Монгол Улсын алтны нөөцийг 53.14 тонноор нэмэгдүүллээ

Э.Мөнхжин | Zindaa.mn
2020 оны 12 сарын 25

"Эрдэнэс Монгол" нэгдлийн "Эрдэнэс силвер ресурс" ХХК-ийн геологи хайгуулын баг олон улсын чанарын стандартад нийцсэн нөөц тогтоох хайгуулын ажлыг амжилттай гүйцэтгэн Монгол Улсын Эрдэнэсийн Сангийн алтны нөөцийг 53.14 тонноор нэмэгдүүллээ. Энэхүү геологи хайгуулын ажил нь гадны зөвлөх мэргэжилтнүүдийн оролцоогүй зөвхөн Монголын геологичид, уул уурхайн салбарын эрдэмтэн судлаачдын хамтын ажиллагааны үр дүн гэдгээрээ онцлог.

"Эрдэнэс силвер ресурс" ХХК-ийн геологи хайгуулын баг Уул уурхай, хүнд үйлдвэрийн яам, Үндэсний геологийн алба, “Геологийн Судалгааны Төв” ТӨҮГ, “Геологийн төв лаборатори” ТӨҮГ, ШУТИС-Геологи уул уурхайн сургууль, “Ханлаб” ХХК, “Геоаналитик” ХХК, “Лэнд Тест” ХХК болон П.Батчулуун, Б.Балдорж нарын шинжээчидтэй хамтран ажлаа зөв төлөвлөн ажилласнаар дөрвөн сарын хугацаанд нөөц тогтоох, хайгуулын ажлыг гүйцэтгэж дуусчээ.

Дашрамд дурдахад, Монгол Улсын Засгийн газрын 212 тоот тогтоолоор Өмнөговь аймгийн Цогтцэций сумын нутагт байрлах Овоот хяр (XV-21670), 22641,51 гектар бүхий хайгуулын тусгай зөвшөөрлийг Ашигт малтмал, газрын тосны газраас “Эрдэнэс силвер ресурс” ХХК-д 2020 оны наймдугаар сарын 27-ны өдөр олгосон юм. Шинэ оны босгон дээр Монгол Улсын Эрдэнэсийн Сангийн алтны нөөцийг нэмэгдүүлэхэд үнэтэй хувь нэмрээ оруулсан үндэсний геологичид, уул уурхайн салбарын мэргэжилтнүүдэд “Эрдэнэс Монгол” ХХК талархал илэрхийллээ.

 
 

Сэтгэгдэл ( 1 )

Сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.
иргэн (49.0.212.1)  2020 оны 12 сарын 25

Сайхаан улс мөнгөтэй болох сайн, наад зах нь гадны ямар нэг эрээчигч танайд гадны хөрөнгө орж ирэхгүй шүү гэж айлгахгүй болох юм билүү.

1  |  0
Top