С.Чинзориг: Нийгмийн даатгалын сангийн алдагдлыг нөхөхийн тулд шимтгэлийг нэмнэ

УИХ-ын чуулганы өнөөдрийн /2019.11.13/ нэгдсэн хуралдаан үргэлжилж байна. Хуралдаанаар яг одоо Монгол Улсын 2020 оны төсвийн төслийн гурав дахь, дөрөв дэх хэлэлцүүлгийг хийж байна. Хэлэлцэж байгаа асуудалтай холбогдуулан гишүүд байр сууриа илэрхийлж байна.

Тухайлбал, УИХ-ын гишүүн О.БААСАНХҮҮ "Нийгмийн даатгал яагаад нэмэгдэв. Аж ахуйн нэгжүүд нийгмийн даатгалын хувь нэмэхэд цалингаа багасгана гэж ярьж байна. Цалин, тэтгэвэр нэмнэ гэсэн. Тэгсэн хэрнээ татвараар авчихаар өөрчлөгдөхгүй юм биш үү. Сонгуулийн амлалтаа жаахан ч гэсэн биелүүлэх хэрэгтэй байна. Засгийн газар, төрийн албан хаагчдаас болж нийгмийн даатгалын төлөх хувийг нэмж байна гэж ойлгогдож байна. Ард түмэнд хялайлгах юм алга уу, эсвэл төсөвт тодотгол хийх нь үү. Хэнээс болж ийм нөхцөл байдалд орчихов оо" гэв. 

УИХ-ын гишүүн Б.ЧОЙЖИЛСҮРЭН "Засгийн газар төсвийн төсөлд нэмнэ гэсэн хуучин шийдвэрийг тэр чигээр нь оруулж ирсэн байна. Хоёр сайд байгаа болохоор нэмж хариулах байх гэж бодож байна" гэхэд Хөдөлмөр, нийгмийн хамгааллын сайд С.ЧИНЗОРИГ "Нийгмийн даатгалын сан алдагдалтай ажилладаг. Энэ онд гэхэд улсын төсвөөс 600 тэрбум төгрөгийн санхүүжилт, татаас авч байж үйл ажиллагаа явуулж байна. Нийгмийн даатгалын сангийн алдагдлыг бууруулахын тулд нийгмийн даатгалын шимтгэлийг нэмэх асуудлыг оруулж ирж байна. Зөвхөн энэ аргаар алдагдлыг бууруулна гэсэн бодлого бариагүй. Нийгмийн даатгалын хүрээг өргөжүүлэх шаардлагатай гэж үзэж байна. Ирэх оноос малчид, хувиараа хөдөлмөр эрхлэгчдийн нийгмийн даатгалаа нөхөн төлөх хуулийг хэрэгжүүлнэ. Цаашид нийгмийн даатгалын шимтгэлийг нэмэхгүйгээр хамрах хүрээг нь тэлнэ гэсэн бодолтой байна" гэх хариултыг өглөө.