АНУ ажлын виз олгох журмаа дахин чангатгав

АНУ ажлын виз олгох журмаа дахин чангатгалаа гэж тус улсын Дотоодын аюулгүй байдлын яам мэдээлжээ.

Тухайлбал, гаднын ажлын хүчийг сонгодог тусгай мэргэжлийн тоог цөөлсөн байна. Түүнчлэн, ажлын визээр гаднын ажиллах хүчийг ажиллуулж, үндсэн үйл ажиллагаагаа гүйцэтгэхдээ бусад улсын аутсорсингийн үйлчилгээг ашигладаг компаниудад тавих хяналтыг чангатгаж байна. Үүний сацуу гаднынханд илүү өндөр цалин олгох шаардлага тавьснаар ажлын визийн хөтөлбөрийг ач холбогдлыг бууруулж, өндөр бус мэргэжилтэй гаднын ажиллах хүчнээс америкчуудын ажлын байрыг булаан авахаас сэргийлэх боломжтой болно гэж тус яам үзэж байна.

Шинэ журмын зарим заалт пүрэв гарагаас /2020.10.08/, үлдсэн заалт нь хоёр сарын дараа хүчин төгөлдөр болох юм.

Энэхүү дүрэм ажлын визээр тус улсад хөдөлмөр эрхэлж буй гаднын иргэдийн гуравны нэгийг хамрах аж. Ажиглагчид энэ шийдвэр шүүхэд очно гэж таамаглаж байна.

Доналд Трампын засаг захиргаа ажлын виз олгох журмыг нэг бус удаа чангатгаж байжээ. Өнгөрсөн зургаадугаар сард Цагаан ордны тэргүүн америкчуудад зориулж ажлын байрыг суллах зорилгоор H-1B, H-2B, J болон L ангиллын визийг энэ оныг дуустал олгохыг зогсоосон билээ. Гэвч Сан Францискогийн шүүх энэ сарын эхээр Трампын эл зарлигийн хэрэгжилтийг хэсэгчлэн хориглосон юм.