Нэр дэвшигч Д.Энхбатаас болж "ХАЛЗ МЭТГЭЛЦЭЭН"-ийг цуцаллаа

Монгол Улсын Ерөнхийлөгчийн ээлжит сонгуульд нэр дэвшин өрсөлдөж байгаа У.Хүрэлсүх, С.Эрдэнэ, Д.Энхбат нар халз мэтгэлцээнгүй сонгуульт ажлаа өндөрлөх гэж байна. Харин олон нийтийн зүгээс халз мэтгэлцээнгүй Ерөнхийлөгчийн сонгууль гэж байдаг аа хэмээн шүүмжилж, цахим орчинд байр сууриа илэрхийлж эхэллээ. 

Гурван нэр дэвшигчийн дунд халз мэтгэлцээн явуулахгүй болсон шалтгаан нь "Зөв хүн-Электорат" эвслээс нэр дэвшигч Д.Энхбат коронавирусний халдвар авсантай холбоотой гэдгийг МҮОНРТ-ийн захирал хэллээ. 

Нэр дэвшигч Д.Энхбат нь хөдөө, орон нутагт сонгуулийн сурталчилгаагаа хийж байх үедээ халдвар авсан нь батлагдсан. Тэрбээр эхнэрийн хамт халдвар авсан бөгөөд одоогоор Улсын хоёрдугаар төв эмнэлэгт хэвтэн эмчлүүлж байгаа юм.

Нэр дэвшигчдийн дунд бодлогын мэтгэлцээн өрнүүлдэг журамтай төдийгүй МҮОНРТ зохион байгуулдаг. Үүний дагуу МҮОНРТ-ээс 170 гаруй хүний бүрэлдэхүүнтэйгээр долоо хоногийн турш ажилласнаар бэлтгэлээ бүрэн хангасан байжээ. Гэвч шинэ нөхцөл байдлын улмаас ийнхүү цуцлахаас аргагүй болсон байна.

Тэдний мэдээлснээр МАН, АН, ХҮН-ын зүгээс мэтгэлцээн өрнүүлэх хүсэлтэй байсан бөгөөд талууд гурван ч хувилбарыг ярилцжээ. Тодруулбал, МАН, АН-ын нэр дэвшигчид МҮОНРТ-ийн байрнаас, харин Д.Энхбат эмнэлгийн өрөөнөөсөө мэтгэлцээнд оролцох, эсвэл Д.Энхбатыг телевизийн байранд хүргэж, онлайнаар мэтгэлцүүлэх, МАН, АН-ын нэр дэвшигчдийг Д.Энхбатын хэвтэн эмчлүүлж буй эмнэлэгт аваачиж, тусгай бүхээгт байрлуулан мэтгэлцэх зэрэг хувилбарыг ярилцсан байна.

Гэвч Д.Энхбатыг эмчилж буй эмч нарын зүгээс “Халдвар авсан иргэнийг телевизийн байранд зөөвөрлөх боломжгүй. Мэтгэлцээн багадаа хоёр цаг ба түүнээс дээш хугацаанд үргэлжлэх учраас  нэр дэвшигчийн биеийн байдалд  эрсдэлтэй.  Онлайнаар мэтгэлцээн явуулах тохиолдолд шууд дамжуулах  оператор, инженер, техникийн ажилчид хамгаалалтын  битүү хувцсыг заавал өмсөх шаардлагатай. Энэ нь халдвар авсан хүний биед сөргөөр нөлөөлөхөөс мэтгэлцээнийг олон нийтэд хүргэх телевизийн маш олон ажилчдыг эрсдэлд оруулна. Мөн  эмнэлгийн улаан бүсэд гаднаас хүмүүс олноор оруулах боломжгүй” гэх тайлбарыг өгчээ.

Нэр дэвшигч Д.Энхбатын хувьд коронавирус тархсан цагаас вакциныг эсэргүүцэж байсан. Тиймдээ ч гуравдугаар сарын 20-ноос 50-65 насны иргэдийг вакцинжуулж эхэлсэн байтал хийлгэлгүй явсаар Ерөнхийлөгчид дэвшихээр болсон өдрөө буюу тавдугаар сарын 2-нд эхний тунгаа хийлгэсэн байна. Харин хоёрдугаар тунгийнх нь хугацаа болсон ч хийлгэлгүй явсаар ийнхүү халдвар авсан талаар эх сурвалж мэдээлж байгаа юм. Улмаар  Д.Энхбат ийнхүү халдвар авч, эмнэлэгт хэвтсэн нь мэтгэлцээнийг цуцлах шалтгаан боллоо.