Тэдний нэг нь ЕРӨНХИЙЛӨГЧИЙН СОНГУУЛЬД өрсөлдөнө 

Хуульд зааснаар парламентад суудалтай нам, эвсэл ирэх ням /2021.05.02/ гараг гэхэд Монгол Улсын Ерөнхийлөгчийн ээлжит сонгуульд намаа төлөөлж, нэр дэвшин өрсөлдөх нэр дэвшигчээ тодруулж, танилцуулах ёстой билээ. Тэгвэл намын дотоод хагарал, тэмцлээсээ болж ирэх зургаадугаар сард болох Монгол Улсын Ерөнхийлөгчийн ээлжит сонгуульд оролцох эсэх нь эргэлзээтэй болсон АН-ынхан нэр дэвшигчдээ бүртгэж эхэллээ. 

Ингэхдээ хоёр талд нэр дэвшигчдээ бүртгэж эхэлсэн нь анхаарал татаж байна. Өөрөөр хэлбэл, С.Эрдэнийн тал болон Ц.Тувааны талаас нэр дэвшигчид намынхаа Дотоод сонгуулийн хороонд хүсэлтээ хүргүүлж, бүртгүүлээд байгаа юм. 

Одоогийн байдлаар Монгол Улсын Ерөнхийлөгчийн ээлжит сонгуульд намаасаа нэр дэвшин өрсөлдөх хүсэлтээ илэрхийлж, намынхаа Дотоод сонгуулийн хороонд Ерөнхий сайд асан Р.Амаржаргал, УИХ-ын гишүүн Д.Ганбат, Н.Алтанхуяг, С.Ганбаатар болон УИХ-ын гишүүн асан С.Эрдэнэ, Ц.Оюунгэрэл, Х.Тэмүүжин, Л.Гүндалай нар материалаа хүргүүлж, бүртгүүлээд байна. 

Тодруулбал, О.Цогтгэрэл тэргүүтэй АН-аас Ерөнхийлөгчийн сонгуульд өрсөлдөхөөр УИХ дахь АН-ын бүлгийн дарга Д.Ганбат, УИХ-ын гишүүн Н.Алтанхуяг, С.Ганбаатар, УИХ-ын гишүүн асан, Хууль зүйн сайд асан Х.Тэмүүжин нар бүртгүүлсэн бол М.Тулгат тэргүүтэй АН-аас Ерөнхийлөгчийн сонгуульд өрсөлдөхөөр УИХ дахь АН-ын бүлгийн дарга Д.Ганбат болон Ерөнхий сайд асан Р.Амаржаргал, УИХ-ын гишүүн асан Ц.Оюунгэрэл, Л.Гүндалай нар материал, хүсэлтээ илэрхийлээд байна. 

-БИ ӨРСӨЛДӨХ ШИЙДВЭРЭЭ ӨЧИГДӨРХӨН Л ГАРГАЛАА-

УИХ-ын гишүүн Н.АЛТАНХУЯГ: Би өчигдрийг хүртэл Ерөнхийлөгч Х.Баттулга дахин нэр дэвшинэ гэдэгт бүрэн итгэлтэй байв. Гэвч МАН хүчиндсээр энэ маргаанд цэг тавьчихлаа. Учир нь, МАН-ын батлуулсан, Үндсэн хуулийн нэмэлт өөрчлөлтийг батламжлахдаа Ерөнхийлөгч Х.Баттулга өөрийнхөө эрхийг түдгэлзүүлэхгүй гэж бодсон. Цэцийн шийдвэрт Ерөнхийлөгч хориг тавьж, энэ асуудлыг өчигдөр эцэслэн шийдлээ. Ерөнхийлөгчийн сонгуулийн тухай хуульд Ерөнхийлөгчөөр ажилласан хүн дахин нэр дэвшихгүй гэсэн заалтыг хүчээр орууллаа. МАН-ын дарга У.Хүрэлсүх өөрөө сонгуульд өрсөлдөх юм байна. Энэ хүн шударга бус зүйл хийж байна. Ц.Элбэгдорж Ерөнхийлөгч байхад би "Шударга бусын хонгил бий болголоо. Ингэж болохгүй" гэж хэлээд, их нухлуулсан. Тэр хүнд цагт хэвлэл мэдээллийнхэн л намайг их дэмжсэн. Би өрсөлдөх шийдвэрээ дөнгөж өчигдөр гаргалаа. Шударга бусын хонгилыг устгана. Намайг АТГ олон удаа ээрч, байцаасан. Та бүхэн санаж байгаа байх. МАН-ыг би дөрвөн жил харлаа. Тэдэнд зориг зүрх байхгүй байна. Хулчгар, зовлон дундуур явж үзээгүй, ажил мэдэхгүй, зохион байгуулалтаа хийж чадахгүй байна. УИХ-ын 76 гишүүнийхээ машины кодыг л хэвлээд гаргаж чадахгүй байна. У.Хүрэлсүх Ерөнхийлөгч болчихвол Монгол Улс Монгол ардын нам улс болох юм уу. Би өөрөө оролцоно, үзэлцэнэ гэж шийдлээ. Би гучин жилийн өмнө их сургуулийн багшийн ажлаа орхиод ардчилалд хүчин зүтгэсэн. Ийм нийгэм бий болно гэж бодоогүй. Шударга бусын хонгилын түлхүүрийг нэг хүнээс аваад нөгөө хүнд өгдөг. Нэг намын даргад өгнө гэж зүүдлээгүй. Шударга ёсыг тогтоох хэрэгтэй байна. Иймд нэрээ дэвшүүллээ. Байгалийн баялгийг цөөнх буюу 30 гэр бүл биш гурван сая монголчууд хүртэх ёстой. Өрөөл бусдыг хийнэ гэж их харлаа.

