Т.Хүрэлбат: С.Зоригийг хөнөөсөн хэрэгт Ц.Элбэгдорж, Б.Хурц нарыг шалгах хэрэгтэй

С.Зориг агсныг хөнөөсөн хэрэгт шүүхээс хорих ял сонссон Т.Чимгээгийн төрсөн ах Т.Хүрэлбаттай ярилцлаа.

-Т.Чимгээ, Б.Содномдаржаа нарыг эрүүдэн шүүсэн нь тодорхой боллоо. Та энэ тухайд юу хэлэх вэ?

-Мөрдөн байцаалтын үед хийгдсэн эрүү шүүлт шүү дээ. Тухайн үед дүү маань камерт нь Ц.Амгаланбаатар орж дарамталсныг хэлдэг байсан. Саяны бичлэг зөвхөн зургаан сарын хугацаанд хийсэн бичлэгээс задаллаа гэж байгаа. Энэ саяны үзүүлсэн бичлэг бол нэгхэн хэсэг нь юм билээ. Гэтэл Ц.Амгаланбаатар ганцхан удаа өрөөнд нь орж ирж байгаа юм биш. Ц.Амгаланбаатар коридороор нь хашхираад явж байдаг. “Хорин таван жилийн хорих ялтай хулгайчид шээх газар байна уу” гээд хашхираад, хаалга үүдийг нь өшиглөөд явж байх жишээтэй.

Анх дүүг маань ашиглахаа байсан Төв аймгийн мөрдөнд аваачиж хорьсон. Өрөөний дээвэрт нь аалз хүрээлчихсэн тийм л газар. Миний дүү өдөр хийх юмгүй, тэр аалзыг хараад л сууж байдаг гэж ярьдаг. Өрөөнд нь хувин тавьчихдаг. Түүндээ бие засдаг. Хоёр, гурван сар ар гэрийнхэнтэй нь уулзуулаагүй шүү дээ. Эмэгтэй хүнийг наад зах нь ариун цэврийн хэрэглэлээр хангах ёстой. Арга ядаад дотуур хувцсаа хар цайгаар угааж өмсдөг байсан гэдгээ хэлж байгаа. Прокурорууд манай дүүг 16 удаа эмнэлгийн үзлэг шинжилгээнд оруулсан, бараг л люкс өрөөнд байлгасан юм шиг ярьдаг. Гэтэл ямар орчинд байгааг УИХ-ын гишүүд, сэтгүүлчдэд үзүүллээ шүү дээ. Ямар муухай хүмүүс байдаг юм  бэ. Уг нь тэр бичлэгийг үзүүлчихвэл олон нийтэд ил болох талаасаа зүгээр юм даа.

-Ар гэрийнхэнийг нь хууль хяналтынхан дарамталсан тухай сонсогддог. Энэ үнэн үү?

-Бид маш их дарамтанд байдаг. Ээж минь 70 гарсан хөгшин Дорноговьд амьдарч байна. Тагнуулынхан дандаа очиж дарамтална. Гэр орныг нь нэгжиж, үргэлж айдастай явж ирсэн. Хар машинтай очоод хашааг нь бүсэлж зогсоод, хүмүүсийг гаргахгүй гар утаснаас бүгдийг нь шалгадаг. Ингэхээр мэдээж хэнд ч сайхан байхгүй. Т.Чимгээгийн нөхөр С.Бямбасүрэнг 14 хоног барьж хорьсон. Тэгээд мөрдөн байцаагч нар маш их дарамталсан. “Та нарыг амьдралгүй болгоно. Цементенд хийж цутгана. Эсвэл чи хэрэг хүлээчих” гэх мэт байж боломгүй дарамт үзүүлсэн. Тагнаж чагнах төхөөрөмж хүртэл байршуулсан байдаг. Нөхөр нь хорихын жорлонгийн өрөөнд эхнэртэйгээ таараад хэдэн үг сольсон байгаа юм. Т.Чимгээ “Би хэрэг хийгээгүй. Одоо яах ёстой юм бэ” гэхэд нь нөхөр нь “Миний хань битгий ай. Нэгэнт хэрэг хийгээгүй юм чинь гарч таарна” гээд хэдэн үг солилцсон гэсэн. Төдхөн нөгөө хянагч нар ирээд хөөж гаргаад, байцаагч нөхрийг нь өрөөндөө оруулаад “Чи эхнэртээ хэрэг битгий хүлээ гэж хэлжээ. Эсвэл чи хэрэг хүлээх юм уу” гээд сандлыг нь өшиглөх зэргээр дарамталсан. н.Мөнхгал, н.Бямбажав гээд байцаагч нар тэгж дарамталж байсан. Тэгснээ н.Мөнхгал нь гэнэт “За больё, найз болъё” гэсэн байгаа юм. Эхнэрийг нь хилс хэргээр барьж хорьчихоод нөхрийг нь “Найз болъё” гэж байгаа нь юу гэсэн үг үү. Ингэж доромжилж байгаа шүү дээ.

