Польшийн цагдаагаас 69 биш 43 дипломатчийг эрэн сурвалжилж байгаа гэв

УИХ-ын гишүүн Т.Аюурсайхан өнгөрсөн мягмар гарагт Польшийн цагдаагийн байгууллагаас эрэн сурвалжилж байгаа Монгол Улсын 69 дипломатчийн нэрийг ил болгосон билээ. Үүнтэй холбогдуулан Гадаад харилцааны яамны Төрийн нарийн бичгийн дарга Д.Даваасүрэн байр сууриа илэрхийлэв.

Тэрбээр “БНАСАУ-д суугаа Онц бөгөөд Бүрэн эрхт Элчин сайд С.Цоггэрэлийг  эргүүлэн татахаар Ерөнхийлөгчид хандсан. Польшийн цагдаагийн газраас гаргасан 69 иргэнээс 43 нь одоог хүртэл эрэн сурвалжилж байгаа мэдээлэл гарсан. Хоёр улсын цагдаагийн газар хамтарч ажиллаж байна. Хилийн чанадад суугаа төлөөлөгчдийн газруудын ажилтнуудаас шээсний шинжилгээ авч, хар тамхи хэрэглэсэн эсэхийг шинжилдэг. Одоогоор дипломат албанд ажиллаж байгаа хүмүүс хууль бус наймаанд оролцсон зүйлгүй. Гэхдээ нэр холбогдсон хүмүүсийг ажлаас нь чөлөөлж байгаа” гэх тайлбарыг өглөө.