Оюутолгойн шалгалтын НУУЦ МАТЕРИАЛ гишүүдээс түрүүлж "РИО ТИНТО"-д очжээ

Өнгөрсөн долоо хоногт “Оюутолгой” төслийн 66 хувийг эзэмшдэг “Рио тинто” компани Засгийн газар болон парламентад хандаж мэдэгдэл гаргасан билээ. Тэд мэдэгдэлдээ Оюутолгойн хөрөнгө оруулалтын гэрээнд нэг ч цэг, таслалын өөрчлөлт оруулахгүй гэдгээ хатуу илэрхийлсэн нь өнөөдөр олон нийт төдийгүй улстөрчдийн анхаарлыг зүй ёсоор татаж байна.

Тэгвэл “Рио тинто”-гийн энэхүү гэнэтийн мэдэгдэл нь УИХ-ын даргын захирамжаар байгуулагдсан Оюутолгой ордын хөрөнгө оруулалтын гэрээний хэрэгжилтийг шалгах Ажлын хэсгийн “нууц материал”-уудыг гартаа оруулсантай холбоотой гэж гишүүд тайлбарлаж байна.  

Уг нь, УИХ-ын Эдийн засгийн байнгын хорооны өчигдрийн хуралдаанаар гишүүд Оюутолгой ордын хөрөнгө оруулалтын гэрээний хэрэгжилтийг шалгах Ажлын хэсгийн явцын мэдээллийг сонсохоор төлөвлөөд байсан юм. Харамсалтай нь, Ажлын хэсгийн дүгнэлт байнгын хорооны гишүүдийн ширээн дээр ирэхээсээ өмнө “Рио тинто”-гийн удирдлагуудын гарт очсон нь хуралдааныг ирэх долоо хоног хүртэл хойшлуулах шалтгаан болов.

Энэ талаар УИХ-ын гишүүн Х.Болорчулуунаас тодруулахад “Д.Тэрбишдагваар ахлуулсан 11 гишүүний бүрэлдэхүүнтэй Ажлын хэсэг хуралдаж байж эцсийн дүгнэлтээ гаргах ёстой. Гэтэл хуралдаагүй, бид гарын үсгээ зураагүй. Явц дунд нь УИХ-ын Эдийн засгийн байнгын хорооноос шалгалтын тайланг “Рио тинто”-д хүргүүлчихсэн юм шиг байна. Дүгнэлт эцэслэж гараагүй байхад тэдэнд өгөх ёсгүй” гэсэн бол УИХ-ын гишүүн Г.Тэмүүлэн “Байнгын хорооны гишүүдээс Ажлын хэсгийн шалгалтын дүгнэлтийг хэн “Рио тинто”-д хүргүүлсэн гэдгийг асуулаа. Тэгэхэд УИХ-ын Эдийн засгийн байнгын хорооноос өнгөрсөн баасан гарагт хүргүүлсэн гэх тайлбарыг өгч байна. Энэ бол Монгол төрийн бодлогын хувьд маш том алдаа. Цаашид анхаарах шаардлагатай” гэх байр суурийг илэрхийлж байна.

Харин УИХ-ын Эдийн засгийн байнгын хорооны даргаар Д.Дамба-Очир гишүүн ажилладаг. Тэрбээр өнгөрсөн долоо хоногт УИХ-ын дарга Г.Занданшатарын даалгавраар “Рио тинто”-гийн удирдлагуудтай уулзсан байдаг.

Энэ асуудлыг нь Д.Дамба-Очироос өнгөрсөн даваа гарагт лавлахад “УИХ-ын даргын өгсөн үүргийн дагуу өнгөрсөн долоо хоногт “Рио Тинто”-гийн удирдлагуудтай уулзсан. Тэд гэрээнд өөрчлөлт оруулахгүй гэдэг зүйлийг ярьж байгаа нь үнэн. УИХ-аас асуудлыг шийднэ. Байнгын хороо болон парламентаас тогтоолын шийдвэр гарч байж, үүрэг чиглэл өгнө. Тэр дагуу ширээний ард суух ёстой гэдгийг хэлсэн. Хөрөнгө оруулалтын гэрээг УИХ-аас баталсан. Тиймээс УИХ л шийдэх ёстой. Харин "Рио тинто"-гийн удирдлагуудад шалгалтын эцсийн хувилбар очоогүй байгаа” гэх тайлбарыг өгсөн билээ.

Харин тэрбээр өчигдөр УИХ-ын Эдийн засгийн байнгын хорооны хуралдаандаа оролцоогүй, түүний оронд байнгын хорооны хуралдааныг УИХ-ын гишүүн Б.Баттөмөр ахалж байлаа. Ямартай ч УИХ-ын даргын захирамжаар байгуулагдсан Оюутолгой ордын хөрөнгө оруулалтын гэрээний хэрэгжилтийг шалгах Ажлын хэсгийн дүгнэлт байнгын хорооны гишүүдийн гарт ирэхээсээ өмнө “Рио тинто”-гийн удирдлагуудын ширээн дээр очсон нь тэдэнд давуу тал олгосон байхыг үгүйсгэхгүй. Энэ ч утгаараа олон нийт төдийгүй улстөрийн хүрээний анхаарлыг зүй ёсоор татаж эхэллээ.