МОНГОЛБАНК: Банк, санхүүгийн байгууллагын нэгдэл үүсэх нь хэвийн үйл явдал

Худалдаа хөгжлийн банк, Улаанбаатар хотын банк нэгдсэнтэй холбоотойгоор Монголбанкнаас дараах мэдээллийг өгч байна.

Монгол Улсын банкны салбарын нөлөө бүхий банкууд болох Худалдаа, хөгжлийн банк, Улаанбаатар хотын банкууд нэгдэх шийдвэр гаргалаа. Худалдаа, хөгжлийн банк нь банкны системийн нийт активын 19.4 хувийг эзэлдэг, 1900 орчим ажилтан, 58 салбар нэгжтэй, Улаанбаатар хотын банк нь банкны системийн нийт активын 3.8 хувь, 400 орчим ажилтан, 33 салбар нэгжтэй банкууд юм.

Компанийн тухай хууль болон Банкны тухай хуульд нийцүүлэн Монголбанкнаас 2020 оны зургаадугаар сарын 23-ны өдөр банкийг өөрчлөн байгуулах замаар нэгтгэх зөвшөөрлийг олгосон бөгөөд банкуудын нэгдэл нь банкны үйл ажиллагаа өргөжих, зах зээлд эзлэх хувь хэмжээ болон харилцагчдад хүрэх үйлчилгээний хүртээмж нэмэгдэх, бүтээгдэхүүн үйлчилгээний чанар болон санхүүгийн тоон үзүүлэлтүүд сайжрах зэрэг давуу талтай юм.

Улаанбаатар хотын банкны салбар, тооцооны төвүүд нь Худалдаа, хөгжлийн банканд нэгдэн үйл ажиллагаагаа хэвийн үргэлжлүүлэн ажиллаж байна.

Олон улсын практикт банк, санхүүгийн байгууллагын нэгдэл үүсэх нь хэвийн үйл явдал бөгөөд Худалдаа, хөгжлийн банкны үйл ажиллагаа хэвийн үргэлжилж байгааг Монголбанкны зүгээс мэдэгдэж байна.