М.Энхсайханы илтгэлээс ОНЦЛОХ 10 ЭШЛЭЛ

Ерөнхий сайд асан М.Энхсайхан өчигдөр /2019.07.03/ "Олон түмэн яагаад эдийн засгийн буруу бодлого сонгодог вэ?" сэдвээр илтгэл тавьсан билээ. Тус илтгэлийн голлох 10 эшлэлийг хүргэж байна. 

1

Ардчилсан хувьсгалаас хойш Монгол Улсад болсон олон үйл явдлаас хоёр том асуудлыг би онцолмоор байна. Нэг нь ардчилал, нөгөөх нь зах зээл. Энэ хоёр ойлголт өөр хоорондоо уялдаатай ч ижилхэн зүйл биш юм.

2

Зовлон бэрхшээл дундуур туулж байж зах зээл гэдэг ойлголт Монголд нутагшсан юм. Зах зээлийн сэтгэлгээ хэр баттай нутагшсныг өнөөдөр харах үлдэж байна.

3

ОХУ, БНХАУ-ыг хуулбарлан дууриах шаардлага огтоос байхгүй. Ардчиллыг дарангуйлал руу чирснээр хөгжил ирэхгүй.

4

Сонирхлын бүлгээрээ овог аймаг болох нь ардчилсан нийгэмд байх ёстой үзэгдэл юм. Харамсалтай нь энэхүү сэтгэлгээ нам дамнасан МАНАН үзэгдлийн сэтгэлгээний суурь дэвсгэр болсон байна.

5

Өнөөдөр Монголын нийгэм улс төрийн намууд гэхээсээ илүүтэй нутгийн зөвлөл, бөх, уяачид, хошин шог, мото, мотоциклын холбоо зэргээр овог аймагт задарсан юм шиг санагддаг.

6

Овгийн сэтгэлгээ давамгайлж буй нийгэмд юун том улс төр ярих. Тийм юм ярьж байгаа хүмүүс бүгд тэнэг, сэтгэлгээний өвчтэй болж харагддаг.

7

Жирийн сонгогчид зах зээл, чөлөөт худалдааны талаар тун өнгөц ойлголттой. Нүүдэлчин Монголчуудын хувьд аливаа зүйлийг тэмтэрч үзэхээс нааш юмсыг ойлгодоггүй байдал нь нөхцөл байдлыг улам хүндрүүлж буй.

8

Хувийн хэвшлийн компаниуд нэг өдөр л том томоор ашиг хийж байгаа мэт иргэд гэнэн төсөөлөл төөрөгдөлтэй байдаг. Тиймээс хувийн хэвшлийг буруушаах, бизнес эрхэлж л байгаа бол хулгайч гэж харах буруу хэвшмэл ойлголт нийгэмд бий болдог.

9

Монголд популизм оройн дээд Очирваань болчихоод байна. Популизм бол цэгцэрсэн үзэл баримтлал биш. Тун нимгэн хөрстэй хийрхэл. Популистууд худалч. Худал ярихдаа сэтгэл нь ч өвдөхгүй.

10

Популизмыг буруушааж сонгогчдын боловсролыг дээшлүүлэх асуудал чухал байна. Намууд үзэл баримтлалдаа анхаарч Улстөрийг зах зээлтэй нь номолдог болох хэрэгтэй байна.