Ёс зүйн дэд хороо хаалттай хуралдаж байна

УИХ-ын Ёс зүйн дэд хороо өнөөдөр /2020.01.21/ хуралдаж байна. Хуралдаанаар зарим гишүүний хөрөнгө орлогын мэдүүлгийг хянан шалгасан тухай асуудлыг хаалттай хэлэлцэхээр төлөвлөжээ. Хуралдааныг УИХ-ын гишүүн Б.Бат-Эрдэнэ даргалав. 

“Бид уучлахгүй хөдөлгөөн” төрийн бус байгууллагаас өнгөрсөн оны есдүгээр сарын 24-ний өдөр Улсын Их Хурлын нэр бүхий гишүүдийн хөрөнгө орлогын мэдүүлгийг шалгах тухай хүсэлтийг тус дэд хороонд ирүүлсэн. Мөн Авлигын эсрэг хуулийн 13.2-т “Улсын Их Хурлын гишүүний хөрөнгө, орлогын мэдүүлгийг Улсын Их Хурлын Ёс зүйн дэд хороо, энэ хуулийн 11.1.2-т заасан хөрөнгө, орлогын мэдүүлгийг Улсын Их Хурлын Хууль зүйн байнгын хороо тус тус өргөдөл, гомдолд үндэслэн шалгах бөгөөд эрүүгийн хариуцлага хүлээлгэх зөрчил илэрвэл зохих байгууллагад шилжүүлнэ” гэж заасныг өөрчилж, Улсын Их Хурлын гишүүдийн хөрөнгө орлогын мэдүүлгийг шалгах эрхийг Авлигатай тэмцэх газарт өгөх нь зүйтэй гэдэг байр сууриа илэрхийлсэн байна.

Харин Ёс зүйн дэд хорооны 2019 оны аравдугаар сарын 16-ны өдрийн хуралдаанаар уг хүсэлтийг хэлэлцээд Улсын Их Хурлын нэр бүхий гишүүдээс холбогдох тайлбар, мэдээллийг авах, судалж дүгнэх нь зүйтэй хэмээн үзэж, Улсын Их Хурлын гишүүн Г.Тэмүүлэнг томилсон юм.

Дэд хорооны хуралдаанаар хэлэлцэх асуудалтай холбогдуулан Улсын Их Хурлын гишүүдийн нэр төртэй холбоотой асуудал яригдахаар болж буй учраас асуудлыг хаалттай хэлэлцэх горимын саналыг УИХ-ын гишүүн гишүүн Х.Баделхан гаргасныг дэд хорооны хуралдаанд оролцсон гишүүдийн олонх нь дэмжсэн тул хуралдааныг хаалттай горимд шилжүүллээ.