Б.Чойжилсүрэн сайд байхдаа нийгмийн даатгалын шимтгэл нэмэх шийдвэрийг гаргажээ   

УИХ-ын гишүүн, Төсвийн байнгын хорооны дарга Б.Чойжилсүрэн өнөөдөр /2019.11.12/ нийгмийн даатгалын шимтгэлийг ирэх оноос нэмэгдүүлэх болсон асуудлаар мэдээлэл өглөө.

Тэрбээр “Нийгмийн даатгалын сангийн орлогыг 20 хувь байсныг 25 хувь болгож нэмэгдүүлсэн. Энэ шийдвэрийг би Сангийн сайд байхдаа УИХ-ын нэгдсэн чуулганд оруулж шийдвэрлүүлсэн. Валютын сантай хөтөлбөр хэлэлцэж байх үед гаргасан шийдвэр. Бодит үнэнээ ард түмэндээ хэлчих хэрэгтэй байх гэж бодож байна. Тэтгэврийн сан жилд 600 тэрбум төгрөгийн татаас авна. Энэ жил ч тэр, ирэх жил ч тэр тэгж авна. Энэ өөрчлөлтийг хийхгүй бол 4-5 жилийн дараагаас их наяд төгрөгийн татаас авах болчихоод байгаа юм” гэв.

Түүнчлэн “Тэтгэврийн сан өөрөө хэсэгхэн хугацааны дараа дампуурчих магадлалтай учраас нийгмийн даатгалын тэтгэврийн сангийн орлого бүрдэхгүй байна. 1960-1970 онд төрсөн хүмүүс тэтгэвэрт гарч эхэлнэ. Тэгэхээр нэг ажил хийж байгаа хүнд ноогдох тэтгэвэр авагчийн хэмжээ ойрын хугацаанд нэмэгдэх юм. Гашуун ч гэсэн үнэн. Эрсдэлтэй байдал цаашид нэлээд хэдэн жил үргэлжлэхээр байна. Эдийн засаг сайжраад сайхан болсон зүйл байхгүй. Нийгмийн даатгал төлөгч өөрөө 12.5 хувь, байгууллага 12.5 хувь, нийлээд 25 хувь төлөхөөр болж байгаа юм. Эргээд үүнийг буулгах боломжгүй" хэмээн тодотголоо.