С.Бямбасүрэн байцаагчид хандаад “Би хоёр хүүхдээ хотод авч ирээд айлын хажуу өрөө хөлслөөд амьдарч байна. Ажил төрөл хийж, байр савныхаа мөнгийг төлмөөр байна. Үр хүүхдээ тэжээмээр байна. Ажилд ормоор байна. Та бүхэн өдөр болгон дуудах юм. Ажил хийж чадахгүй байна” гэхэд байцаагч нь “Тэг, тэг. Манайд ч ажилд орж болно шүү дээ” гэсэн байгаа юм. Үүнийг юу гэж ойлгох вэ. Тэр хүмүүс өөрсдөө тайлбарлах байх. Ийм дарамт, доромжлол их байсан.

-Хүний эрхийн байгууллагад хандаж байв уу?

-Хүний эрхийн үндэсний комисс, Ерөнхийлөгч, Ерөнхий сайд, УИХ-ын даргад ч хандаж байсан. Энэ хүмүүс юу гэж хэлдэг байсан гэхээр, “Энэ хэрэг нууцлалын зэрэгтэй. Мөрдөн байцаалтын шатанд байгаа учраас оролцох боломжгүй” эсвэл “Харьяаллын дагуу прокурорт ханд” гэж хариу өгдөг байсан. Би бүр аргаа бараад Эмнести Интернэшнл байгууллагад хандаж байсан. Яг ямар үүрэгтэй байгууллагыг нь мэдэхгүй ч надад туслахыг хичээж байсан.

-Прокурорын байгууллага бол энэ хэрэг батлагдаж, нотлогдсон гээд л мэдэгдээд байгаа?

-Ерөнхий прокурор М.Энх-Амгалан гэдэг нөхөр “Дөрвөн хүн шатааж алсан нь нотлогдсон. С.Зоригийг алсан нь нотлогдсон” гэж мэдэгдсэн. Гэтэл тэнд яг харуулж байгаа баримт байхгүй шүү дээ. Энэ хэргийг шалгах ажлын хэсгийн дарга Г.Эрдэнэбат, энэ хэргийг гардаж зохион байгуулсан Батжаргал, Сандаг-Очир гэж гурван прокурор бий. Энэ хэдэн прокурор юу ярьдаг гэхээр “Батлагдсан, нотлогдсон” гэдэг зүйл ярьдаг. Гэтэл хүний нүдэнд харагдах, баригдах ямар ч баримт, нотолгоо байхгүй.

МҮОНРТ-ээр гарсан С.Зоригийн хэргийн талаарх прокурорын бэлдсэн нэвтрүүлэг дээр “Эдгээр шийдсэн архичид нь нийлээд архи дарс уугаад, хэрэг төвөг хийгээд явдаг байсан” гэж гардаг. Ц.Амгаланбаатар чинь Т.Чимгээгээс олон дүү. Ц.Амгаланбаатар тухайн үед 16 настай. Т.Чимгээ чинь 20 нэлээн гарчихсан байсан. Тэгээд ч Т.Чимгээ Ц.Амгаланбаатарын бэр эгч нь шүү дээ. Тэгэхээр Т.Чимгээ насны хол зөрүүтэй дүүтэйгээ нийлээд хүн алаад явж байх уу. Нөхөрлөөд явж байх уу.

