УИХ-ын Тамгын газрын дарга Ц.Цолмон ажлаа өгөхөөр болжээ

УИХ-ын Тамгын газрын дарга Ц.Цолмон ажлаа өгөхөөр болсон байна. Түүний хувьд 2016 оны УИХ-ын сонгуулийн үр дүнгээр байгуулагдсан М.Энхболдын тэргүүлсэн парламентад Тамгын газрын даргаар томилогдсон юм.

Тэрбээр эрх зүйч мэргэжилтэй, хууль зүйн ухааны магистр зэрэгтэй. 1980-1988 онд нийслэлийн 52 дугаар дунд сургууль, 1988-1992 онд ОХУ-ын Омск хотод технологийн техникум, 1994-1998 онд МУИС-ийн Хууль зүйн дээд сургуулийг эрх зүйн мэргэжлээр төгсөж, 2001-2003 онд Их Британийн Эксетерийн их сургуульд хууль зүйн мастер, 2013-2014 онд АНУ-ын Колумбын их сургуульд хууль зүйн мастер тус тус хамгаалсан. 1993-1994 онд Улсын Их Хурлын Тамгын газарт компьютерийн операторч, 1998-2001 онд МУИС-ийн Хууль зүйн дээд сургуульд багш, 2004-2013 онд Хууль зүй, дотоод хэргийн яаманд Хууль зүйн бодлогын газрын дарга, 2011-2016 онд Монголын өмгөөлөгчдийн холбоонд өмгөөлөгчөөр тус тус ажиллаж байсан ажлын дадлага туршлага өндөр хэмээн олны талархлыг хүлээж байсан юм.

Ц.Цолмонг маргааш /2019.05.07/ хуралдах Төрийн байгуулалтын байнгын хорооны хуралдаанаар чөлөөлөх асуудлыг хэлэлцэн, пүрэв гаригийн чуулганы нэгдсэн хуралдаанаар эцэслэх юм байна.

Тэгвэл түүний оронд одоо УИХ-ын дарга Г.Занданшатарын ахлах зөвлөхөөр ажиллаж байгаа Л.Өлзийсайханыг томилуулахаар болжээ. Л.Өлзийсайхан нь одоогийн Тамгын газрын дарга Ц.Цолмонгийн ангийн хүүхэд аж.