"Халдашгүй бүрэн эрх"-ээ ХУУЛЬ, ШҮҮХЭД НӨЛӨӨЛӨХ ХЭРЭГСЭЛ гэж эндүүрэв үү?!

-Манай “поп” хоёрт Б.Содномдаржаа, Т.Чимгээ нарыг хуулийн дагуу суллуулах хүсэл байхгүй бололтой. Харин ч эсрэгээрээ хүч түрж, УИХ-ын гишүүнийхээ халдашгүй бүрэн эрхээрээ бамбай хийгээд ч болтугай ард түмнээс "ок" үнэлгээ авахаар улс төрийн ээлжит "жүжиг"-ээ үргэлжлүүлж байна-

Өнөө цагт “Эр хоёр загал” гэх үг УИХ-ын гишүүн Ж.Батзандан, Л.Болд хоёрт яв цав тохирчээ. Нэг нь намаа голсон, нөгөө нь намаасаа хөөгдсөнийг эс тооцвол мань хоёрын улс төрийн “тоглолт” нь нэгнээсээ илүү ч үгүй, дутуу ч үгүй ижилхэн гэж хэлж болохоор. Өөрөөр хэлбэл, тэд хоёулаа ард түмнээсээ “ок” үнэлгээ авахын тулд ямар сэдвээр улс төр хийхээ ойлгодог, түүнийгээ парламентын танхимд ч тэр, гэр хорооллын гудамжинд ч тэр хэрхэн дэглэхээ мэддэг “поп” улстөрчид юм. 

Тэгвэл парламентын сөрөг хүчин болох АН-аас өрх тусгаарлаж хамтдаа шинэ нам байгуулсан УИХ-ын гишүүн Ж.Батзандан, Л.Болд хоёрын ард түмнээсээ “ок” үнэлгээ авах ээлжит бай нь төр, нийгмийн нэрт зүтгэлтэн С.Зоригийг хөнөөсөн хэргээр гурван шатны шүүхээс ял авсан Б.Содномдаржаа, Т.Чимгээ нар гэдэг нь нэгэнт ил болсон билээ.

Тэд эрүүдэн шүүлгүүлж, хилс хэрэг хүлээсэн гэх Б.Содномдаржаа, Т.Чимгээ нарыг хорих ангиас цаг алдалгүй суллахыг шаардаж байгаа гэхээс илүүтэй эрүүдэн шүүж байгаа бичлэгийг үзсэн олон нийт хүсэж байгаа юм. Ард иргэдийн энэхүү “хүсэл”-ийг мэдэрсэн мань хоёр хэн бүхнээс илүү Б.Содномдаржаа, Т.Чимгээ хоёрыг хорих ангиас суллуулж, гавьяаг нь үүрэх хүслээ дотроо тээж явна.

Ямар сайндаа хоёрхон хоногийн өмнө Ж.Батзандан, Л.Болд нар Улсын Дээд шүүхэд хорих ангийн эмнэлэгт хэвтэн эмчлүүлж байгаа Б.Содномдаржаа, Т.Чимгээ нарыг суллах шаардлагыг хүргүүлсэн байдаг. Тэд үүнийгээ "УИХ-ын даргын захирамжаар байгуулагдсан С.Зориг агсны амь насыг хөнөөсөн хэргийг судалж, дүгнэлт гаргах үүрэг бүхий Түр хорооны судалгааны явцад шинэ нөхцөл байдал үүссэн. Б.Содномдаржаа, Т.Чимгээ нарыг суллах ёстой. Энэ хоёр хүнд эрүүдэн шүүх замаар С.Зориг агсны амь насыг хөнөөсөн хэргийг хүлээлгэсэн тул шүүхийн шийдвэр хүчин төгөлдөр бус гэж үзэх үндэслэлтэй" гэж тайлбарлаж байгаа юм. 

Тэгвэл Монгол Улс өөрийн гэсэн хууль, журамтай. Тэрхүү хууль, журмынх нь хүрээнд төр, нийгмийн нэрт зүтгэлтэн С.Зоригийг хөнөөсөн хэргээр гурван шатны шүүхээс ял сонссон Б.Содномдаржаа, Т.Чимгээ нарыг суллах ёстой гэдгийг хуульчид төдийгүй олон нийт хэлж байна.

Тийм гаргалгаа байгаа гэдгийг нь Хууль зүй, дотоод хэргийн сайд Ц.Нямдорж нь хүртэл ам алдсан билээ. Тэрбээр "Хуулийн талаас нь Б.Содномдаржаа, Т.Чимгээ хоёрыг суллах боломж бий. Нэгэнт эрүүдэн шүүсэн нь ил болсон болохоор Улсын Ерөнхий прокурор, эсвэл Улсын Дээд шүүхийн Ерөнхий шүүгч эсэргүүцэл бичих эрхтэй" гэж ярьсан байдаг.

Харамсалтай нь, манай “поп” хоёрт Б.Содномдаржаа, Т.Чимгээ нарыг хуулийн дагуу суллуулах хүсэл байхгүй бололтой. Харин ч эсрэгээрээ хүч түрж, УИХ-ын гишүүнийхээ халдашгүй бүрэн эрхээрээ бамбай хийгээд ч болтугай ард түмнээс "ок" үнэлгээ авахаар улс төрийн ээлжит "жүжиг"-ээ үргэлжлүүлж байна. УИХ-ын гишүүн гэхээрээ өөрт таалагдахгүй зүйлийн эсрэг жагсаал, цуглаан хийх замаар хууль, шүүхэд нөлөөлж болохгүй байлтай. Үүнийг УИХ-ын гишүүн Ж.Батзандан, Л.Болд хоёр мэдэхийн дээдээр мэдэж байх ёстой. Эсвэл мань хоёр УИХ-ын гишүүний халдашгүй бүрэн эрхээ хууль, шүүхэд нөлөөлөх хэрэгсэл гэж эндүүрээд явж байна уу?!.