НАМЗХ-ны Ерөнхий нарийн бичгийн даргаар Б.Пүрэвдагвыг сонголоо

Монгол Ардын Намын дэргэдэх Нийгмийн Ардчилал Монголын Залуучуудын Холбоо /НАМЗХ/-ны бага хурлын III хуралдаан хуралдаж байна. Хуралдаанаар бүтэц зохион байгуулалтын асуудлыг хэлэлцэж, НАМЗХ-ны Ерөнхийлөгч, Ерөнхий нарийн бичгийн дарга болон Хяналтын хорооны ажлын тайлан илтгэлийг сонсох юм.

Үдээс өмнөх хуралдаанаар бүтэц зохион байгуулалтын асуудлыг хэлэлцэж, гишүүдийн 100 хувийн саналаар НАМЗХ-ны Ерөнхий нарийн бичгийн даргаар Б.Пүрэвдагвыг сонголоо.  Б.Пүрэвдагва нь Монгол Ардын Намын дэргэдэх НАМЗХ-ны дэд Ерөнхийлөгчөөр ажиллаж байсан. Монгол Ардын Намын Бага хурлын гишүүн, “Thanks man” ТББ-ын тэргүүн зэрэг сонгуульт ажил эрхэлдэг. Тэрбээр Монгол Улсын Их Сургуулийг улс төр судлаач мэргэжлээр төгсөж, 2017 онд Австрали улсын Нью-Кэслийн их сургуульд Тогтвортой хөгжлийн чиглэлээр магистрын зэрэг хамгаалсан.
 

• 2009-2011 онд нийслэлийн БГД-ийн Нийгмийн Ардчилал Монголын Оюутны Холбооны дарга
• 2009-2011 онд МАН-ын УЗ-ийн Ажлын албаны Намын байгуулалтын газрын Улс төрийн ажилтан
• 2011-2012 онд МАН-ын Ерөнхий нарийн бичгийн даргын шадар туслах
• 2013-2015 онд Нийгмийн Ардчилал Монголын Оюутны Холбооны Удирдах зөвлөлийн гишүүн  
• 2016-2017 МАН-ын Ерөнхий нарийн бичгийн даргын орон тооны зөвлөх зэрэг албан тушаалыг хашиж,
• 2017 оноос МАН-ын Удирдах Зөвлөлийн Ажлын албаны Орон нутаг, намын хөгжлийн хэлтсийн даргаар ажиллаж эхэлсэн.  

Оюутан байхаасаа Монгол Ардын Намын анхан шатны байгууллагаас ажлын гараагаа эхэлсэн тэрбээр шат шатны байгууллагад нь ажиллаж, улс төрийн мэдлэг болон ажлын арвин туршлагыг хуримтлуулсан нэгэн. Түүнчлэн “Thanks man” ТББ-ыг үүсгэн байгуулсан ба тус ТББ нь оюутан, залуус болон нийгэм рүү чиглэсэн олон төсөл хөтөлбөрүүдийг хэрэгжүүлдэг. Тухайлбал,  "Цэцээ гүн ротаракт клуб" ТББ-тай хамтран сурах хүсэл эрмэлзэлтэй ч төлбөрөө төлөх боломжгүй залууст дэмжлэг үзүүлэх зорилгоор “Хүн бүр сурах эрхтэй” тэтгэлэгт хөтөлбөрийг 2013 оноос хойш хэрэгжүүлж буй. Мөн залууст улс төрийн шинжлэх ухааны тухай мэдлэг боловсрол олгох сургалт семинарууд, Монголын түүхийн мэдлэгийг гүнзгийрүүлэх түүхийн олимпиад зэрэг нийгэмд чиглэсэн олон арга хэмжээнүүдийг зохион байгуулдаг билээ.

23 жилийн түүхтэй НАМЗХ-ны хувьд өдгөө нийт 60 гаруй мянган гишүүнтэй, 21 аймаг, есөн дүүрэгт үйл ажиллагаагаа явуулдаг, үндэсний хэмжээний,  залуучуудын байгууллага юм. Тус холбооны Ерөнхийлөгчөөр УИХ-ын гишүүн Н.Учрал ажилладаг бол Ерөнхий нарийн бичгийн даргаар Э.Тамир ажиллаж байсан билээ. Э.Тамир нь өөр албан тушаалд томилогдох шалтгаанаар ажлаас чөлөөлөгдөх хүсэлтээ өгчээ.