С.Эрдэнэ УИХ-ын гишүүнийг эгүүлэн татах хуулийн төсөл санаачилжээ

УИХ-ын гишүүн, АН-ын дарга С.Эрдэнэ УИХ-ын гишүүнийг эргүүлэн татах тухай хуулийн төсөл санаачилжээ. Тэрбээр “УИХ-ын чуулганы хуралдааны дэгийн тухай хуульд нэмэлт өөрчлөлт оруулж, сонгогчоос өөрийн сонгосон УИХ-ын гишүүндээ итгэл алдарсан тохиолдолд УИХ-ын гишүүнийг эгүүлэн татах эрхийг олгох, хуульзүйн боломжийг нээхэд уг хуулийн төсөл чиглэгдэж байгаа” гэсэн юм.

Өнөөдөр хүчин төгөлдөр үйлчилж байгаа хуульд УИХ-ын гишүүнийг хугацаанаас нь өмнө дуусгах таван тохиолдол бий.

• Нас барсан,
• Өөр ажилд шилжих шалтгаанаар хүсэлтээ гаргасан,
• Хүндээр өвчилсөн дүгнэлтийг эмнэлгээс гаргасан,
• Үндсэн хуулийн цэцээс дүгнэлт гарсан,
• Гишүүн гэмт хэрэг үйлдсэн болох нь батлагдсан гэсэн чөлөөлөх заалттай.

Тэгвэл С.Эрдэнэ гишүүний санаачилсан хуулийн төсөлд сонгогчид сонгосон гишүүнээ эгүүлэн татах эрхтэй байхаар тусгажээ.

УИХ-ын гишүүн С.Эрдэнэ хэлэхдээ "УИХ, эрх баригч нам, улстөрчид маш хариуцлагагүй, амлалтаа биелүүлдэггүй, хууль зөрчдөг бөгөөд сонгогчид сонгосон гишүүндээ хариуцлага тооцох эрх зүйн зохицуулалтгүй явсаар ирсэн. Түүнчлэн өнөөгийн улс төрд үүсээд буй нөхцөл байдал болон иргэдээс ирсэн санал гомдлыг үндэслэн УИХ-ын чуулганы дэгийн тухай хуульд нэмэлт өөрчлөлт оруулах хуулийн төслийг санаачиллаа. Тухайн тойргийн нийт сонгогчдын 1/3 нь санал гаргаж, гарын үсгээр баталгаажуулбал УИХ-ын гишүүнийг эгүүлэн татах хууль эрх зүйн боломжийг бүрдүүлж байгаа. Өөрөөр хэлбэл, сонгогчид УИХ-ын гишүүнийг эгүүлэн татах санаачилга гаргасан бол уг асуудлыг чуулганаар хэлэлцэж, гишүүдийн саналыг авч батлах шаардлагагүй" гэсэн юм.