Эрдэнэтийн цагдаад Т.Чимгээ, Б.Содномдаржаа хоёрыг ямар нэгэн гэмт хэрэгт оролцож байсан тухай баримт мэдээлэл байдаггүй. Тийм нотолгоо, баримтыг прокурорууд гаргаж ирж чадаагүй. Гэтэл хэрэгт холбогдож байсан мэтээр нэвтрүүлгээр гаргасан. Мөн энэ нэвтрүүлгээр эдгээр хүмүүст “Татгалцах аргагүй санал тавьсан” гэж гардаг. Ямар санал тавьсан. Түүнийг нь хэн мэдэж байгаа юм. Батлагдсан гэдгээс өөр баримт байхгүй. Намайг дүүгээ өмөөрөөд ярилцлага өгсөний төлөө М.Энх-Амгалан прокурор “Ахыг нь шалгана” гэж байсан. Надаас юуг нь шалгах гээд байгаа юм. Эсвэл хилсээр энэ хэрэгтээ холбох гэж байгаа юм уу. М.Энх-Амгалан прокурорт хандаж хэлэхэд одоо тэр батлагдаж нотлогдсон баримтаа телевизээр үзүүлчих л дээ гэж хэлмээр байна. Тэгэхгүй бол манай үр хүүхдүүд нэг насаараа “М.Энх-Амгалан гэж хулгайч прокурор байсан” гэж ярьж явна шүү дээ.

-Нэвтрүүлгээр хэрэгтнүүдийг гэрчүүд таньсан тухай гарсан?

-Хорин жилийн өмнө байрны гадаа сууж байсан хоёр гурван эмэгтэй зургийг хараад “Энэ хүмүүс мөн байна” гэж гэрчлээд тэр нэвтрүүлэгт  яриад байгаа юм. Туршлагаас хэлэхэд нэг ангид хамт сурч байсан хүмүүс хорин жилийн дараа би биенээ танихгүй байх тохиолдол байдаг. Гэтэл байрны гадаа харсан хүнээ хорин жилийн дараа энэ хүн мөн гэж зааж байгаад яагаад ч үнэмшил төрөхгүй байгаа юм. Б.Булган гэдэг хүнийг гэрч биш гээд шүүх хуралд оруулахгүй байж яагаад гудамжинд сууж байсан хүмүүсийг нотолгоо болгож тэднийг буруутгаж байгаа юм бэ.

Б.Булганы хоригдож байхад Ц.Амгаланбаатар өрөөнд нь ороод сууж байсан сандал ширээг нь өшиглөөд “Чи бид нар С.Зоригийг алаа биз дээ. Хийгээ биз дээ” гэсэн байдаг.

-Ц.Амгаланбаатар, Б.Содном­даржаа, Т.Чимгээ нарыг Б.Булганаар таниулах ажиллагаа хийлгэсэн байдаг юм болов уу?

-Би энэ талаар Т.Чимгээгээс асуусан. Б.Булгантай таниулах ажиллагаа хийгээгүй гэсэн. Б.Бул­ганд зөвхөн Т.Чимгээ, Б.Содномдаржаа хоёрын зур­гийг л үзүүлсэн. Харин Ц.Амгалан­баатартай Б.Булганыг уулзуулсан юм билээ. Б.Булганы хоригдож байхад Ц.Амгаланбаатар өрөөнд нь ороод сууж байсан сандал ширээг нь өшиглөөд “Чи бид нар С.Зоригийг алаа биз дээ. Хийгээ биз дээ” гэсэн байдаг.

