А.Сүхбат: Стратегийн ордыг томоохон хэмжээний эрдсийн нөөц гэсэн монгол үгээр орлуулъя

УИХ-ын 2019 оны ээлжит бус чуулганы нэгдсэн хуралдаан үргэлжилж байна. Хуралдаанаар Монгол Улсын Үндсэн хуульд оруулах нэмэлт, өөрчлөлтийн төсөл, ард нийтийн санал асуулгад оруулах төслийн нэг дэх хэлэлцүүлгийг хийж байна.

Хэлэлцэж буй асуудлыг өчигдөр Төрийн байгуулалтын байнгын хороо хэлэлцсэн бөгөөд Үндсэн хуулийн 6.2 дахь хэсэгт “Стратегийн ач холбогдол бүхий ашигт малтмалын ордыг ашиглахдаа байгалийн баялаг ард түмний мэдэлд байх зарчимд нийцүүлэн түүний үр өгөөжийн дийлэнх нь ард түмэнд ноогдож байх эрх зүйн үндсийг хуулиар тогтооно” гэж нэмэхээр саналын томьёоллыг боловсруулсан тухай хэлэлцсэн. Хэлэлцүүлгийн явцад байнгын хорооны дарга С.Бямбацогт “үр өгөөж” гэдэгт татвар хураамж, төлбөр, ногдол ашиг бүгд орно гэж өргөн утгаар нь ойлгоно гэж тайлбарласан. “Дийлэнх” гэдгийг 50+1 гэдэг байдлаар томьёолсон гэдгийг тайлбарлаж байв.

Хэлэлцэж буй асуудалтай холбогдуулан УИХ-ын гишүүн А.Сүхбат “Уул уурхайтай холбоотой асуудал дажин боллоо. Тиймээс Үндсэн хуульдаа энэ зүйл заалтыг оруулах ёстой. Стратегийн гэдэг ойлголтыг ойлгох ёстой. Цэрэг армийн хөдөлгөөн, чиглэлийн удирдлага гэсэн утгатай грек үг. Тиймээс гадаад үгийг Үндсэн хуульдаа оруулж явах нь хэцүү. Томоохон хэмжээний эрдсийн нөөц орд гэсэн монгол үгээр орлуулж болж байна. Томоохон ордын ашиглахдаа Монголын ард түмнийг гэрээндээ оруулах уу. Ноён уулаар жишээлэхэд эцэг өвгөдийнхөө булш бунхныг ухдаг улс орон гэж байх уу. Энэ зүйл заалтыг төгс болсон гэж хэдэхгүй. Гэхдээ уул уурхайтай холбоотой заалтыг УИХ-ын гишүүд маань дэмжиж өгөөрэй” хэмээв.

Үүнд байнгын хорооны дарга С.Бямбацогт “Байгалийн баялагт самар жимс ороод явчих учраас бид газрын хэвлийн баялаг гэж зориуд оруулсан. Стратеги гэдэг үг нь алсын хараа, хэтийн бодлого гэдэг агуулгаар ойлгогддог. Бид алсын хараа, бодлого гэдэг агуулгаар ойлгоод сурсан. Ингэж ойлгоорой” хэмээн хариу тайлбар хийлээ.

Чуулганы хуралдаан үргэлжилж байна.