С.Жавхлан намынхаа Үндсэн дүрмийг зөрчиж, НЭР ДЭВШИХ ЭРХ өвөртөлжээ 

Өнгөрсөн 2016 он бол С.Жавхлангийн хувьд жинхэнэ "од" нь гийсэн жил байлаа. Учир нь, тэрбээр УИХ-ын 2016 оны ээлжит сонгуульд Баянзүрх дүүрэгт бие даан нэр дэвшиж, ялалт байгуулснаар парламентын гишүүн болсон билээ. Түүний төр түшилцсэн өнгөрсөн дөрвөн жилийн хугацаанд хийсэн ажлыг нь ганцхан өгүүлбэрээр дүгнэж болно. Тэр бие дааж ямар ч хууль санаачлаагүй, бараг л УИХ-ын гишүүнийхээ ажлыг хийгээгүй. Ямар сайндаа л ялалт байгуулсан тойргийнхоо сонгогчдын царайг харах нүүргүй болж, УИХ-ын 2020 оны ээлжит сонгуульд тойргоо сольж, төрсөн нутгаа түшиж байх вэ дээ. 

Хэдийгээр УИХ-ын гишүүн С.Жавхлан өнгөрсөн дөрвөн жилийн хугацаанд нэг ч хууль бие дааж санаачлаагүй ч хувь улстөрчийнхөө хувьд багагүй "тоглолт" үзүүлсэн байх юм.

Өнөөгийн парламентын ганц бие даагч байсан тэр өнгөрсөн нэг жилийн хугацаанд намаас нам дамжин явжээ. Тухайлбал, 2019 оны есдүгээр сард МАХН-ын дарга Н.Энхбаярыг түшиж байсан бол тухайн оныхоо тавдугаар сард Ж.Батзандан, Л.Болд нарын байгуулсан Шударга иргэдийн нэгдсэн эвсэл намыг сонгож, гишүүнээр нь элсэж байлаа.

Хэрэв уншигчид санаж байгаа бол тухайн үедээ УИХ-ын гишүүн С.Жавхлан "Өнгөрсөн хугацаанд олон иргэнээс санал ирсэн. Шударга, зөв гишүүдтэй хамтарч ажиллахыг санал болгож байсан. Улс төрийн хувьд ганцаардаж байгааг иргэд ойлгож байгаагаа хэлсэн. Би ганц хүн айл болдоггүй гэдгийг өнгөрсөн хугацаанд хүчтэй мэдэрлээ. Улс төрд ганцаардал гэдэг хэцүү зүйл байдаг юм байна. Нэг талдаа нийгмийн захиалга. Нөгөө талдаа эдгээр гишүүн надад удаа дараа санал тавьсны дагуу би удаан хугацаанд бодож судалсны эцэст тулгын гурван чулуу болж, Монголдоо үнэний галыг бадраахаар нэгдлээ. Цаашдаа олон ажил хийх болно гэдгийг батлан хэлье” хэмээн ярьж байв.

Гэвч тэр намаас нам дамжиж явсаар эцсийн сонголтоо АН-ын дарга С.Эрдэнэтэй гар барьж, түүнийг түшсэн. Түүнийгээ ч ил тод зарлаж, танхимын ширээний анд О.Баасанхүүтэйгээ хамт АН-д элссэн билээ.

Түүгээр ч зогсохгүй тойргоо сольж, Увс аймагт АН-аас нэр дэвших эрхийг өвөртлөөд байна. Харамсалтай нь, АН-ын дарга С.Эрдэнэ намынхаа үндсэн дүрмийг зөрчиж, түүнд нэр дэвших эрхийг олгожээ. Өөрөөр хэлбэл, УИХ-ын гишүүн С.Жавхлан АН-ын гишүүн болсон даруйдаа намынхаа Үндсэн дүрмийг зөрчсөн гэж хэлж болно. Учир нь, АН-ын Үндсэн дүрмийн гуравдугаар бүлгийн 3.6.1.3-т "Намын дотоод болон намаас төрийн сонгуульд нэр дэвшигч нь зургаан сарын өмнө намд элссэн байна" гэж заасан байдаг. Харин УИХ-ын гишүүн С.Жавхлан АН-д элсээд сар ч болоолгүй Увс аймагт нэр дэвших мандатаа С.Эрдэнэ даргаасаа гардсан билээ.

Улс төрийн мэдлэг маруухан С.Жавхлан мэтийн ганц нэг хүнээр олон мянган дэмжигчдийнхээ баримталж ирсэн дүрмийг "гишгүүлнэ" гэдэг энэ сонгуулийн өмнөх этгээд нүүдлийн нэгээр нэрлэгдэж болох байх.