Б.Булган “Би 1998 онд ийм 16-тай хүүхэд хараагүй. Манайд ийм хүүхэд орж ирээгүй. Би эмч хүний хувьд зөвлөхөд энэ Ц.Амгаланбаатарын мэдрэлийг эмчид үзүүлээрэй. Хэвийн бус хүн байна шүү” гэж хэлсэн нь хавтаст хэрэгт байдаг гэж дүү минь хэлсэн. Тэгээд хавтаст хэрэгт Ц.Амгаланбаатарын ярьсан зүйл бүгд зөрүүтэй. Галзуу хүний өдрийн тэмдэглэл шиг юм байдаг гэсэн. Ийм учраас наад хүмүүс чинь хэргийг нууцын зэрэглэлээс гаргахгүй байна. Шүүх хурлыг нээлттэй явуулахаас айж байгаа юм. Мөн Б.Булган хэвлэлд ярилц­лага өгөхдөө “Энэ гурван хүнийг танихгүй” гэдгээ хэлчихсэн. Мөн Ц.Амгаланбаатар захидал бичсэн. “Би энэ хүмүүсийг гүтгэсэн юм. Хүн алах нь битгий хэл, хүүхэд байхдаа аймхай хүүхэд байсан. Б.Отгонбаатарынхыг шатах үед ч би Эрдэнэтэд байгаагүй” гэж захидалдаа бичсэн байна лээ. Тэгэхээр Ц.Амгаланбаатар хүн гүтгэсэн гэдгээ хүлээгээд эхэлчихлээ. Мөн тэр гэртэйгээ шатаж нас барсан Б.Отгонбаатарын эгч Хишгээ гэж хүн шүүх хуралд гэрчээр орсон. Тэр хүн шүүх хурлаас гарч ирээд л хэлсэн. “Энэ хэрэг дээр Б.Отгонбаатарыг бид шатааж алсан” гэснээс өөр ямар ч баримт алга” гэж хэлж байсан. Гэтэл тэр Б.Отгонбаатарынх шатсан дүгнэлт “Цахилгаан буруу ашигласнаас болсон” гэж гарсан.

Полиграфын шинжилгээгээр мөн таараагүй. Полиграфын шинжилгээнд Т.Чимгээг орохын өмнө унтуулахгүй шөнөжин дэглэж байгаад өглөө нь шинжилгээнд оруулах гэж авч явсан байгаа юм. Тэгээд очтол Полиграфын шинжилгээнд оруулах гэж байсан эмэгтэй нь хоёр пиво гаргаад ирсэн гэнэ. “Хоёулаа ганц ганц пиво” уучихья гэсэн байдаг. Полиграфын шинжилгээ өгөх гэж байгаа, шоронд хүн амины хэргээр хоригдож байгаа хүнд пиво гаргаж ирж байна шүү дээ. Тэгээд  Т.Чимгээ “Би уухгүй” гэсэн байдаг. Тэгэхэд “Хоёулаа вино уух уу” гэсэн байгаа юм. Энэ одоо юу гэсэн үг вэ. Шөнөжин нойргүй  хонуулаад, пиво уулгаад шинжилгээнд оруулахаар полиграфын шинжилгээ нь эерэг гардаг ч юм уу. Ямар ч байсан манай дүүд хайртайдаа тэр хүмүүс пиво гаргаж ирээгүй нь тодорхой. Энэ чинь бас нэг дарамт. Энэ бүгдийг харахад зохиомол, хилс хэрэг гэдэг нь нотлогдож байна.

-Ерөнхийлөгч асан Ц.Элбэгдорж сая мэдээдэл хийхдээ С.Зоригийн хэргийн талаар ярьсан. Та үзсэн байх. Таны байр суурийг сонирхоё?

-С.Зоригийн хэргийг яриад эхлэхээр дуугардаг хүн элбэгшиж байна. Ц.Элбэгдорж их ноцтой юм ярилаа. “С.Зоригийг алсныг харсан ганц хүн нь хэн бэ” сэтгүүлчдээс таавар асуугаад л. Гэтэл нэг нь тэндээс “Б.Булган” гээд хэлчихвүү дээ. Тэгсэн Ц.Элбэгдорж “Биш. С.Зориг өөрөө” гээд. Тэр хүн процессийг мэдэж байна шүү дээ.

Өнгөрсөн 21 жил цорын ганц гэрч нь Б.Булган гээд ярьдаг. Хавтаст хэрэгт ч тийм байгаа. Гэтэл Ц.Элбэгдорж хажууд нь өөр хүн байгаагүй гэж байна. Тэгвэл түүнээс мөрдөн байцаагч асуух хэрэгтэй байна. “Хажууд нь ганцхан хүн байсныг яаж мэдэж байна. Эсвэл тэр хүн С.Зоригийн хажууд өөрөө байсан юм уу. Би Ц.Элбэгдоржийн энэ үгнээс гурван зүйлийг харж байна.

