Ж.Батзандан: Өнөөдрөөс 28 жил Монголыг дээрэмдсэн мафи задран унана

УИХ-ын чуулганы нэгдсэн хуралдаанаар нэр бүхий 39 гишүүний өргөн мэдүүлсэн УИХ-ын дарга М.Энхболдыг үүрэгт ажлаас нь чөлөөлөх асуудлыг хэлэлцэж байна.

Хэлэлцэж буй асуудалтай холбогдуулан УИХ-ын гишүүн Ж.Батзандан “Эрдэнэт”-ийн 49 хувийг ганцхан хүн хулгайлах боломжгүй. Нам дамжсан мафи хулгай хийсэн гэдгийг Монголын ард түмэн мэдэж байгаа. Цагаан суваргыг ганцхан хүн хулгайлах боломжгүй. МАНАН л хулгай хийж чадна. Төрийн банкнаас 20 тэрбум төгрөгийг ямар ч барьцаагүйгээр Хятадын компанид мафи л өгөх боломжтой. Сүхбаатарын талбайн талыг нь цэцэрлэгт хүрээлэнтэй нь хамт нэг компанид өгчихсөн байна. Төв талбайгаа дээрэмдүүлсэн улс Монголоос өөр байхгүй. Хөгжлийн банкнаас 1.2 их наяд төгрөгийг хэдхэн компани хувааж авсан. МАНАН мафи хуулийн дагуу хулгай хийсэн гэж ярих хүмүүс олон байна. Өнөөдрөөс 28 жил Монголыг дээрэмдсэн МАНАН мафи задран унана.  Тиймээс МАНАН мафийг нураах тэмцэлдээ нэгдэн орохыг гишүүдээсээ хүсье. МАНАН-гийн гар хөл болсон генералууд Батзанданг шоронд хийх юм сан гэж байгааг би мэдэж байна. Гэхдээ шударга ёс ялна” хэмээн байр сууриа илэрхийллээ.

Мөн УИХ-ын гишүүн, АН-ын дарга С.Эрдэнэ “Өнөөдөр М.Энхболд огцроод бүх зүйл сайхан болчихгүй. Нэг хүнд бүх хариуцлагаа хүлээлгэж огруулчихаад ард нь үлдэнэ гэж байхгүй шүү. Концесс, ЖДҮ, Оюутолгой, Тавантолгой, “Эрдэнэт”-ийн 49 хувийн асуудлыг шалгая. Одоо Засгийн газар ажлаа хий. Утаа хэцүүдлээ. Валютын ханшийн өсөлт, өргөн хэрэглээний барааны үнэ тэнгэрт хадаж байна. 2016 оны мөрийн хөтөлбөрөөс нэг ч амлалт хэрэгжээгүй байна. Ингэж байхаар МАН таръя. УИХ тарж Монголын ард түмнээр дүнгээ тавиулъя” гэж байр сууриа илэрхийлэв.

Чуулганы нэгдсэн хуралдаан үргэлжилж байна.

ДЭЛГЭРЭНГҮЙГ ВИДЕОНООС ҮЗНЭ ҮҮ!