ӨГЛӨӨНИЙ МЭНД!
Өнөөдөр 2020.10.09. Энэ оны 283 дахь өдөр бөгөөд он дуусахад 83 хоног үлдэж байна. Монгол эх оронд маань нар 07 цаг 03 минутад мандлаа. 18 цаг 16 минутад жаргана.
Улаанбаатарт бороо шивэрнэ. Өдөртөө 8 хэм, шөнөдөө -5 хэм байна. Та хувцсаа тохируулж өмсөөд гараарай.
Өнөөдөр Дэлхийн шуудангийн өдөр. Канад, АНУ-д Гал түймрээс урьдчилан сэргийлэх өдөр бол Угандад Тусгаар тогтнолын өдрийг тэмдэглэж байна.
Энэ өдөр Их Британийн телевизийн хөтлөгч, хөгжмийн продюсер Шэрон Осборн, Америкийн жүжигчин Майкл Паре, Аргентины хөл бөмбөгч Хорхе Бурручага, Мексикийн кино найруулагч, Оскар, Алтан бөмбөрцөгийн шагналт Гильермо дель Торо, Их Британийн Ерөнхий сайд асан Дэвид Кэмерон, тус улсын Оскарын шагналт кино найруулагч Стив Маккуин, Америкийн дуучин, хөгжмийн зохиолч алдарт Жон Ленноны хүү Шон Таро Оно Леннон, топ модель Белла Хадид зэрэг алдартан төрсөн өдрөө тэмдэглэж байна.
Энэ өдөр Монгол Улсын түүхэнд болсон онцлох үйл явдал:
2006.10.09: Хятадын “Лу Нэн” групп Баян-овоо, Эрдэнэцогт, Цайдам-мөчир, Дэлгэрхаан зэрэг дөрвөн орд газрын уурхайн хайгуулын лиценз, олборлох эрх авч, төлөвлөгөө ёсоор Монгол Улсад дулааны цахилгаан станцын суурийг тавьжээ. Хятад-Монголын цахилгаан эрчим хүчний хамтын ажиллагааны төсөл, улсын цахилгаан эрчим хүчний хөгжлийн хэтийн төлөвлөгөөний санамж мэдээнд “Хятад-Монголын цахилгаан эрчим хүчний хамтын ажиллагааны төслийн гол хоёр зүйл Хятадын “Лу Нэн” групп Монгол Улсад байгуулах нүүрсний цахилгаан станцын суурь, цахилгаан сүлжээний компани том хэмжээний улс дамнасан цахилгаан дамжуулах төсөл хэрэгжүүлэхээр бэлтгэл ажилдаа ороод байна” гэжээ.
Энэ өдөр дэлхий дахинд болсон онцлох үйл явдлууд:
1965: «Битлз»-ийн «Yesterday» дуу Америкийн хит-парадыг тэргүүлэв.
1980: Уран зохиолын Нобелийн шагналыг Польшийн зохиолч Чеслав Милошт олгожээ.
2000: Жон Ленноны эхнэр Йоко Оно нөхрийнхөө дурсгалыг хүндэтгэн түүний музейг нээв.
2006: Хойд Солонгос анх удаагаа цөмийн зэвсэг туршжээ.
2009: АНУ-ын 44 дэх Ерөнхийлөгч Барак Обама Нобелийн энх тайвны шагнал хүртэв.
Өнөөдөр үс засуулвал идээ ундаа элбэг олдоно гэжээ.
Энэ өдөр үхэр, могой жилтнүүд аливаа үйлийг хийхэд эерэг сайн бол бар, туулай жилтнүүд аливаа үйлд анхаарал болгоомжтой хандаарай. Эл өдөр эе эвээ ололцох, хамтын хөдөлмөр эхлэх, гэрээ хэлцэл байгуулах, найр хурим хийх, бэр гуйх, инж өгөх, авах, үнэт эрдэнийн зүйл авах, угаал үйлдэх, хагалгаа хийлгэх, гэр бүрэхэд сайн. Харин мод суулгах, нарийн зөвлөгөөн хийхэд тохиромжгүй.
Хол газар явах гэж байгаа хүмүүс баруун хойш мөрөө гаргаад аян замдаа гараарай. Таны аяны болон амьдралын ганзага үргэлж дүүрэн байг.
Өнөөдрийн ажилд тань амжилт хүсье.
Холбоотой мэдээ
Сэтгэгдэл ( 0 )