Зөвшөөрөлгүй валют арилжаа эрхлэгчдэд хариуцлага тооцжээ

Санхүүгийн зохицуулах хорооноос “Найман шарга” төвд валют арилжаа эрхэлж буй иргэд, аж ахуйн нэгжийн үйл ажиллагаанд хяналт шалгалт хийжээ.

Мөнгө угаах, терроризмыг санхүүжүүлэхтэй тэмцэх тухай хуулийн хэрэгжилт болон валютын арилжаа эрхлэх тусгай зөвшөөрөлтэй банк бус санхүүгийн байгууллагуудын үйл ажиллагаа нь хууль тогтоомжийн дагуу явагдаж байгаа эсэхийг хянаж шалгахын зэрэгцээ тусгай зөвшөөрөлгүй валют арилжаа эрхлэгчдийн үйл ажиллагааг таслан зогсоох шалгалтыг Чингэлтэй дүүргийн Цагдаагийн хэлтэстэй хамтран явуулсан аж.

Энэ үеэр тусгай зөвшөөрөлгүй валют арилжаа эрхэлсэн дөрвөн иргэнд хариуцлага ногдуулж, зөрчлийг давтахгүй байхыг анхааруулсан бол нэг аж ахуйн нэгжид прокурорын хяналтан дор зөрчлийн хэрэг нээж, шалган шийдвэрлэх ажиллагааг эхлүүлжээ.

Цаашид ч Санхүүгийн зохицуулах хороо тусгай зөвшөөрөлгүйгээр валютын арилжаа эрхлэгчдийг таслан зогсоох чиглэлд байнга анхаарч ажиллах бөгөөд үүнд иргэд, олон нийтийн оролцоо чухал гэж Санхүүгийн зохицуулах хорооноос мэдээллээ.

Түүнчлэн валютын арилжаатай холбоотой зөрчлийн талаарх гомдол, мэдээллийг Хороонд мэдэгдэж, хамтран ажиллахыг иргэдээс хүслээ. Гудамжинд иргэдийн гар дээрээс болон үйл ажиллагаа явуулах зөвшөөрөлгүй аж ахуйн нэгжээс валют худалдах, худалдан авахгүй байхыг анхааруулж байна.

Учир нь, энэ тохиолдолд хуурамч валют авах цаашилбал дам байдлаар хууль бус ажиллагааг дэмжсэн үйлдэл болох эрсдэлтэй. Валютын арилжаа эрхлэгчдийн хувьд ч иргэдийг валют солиулах тухай бүрт хуруу уншигч төхөөрөмж ашиглаж мэдээллийг баталгаажуулах, төлбөрийн и-баримтыг олгох үүрэгтэй. Иргэдийн хувьд валют солиулах тухай бүрт төлбөрийн баримт авснаар аливаа эрсдэлээс хамгаалуулах мөн НӨАТ-ын сугалаанд оролцох давхар боломжтой гэлээ.