Нэгдүгээрт, бараг алуурчин нь өөрөө байсан байх гээд байна. Алуурчинаас өөр хүн байгаагүй гээд яагаад Ц.Элбэгдорж мэдээд байна. Тэгэхээр алуурчинг харсан ганц хүнийг мэдээд байгаа нь өөрөө юм биш үү. Би тэр алуурчин нь Ц.Элбэгдорж юм биш үү гэж хэлэх гээд байна. Хоёр дахь сэжүүр нь Б.Булган гэж хүнийг юм ярьчихвий гэж хэргээс холдуулах гээд байна шүү дээ. Гуравдугаарт, эсвэл тэр алуурчинг Ц.Элбэгдорж мэддэг юм байна. Тэр хүнд нь Ц.Элбэгдорж үг хэлээд ч байгаа юм шиг. Ийм зүйл ажиглагдаж байна.

Мөн УИХ-ын гишүүн С.Эрдэнэ саяны бичлэгийг үзсэний дараа “Юун сүртэй юм. Ийм юм байж л байдаг” гэж байгаа юм. Бичлэг гараад ирэхээр өөрчлөгдөж байгаа олон хүн байна. Үнэхээр эрүүдэн шүүснийг хүлээн зөвшөөрч байна. Харин эрүүдэн шүүлт гэж хүлээн зөвшөөрөхгүй байгаа хоёр хүн нь Ц.Элбэгдорж, С.Эрдэнэ байна.

-С.Зоригийн хэрэгтэй холбоо­тойгоор н.Ганхуяг гэж хүнийг шалгасан байдаг. Тэгээд сулласан. Энэ хүн юу ярьдаг вэ?

-Манай хүргэн С.Бямбасүрэнтэй эгч дүүсийн хүүхдүүд болох н.Ганхуяг гэдэг залууг жил гаруй барьж хорьсон. Тэгээд хэвлэл мэдээллээр үг хэлэх эрхийг нь хаачихсан. Гадагшаа зорчих эрхийг нь хаасан. Ганхуяг компанийн захирал хүн. Гадагшаа ажил төр­лөөр явах эрхээ хасуулчихаад л байж байгаа юм билээ. “Алуурчдыг зөөсөн” хэргээр барьж хорьсон байдаг. С.Зоригийн хэрэгт гурван хүүхэдтэй хүүхэн, 16-тай хүү, малчин, арьс шир тушаадаг залууг барьж хорьсон байдаг. Тухайн үед Ц.Амгаланбаатар, Т.Чимгээ, Б.Содномдаржаа нар тийм л хүмүүс байсан. Эндээс хараад тагнуулынханыг би гайхдаг.

“Эрдэнэт”-ийн том захирал ийм нусан журуудтай хээр гараад архи дарс уугаад суух уу.  Үнэхээр “Эрдэнэт”-ийн захиралтай холбоотой, даалгавар авч энэ хэргийг үйлдсэн бол Т.Чимгээ хивсний үйлдвэрийн ажилтан хийгээд явах уу.

Эднээс хамгийн боловсролтой нь н.Ганхуяг байхгүй юу. н.Ганхуяг бол тагнуулынханыг байцаахад хариу үйлдэл үзүүлээд, асуудалд логик гаргаад дарамтлуулахгүй байсан болов уу. Тийм учраас энэ хүнийг жил хориод аргагүй эрхэнд сулласан гэж боддог. Гэтэл энэ Ц.Амгаланбаатар, Т.Чимгээ, Б.Содномдаржаа нар чинь хөөрхий мундаг боловсролгүй учраас эднийг дарамталж болоод байгаа байх. Тагнуулынханы чадвар нь ийм юм байна. Юун тагнуул. Сургууль төгсөөд ирсэн шинэ байцаагчаас дор ажиллаж байна. Монголын тагнуул гэж ийм дорой хүмүүс байдаг юм байна. Халзан толгойтой тарган хүмүүс бий. Сургуультай нохой шиг даалгавраар ажилладаг юм байна. Мөн Т.Чимгээгийн нөхөр С.Бямбасүрэнг энэ хүмүүстэй хамт архи уусан гэж барьсан. Шатаж нас барсан Б.Отгонбаатар, Ц.Амгаланбаатар, С.Бямбасүрэн, Эрдэнэтийн захирал байсан Ш.Отгонбилэг нарыг хамт хээр гарч архи уусан гэж Ц.Амгаланбаатар ярьсан юм билээ. Тэгээд байцаагчид “Ш.Отгонбилэг та нарт ямар даалгавар өгсөн” гээд манай хүргэнийг дарамталсан юм билээ. Ц.Амгаланбаатараар ийм зүйл зохиолгосон. Зүгээр л бодоход, “Эрдэнэт”-ийн том захирал ийм нусан журуудтай хээр гараад архи дарс уугаад суух уу. Тэгээд бас пиво ч билүү уусан гээд байдаг. Үнэхээр “Эрдэнэт”-ийн захиралтай холбоотой, даалгавар авч энэ хэргийг үйлдсэн бол Т.Чимгээ хивсний үйлдвэрийн ажилтан хийгээд явах уу. Арай өөр ажил хийнэ биз дээ. Хүн үнэмшихэд итгэмээргүй юм ярьсан улс шүү дээ. Үүнийг нь прокурор зөв байна гэж ял өгөөд, шүүх түүнийг нь батлаад явуулсан.

