У.Хүрэлсүх сайд аа, 21 албан тушаалтандаа хэзээ ХАРИУЦЛАГА ТООЦОХ вэ!

Төрд зүтгэж яваа дарга нар ард иргэдийнхээ татварын мөнгөөр "туйлдаг" байсан бол одоо бүр ядарсан иргэдийнхээ хандивын мөнгөнөөс хумсалдаг болжээ. Тэдэнд ёс зүй, хэм хэмжээ гэж алга. Ёстой ичих булчирхайгаа гээсэн, цайрчихсан нөхөд л гэж тэднийг хэлэх байх. Улсын Онцгой комиссын дансанд цугласан хандивын мөнгөнөөс нэр бүхий 21 албан тушаалтан өөрсдийгөө цар тахлын үед сайн ажилласан, илүү цагаар нойр хоолгүй зүтгэсэн гээд тус бүр нэг сая төгрөг авчихжээ.    

Тэдний дунд Нийслэлийн Онцгой байдлын газрын дарга Ж.Чүлтэмсүрэн, дэд дарга Э.Эрдэнэбаатар, Нийслэлийн мэргэжлийн хяналтын ерөнхий газрын дарга Л.Эрдэнэчулуун, дэд дарга С.Даваасүрэн, Нийслэлийн эрүүл мэндийн газрын дарга Л.Төмөрбаатар, орлогч дарга Л.Зэндмаа нараас гадна одоогийн хотын даргын ажлыг орлож байгаа Ж.Батбаясгалан, газар хэлтсийн дарга нар болох А.Даваажаргал, Т.Гантөмөр, Ц.Уртнасан, Э.Ганхүү, Ү.Ганболд, Ж.Болдбаатар багтжээ. Түүнчлэн Чингэлтэй дүүргийн Засаг дарга Н.Батсүмбэрэл, Нийслэлийн мэдээлэл технологийн газрын дарга О.Чинзориг, "Улаанбаатар цахилгаан түгээх сүлжээ" ТӨХК-ийн дарга Д.Баярсайхан нарын 21 албан тушаалтан байгаа нь баримтаар ил болж, цахим ертөнцөд "халуун сэдэв" болж байна. 

Тэгвэл одоо л Ерөнхий сайд У.Хүрэлсүхийн "сэлэм" өнөөх ёс зүй, хэм хэмжээгээ умартсан дээрх 21 албан тушаалтныг суудлаас нь цавчиж хаяхад хэрэг болох нь. Учир нь, У.Хүрэлсүх Ерөнхий сайдаар томилогдсон даруйдаа "Ард түмэн минь надаас хоёр зүйл хүсэж байгаа. Нэгдүгээрт, нийгэмд шударга ёсыг бэхжүүлэх чиглэлээр ажиллаж өгөөч ээ. Төрийн албаны бүх шатанд сахилга бат, дэг журмыг тогтоож өгөөч ээ. Хоёрдугаарт, унаж байгаа эдийн засгийг зогсоож, сэргэлт бий болгож өгөөч ээ. Ажлын байр бий болгож өгөөч ээ, цалин мөнгө нэмж өгөөч, ядуурлыг багасгаж өгөөч ээ гэсэн хоёр л зүйлийг хүсэж байна. Ядуу зүдүүгээ ярихаасаа илүүтэй энэ нийгмийг шударга байлгах тал дээр улам их анхаарч, улам их шаардлага тавьж байгаа нь харагдаж байна" хэмээн ярьж байсан билээ. 

Таны ярьдаг шударга ёс, төрийн албаны ёс зүй одоо л үгүйлэгдэж байна. Тэдэнд ёс зүйн хариуцлага хүлээлгэж, "хумсалсан" мөнгийг нь буцааж төлүүлнэ үү, Ерөнхий сайд аа. Сайн ажилласан, амжилт үзүүлсэн ажилтан, дарга хэнийг ч хэдэн төгрөгөөр ч шагнаж, урамшуулж болно. Хамгийн гол нь, дэлхий нийтийг хамраад байгаа коронавирусний халдвараас урьдчилан сэргийлэх ажилд зориулж иргэд, аж ахуй нэгжээс Улсын онцгой комисст өргөсөн хандивын мөнгөөр "туйлж", өөрсдийгөө шагнаж, урамшуулах нь хэр зохимжтой вэ. Байгууллага, хамт олон нэгдэж нэг өдрийнхөө цалинг, урлаг соёлынхон тоглолтынхоо орлогыг, хөгшид тэтгэврээ, хүүхдүүд цуглуулсан мөнгөө улс, эх орныхоо төлөө эрвийх дэрвийхээрээ хандивласан. Гэтэл хэдэн дарга нар тэрхүү хандивын мөнгөнөөс ичихгүй хувьдаа авч, бүр өөрсдийгөө шагнаад сууж байдаг болж таарлаа. Яаж чадаж байна аа, яасан ч ичдэггүй юм.

Гэтэл тэдний зарим нь тэрхүү мөнгийг дансандаа орсныг ч мэдээгүй, хандивын мөнгөнөөс авсанаа санахгүй байна гэх зэргээр хэвлэлд тайлбар өгчээ. Үгүй ээ, мөн сайхан мэлзэж, даажигнаж байгаа шүү. Хурган дарга нар нь ичихгүй ард иргэдээс цугласан хандивын мөнгөнөөс "хумсалж" байхад, тэр нь баримтаар ил болсон байхад Ерөнхий сайд та чимээгүй л суугаад байх уу. Тэдэнд хэзээ хариуцлага тооцох вэ.