И.Мөнхжаргал: АН-ын даргыг солино гэдэг ташаа мэдээлэл

АН-ын Үндэсний бодлогын хорооны 15 дугаар хурал үргэлжилж байна.

Хуралдаанд тус намын Үндэсний бодлогын хорооны 400 гаруй гишүүн цахимаар оролцож байгаа юм. Тэд өнөөдөр /2020.05.16/ хуульд заасны дагуу УИХ-ын 2020 оны ээлжит сонгуульд намаа төлөөлж өрсөлдөх нэр дэвшигчдээ албан ёсоор тодруулна.

АН-ын Дотоод сонгуулийн хорооны дарга И.Мөнхжаргал дараах мэдээллийг өглөө. 

Тэрбээр "АН-ын ҮБХ-ны 15 дугаар хуралдаан түр завсарлаад байна. Сонгон шалгаруулах хороо хуралдахаар завсарласан. Сонгон шалгаруулах хороо хуралдаж, нэр дэвших хүмүүсийн нэрсийг сонгуулийн хороонд ирүүлэх үүрэгтэй.

Монгол Улсын Их хурлын сонгуулийн тухай хууль дээр тодорхой зааж өгсөн байгаа. Нэр дэвшигчийг намын төлөөллийн төв байгууллага нууцаар санал хурааж тодруулна гэж. Энэ бэлтгэл ажлыг дотоод сонгуулийн хороо хангаж, нэрсийг оруулж ирэхээр саналын хуудсыг хэвлэлтэд өгч, коронавирустэй холбоотойгоор нэг дор олон хүн цуглуулахгүйгээр ҮБХ-ны гишүүдээ тодорхой цагийн хуваарийн дагуу тав таваар нь ирүүлж, нууцаар санал хураалгахаар зохицуулж байна.

ҮБХ-ны 410 гишүүн байдаг. Яг одоогийн байдлаар 316 хүн санал өгөхөөр мандатаа аваад байна. Мэдээж санал хураалтын үед мандатаа нэмж аваад, санал хураалтдаа оролцох боломжтой.

Бид бол саналын дүнг ҮБХ-нд мэдүүлдэг үүрэгтэй. Нэр дэвшигчээ зарлах нь ҮБХ-ны бүрэн эрхийн асуудал. Тиймээс хуралдаан завсарлаад орж ирэхээрээ нэр дэвшигчээ зарлах эсэхээ шийдэх байх.

Өнөөдөр анхаарлыг өөр хүн рүү чиглүүлэх, улс төрийн янз бүрийн үйл явдал өрнөж байна. Мэдээж бодит байдал дээр намын даргыг өөрчлөх боломжгүй. Дүрмийн хувьд ч АН-ын бүх гишүүдээр сонгогдсон даргыг ҮБХ авч хэлэлцэх эрхгүй. Энэ бол өрсөлдөгч намуудаас анхаарлыг сарниулж байгаа тоглоом. Дүрмэндээ АН-ын дарга сонгуулийн үр дүнгээр, эрүүл мэндийн шалтгаанаар, эсвэл өөрөө хүсэлтээ өгсөн тохиолдолд гэсэн энэ гурван шалтгаанаар л чөлөөлөгдөх ёстой. Аливаа нэг хуралдаанаар санал оруулж, энэ асуудлыг шийдэх ямар ч боломж байхгүй. Иймэрхүү зүйл сонгууль дөхсөн энэ үед олон удаа гарна. АН-ын даргыг солино гэдэг бол ор үндэслэлгүй, ташаа мэдээлэл" гэж мэдээлэв.