-БИ АРДЧИЛАЛЫН ТӨЛӨӨ ЗҮТГЭНЭ- 

УИХ-ын гишүүн С.ГАНБААТАР: МАН-ын 62-ын бүлэг аархаж, даам гарч байгаа өнөө үед би АН-ыг сонголоо. АН-ын хуваагдал, зөрчил удахгүй шийдэгдэнэ. Би ерөнхийлөгчийн сонгуулийн төлөө энэ сонголтыг хийгээгүй. Богино зайд миний хийсэн сонголт эрсдэлтэй боловч урт хугацаанд  зөв шийдвэр юм. Атгаалжин хар мангас уул уурхайн компаниудтай нийлж, ард түмнийг сорж байна. Оюу толгой, Эрдэнэт, Эрдэнэс таван толгойн ордын орлогоор олон сургууль барих ёстой. АН хэдхэн хүний өмч бий. Би ардчиллын төлөө, Монгол Улсын төлөө зүтгэнэ. Над шиг хүмүүсийг баруунд баялгийн эх оронч үзэл бодолтой гэдэг. Би бодлоосоо ухраагүй. 

-НАДАД С.ЭРДЭНИЙН ГАРЫН ҮСЭГТЭЙ НАМЫН БАТЛАХ БИЙ-

УИХ-ын гишүүн асан Л.ГҮНДАЛАЙ: Надад С.Эрдэнэ даргын гарын үсэгтэй намын батлах бий. Еэвэн хувааж буй шиг нам хуваагдана гэж байхгүй. Дээрээ л  хэдэн хүн хоёр нам байгуулаад байгаа юм. Түүнээс шинэ нам бий болоогүй. Дунд шатны гишүүд АН-даа хэвээрээ л байна. Намын гишүүд хуваагдаагүй. Ц.Туваан тэргүүтэй 50-60 хүн л үймүүлээд байна. Энэ бол цаг уурын үзэгдэл. Ц.Туваан одоогийн Ерөнхийлөгчийг дахин нэр дэвшүүлэхийн тулд зохион байгуулалтад орсон. Би “Ард түмнээ хайрлая” намын бичиг баримтыг эхнэртээ өгөөгүй, шилжүүлээгүй. Энэ нам УИХ-д суудалгүй. Иймд энэ намыг хэн авсан нь тийм ч чухал биш. Харин улс орны асуудал илүү чухал тул жижиг асуудал ярихгүй байцгаая. 

-МАНАЙ НАМААС НЭР ДЭВШИЖ БАЙГАА ХЭН Ч БАЙСАН ЕРӨНХИЙЛӨГЧИЙН АЖЛЫГ ХИЙЖ ЧАДНА-

УИХ-ын гишүүн Д.ГАНБАТ: Нэг намын болон нэг хүний дарангуйлалд орчих гээд байгаа ийм үед АН-аас Ерөнхийлөгчийн сонгуульд нэрээ дэвшүүлж байгаа хүн нэлээд сэтгэл санаа зовж, өөрийн байр суурьтаа байж чадна гэж дүгнэж байгаа. Манай намаас нэр дэвшиж буй хэн нь ч Ерөнхийлөгчийн ажлыг хийж чадна. Ардчилсан нам хоёр хуваагдаад байгаа зүйл байхгүй. Намын дүрмийн маргаан, үйл ойлголцол бий ч шийдэгдчихнэ. Улсын дээд шүүх хэд хоногийн өмнө энэ асуудлыг намын дотоод асуудал гэсэн шийдвэр гаргасан. Дотоод асуудлаа нам дотроо шийдчихэж болох байх гэж бодож байна.