-Т.Чимгээг хэрэг хүлээгээгүй гэж ярьдаг. Энэ үнэн үү?

-Энэ хэрэгт холбогдсон гурван хүнээс хэрэг хүлээгээгүй ганц хүн нь Т.Чимгээ. “Надад хийсэн хэрэг байхгүй. Ямар хэрэг хүлээх юм. Нотолгоо хаана байна” гэж хэлдэг. н.Батжаргал гэж прокурор “Энэ хүн нотлох баримт нэхэж байгаа учраас хэрэг хийсэн байж таараа” гэдэг. Юу гэсэн үг юм бэ. Олон улсын шүүх практикт нотолгоо нь байж хүнийг буруутгадаг, гэм буруутайд тооцдог. Гэтэл энэ прокурорууд үнэхээр мулгуу хүмүүс юм. Энэ хэргийг илрүүл гэдэг даалгавар авсан, сургуультай нохой шиг болсон хүмүүс гэж хэлье. Энэ хэрэг дээр ажилласан тагнуул, прокурор, шүүхийн байгууллагын хүмүүст хэлэх үг алга.

-Т.Чимгээгийн охин автын ослоор нас барсан. Энэ яг юу болсон юм бэ?

-Ээжийгээ хоригдсоны дараа “Сэлэнгэд үзэж хардаг нэг сайн хүн байна” гээд очих гээд явж байгаад ослоор нас барсан. Нэг найзтайгаа хамт явж байгаад автомашинтайгаа осолдсон. Найз нь зүгээр гарсан. Манай дүү газар дээрээ нас барсан. Автомашин нь онхолдсон байдаг. Ослын шалтгааныг нэг их тоймтой юм хэлээгүй. “Жолоочийн буруугаас болсон” гэсэн ч ямар нэгэн хариуц­лага тооцоогүй өнгөрсөн. С.Бямбасүрэн одоо тэр жолооч залуутай холбоо тасарсан гэсэн. Ийм учраас энэ ослыг ч тагнуулынхан хийсэн байхыг үгүйсгэхгүй. Хүний хашаанд хүүр аваачиж тавьж байгаа хүмүүс автомашин осолдуулж чадна. Тагнуулынхан энэ ослыг үйлдсэн байхыг үгүйсгэхгүй. 

-Т.Чимгээг хэрэгт татахын өмнө хашааг нь давуулж хүний цогцос хаясан байсан. Энэ цогцос хаясан асуудал ямар учиртай байсныг тогтоосон уу?

-Нас бараад хээр тавьсан хүний шарил байсан гэж цагдаа тодорхойлсон. Хаа байсан хөдөө хээр тавьсан хүний шарилыг хэн авчирч хашааг нь  давуулж хаясан бэ гэдгийг ажлын хэсгийн ахлагч Г.Эрдэнэбат шалгах ёстой байсан. С.Зоригийн хэрэгт холбоотой хөдөлсөн чулуу болгоныг шалгах хэрэгтэй. Гэтэл ажлын хэсгийнхэн шалгаагүй. С.Зоригийн хэргийг шалгах нэрийдлээр хүмүүсийг хэлмэгдүүлж, эрүүдэн шүүснийхээ төлөө Г.Эрдэнэбат ял эдлэх ёстой. Энэ зохион байгуулалттай хилс хэргийг Г.Эрдэнэбат, Б.Хурц нар мэдэхийн дээдээр мэдэж байгаа.

