаг юм бэ гэж асууж болох юм. Монгол шиг донор орнуудын хишиг горьдож суудаг орон том тоглогчидтой уулзаж, нээлттэй бодлого, алсын хараа, хөгжил дэвшил, ирээдүйн тухай ярилцаж байж тэд биднийг тооно. Тоосныхоо хэрээр эдийн засгийн үнэлгээгээ өсгөнө. Мөнгө байхгүй, үсээ зулгааж байхад олон улсын тусламж, элдэв хөтөлбөрт хамруулна. Гаргалгаа нь ердөө л энэ. Ард түмнийхээ мөнгийг хэмнэж, гадаад айлчлалаа цөөлж байгаа гэх популист үгээр халхалдаг ч төрийн тэргүүний мөчидхөн шийдвэр Монголын нэр хүндийг бууруулж байна.

 

"Би багаасаа спортоор хичээллэсэн. Цаашдаа ч хичээллэнэ. Монголыг төлөөлж байгаа бие хүн учраас өөртөө анхаарах ёстой. Олон улсын төрийн тэргүүнүүд надтай уулзаад биеэ их зөв авч явдаг хүн байна гэж хэлж байсан" гэж Монгол Улсын Ерөнхийлөгч Х.Баттулга "Цаг үе, үзэл бодол" ярилцлагад оролцохдоо хэлж байв.

“Монгол ялна” л гэх... Яавал Монгол ялах юм бэ? Эрх мэдэлтнүүд дээгүүрээ мөнгө хуваан идэж үү, сонгуулиас сонгуулийн хооронд гоё, гоё уриа үгээр ард түмнийг хуурч уу, ард түмнийг цэнхэр, улаанаар нь талцуулж, намын хэрүүлийг гэр орны хэрүүл болгож уу, бүр эсвэл ирээдүй болсон хүүхдүүдээ цаг бусаар үхүүлж үү? Чухамдаа яавал монголчууд ялах вэ? Дэлхий дахины эд эс болсон Монгол Улс хаалттай байсан өмнөх үе шигээ бодлогын томоохон хурлуудад оролцохгүй, хаалгаа тас хааж болохгүй. Тэгэхгүй гэж ардчилсан хувьсгал мандаж, ингэхгүй гэж Монгол Улс нээлттэй гадаад бодлогоо 1992 оны Ардчилсан үндсэн хуулиар тунхагласан юм.