Ц.Элбэгдорж ерөнхийлөгч болохдоо “С.Зоригийн хэргийг илрүүлнэ” гэж гарч ирсэн. Тэгээд Ерөнхийлөгч болсныхоо дараагаар Б.Хурцыг Тагнуулын даргаар томилсон. Ц.Элбэгдорж, Б.Хурц хоёр энэ хэргийг мэдэхийн дээдээр мэднэ. Энэ хүмүүс ямар учраас энэ хэргийг илрүүлсэн болоод хаах гэж улайрч байна. Одоо энэ хэргийн хүрээ хумигдаж байна. Шалгаад байх зүйл одоо алга. Ц.Элбэгдоржийг шалгах хэрэгтэй. Б.Хурцыг шалгах хэрэгтэй. Ямар учраас энэ хэргийг будлиантуулав. Энэ хүмүүсээ л барьж аваад шалгах хэрэгтэй дээ.

-Т.Чимгээгийн өмгөөлөгч хууль зүйн туслалцаа хэр үзүүлж ажилласан бэ?

-С.Оюунцэцэг өмгөөлөгч зохих өмгөөллийг үзүүлсэн. Гэхдээ шүүх хурал дээр өмгөөлөгч нарыг үг хэлүүлдэггүй байсан. Манай өмгөөлөгч анхан шатны шүүх хурал дээр хуулийн зүйл, заалт бичсэн бичиг баримт, цаасаа авч орох гэсэн чинь оруулаагүй. С.Оюунцэцэг өмгөөлөгч авч орно гээд маргалдаад ухаан алдаж байсан. Ийм дарамтанд өмгөөлөгч ажилласан. Тав хоног манай өмгөөлөгч байр сууриа илэрхийлж тэмцсэн. Өмгөөлөгчөөс тавьсан асуултад прокурор, тагнуулынхан няцаалт өгч чадаагүй. Тухайлбал, 1998 онд гаргасан ам зургаар С.Зоригийг хөнөөсөн хоёр хүний эмэгтэй нь өндөр, эрэгтэй нь намхан гэж зураг гаргасан. Гэтэл Т.Чимгээ 160 см өндөр. Нөгөө хоёроосоо илүү намхан шүү дээ. Энэ мэтээр баримт зөрж байгаа.

Манай өмгөөлөгч зохих ёсны хууль зүйн өмгөөлөл үзүүлсэн. Гэтэл өмгөөлөгчийг маань захиалагчаас авсан мөнгөөрөө зугаалж явна гэж бичсэн байсан. Өмгөөлөгчийн маань хүүг хүртэл хар тамхины хэрэгт холбогдуулан шалгах гэж оролдсон. Энэ мэтээр өмгөөлөгчид маань хүртэл дарамт ирж байв. Гэтэл Ц.Амгаланбаатарт тагнуулаас өмгөөлөгч томилоод өгчихсөн шүү дээ.

-Т.Чимгээтэй ойрд уулзсан уу. Эргэж амжсан уу?

-Өнгөрсөн гуравдугаар сарын 20-нд Эмэгтэйчүүдийн хорих ангид очиж эргэсэн. Биеийн байдал нь сайнгүй байна лээ. Ходоод, нойр булчирхай нь муудсан. Хоригдсоноосоо хойш хоёр ч шүдээ авахуулсан. Ц.Амгаланбаатар мэдүүлгээсээ буцсан, Ц.Нямдорж сайд асуудлыг яриад эхэллээ. Хэрэг нааштайгаар шийдэгдэхээр байгаа тухай би мэдээлэл өгсөн. Сэтгэл санаа нь сэргээд, нүд нь сэргээд ирнэ лээ. Өмнө нь эргэж очихоор “Хүрлээ ахаа, би хэрэг хийгээгүй. Хүн алаагүй. Би хэрэг хийгээгүй гэж бодохоор энэ хаалгаар таныг дагаад гармаар байна. Та намайг аваад яваач” гэж уйлдаг байсан. Одоо харин харьцангүй шударга шүүгчид арай өөрөөр шийдэх байх. Тэднийг эрүүдэн шүүсэн нь бичлэгээр тодорхой болж байна.

Дэлгэрэнгүйг "ӨГЛӨӨНИЙ СОНИН"-оос унших боломжтой!