12.6 тэрбум төгрөгийн үнэтэй “Ланд круйзер 300” автомашин 59 ширхэг орж иржээ

Бөөсөнд хутга гэгчээр 1 сумын Засаг дарга, Замын-Үүд дэх Авто тээврийн төвийн даргыг баривчлахын тулд сүрийг үзүүлсэн үйл явдал уржигдар болж өнгөрсөн. Засгийн газраас Эрээн, Тяньжин боомт дахь Монголын ачаа бараа гацсантай холбоотойгоор тэднийг саатуулан шалгах гэж байгаа нь тэр. Түүнчлэн ажлын хариуцлага алдсан нэрийдлээр зарим хүмүүсийг ажлаас нь чөлөөлөн шинэ томилгоо ч хийгдэв. Угтаа иргэдийн ачаа бараа саатсан гол буруутан нь Замын-Үүд суман дахь хэдэн “хурган” дарга нар болж таарав. Угтаа бодлогыг нь зангидаж, чиг үүргээр хангаж, БНХАУ-ын талтай харилцан ойлголцох ёстой Зам тээврийн хөгжлийн сайд Л.Халтарын ажлын хариуцлагагүйн алдааг тэд үүрсэн юм. Хагас жил чингэлэгтэй ачаа тээвэр хил дээр саатаж, Тяньжин боомтоос огт хөдлөхгүй байхад үүнд анхаарах ёстой байсан хүн нь мэдээж тэр. Үүнээс улбаалж өргөн хэрэглээний бараа бүтээгдэхүүний үнийн өсөлтийг монголчууд нуруундаа үүрч байна. Бухимдал ч дээд цэгтээ тулж эхлэв. Гэвчиг алдаа дутагдлыг бусад руу чихэн уснаас хуурай гарахыг оролдож буй түүний үгэнд эгдүүцсэн УИХ-ын гишүүн Ч.Хүрэлбаатар “Асуудал хариуцсан хүмүүс ажлаа сайн хийнэ шүү. Хаа хамаагүй хүмүүс рүү буруу чихэж ярьдаг ийм хөгийн занг хаа хаанаа зогсоох хэрэгтэй. Ажил хариуцсан бол хариуцсан шиг тултал нь хийгээд явах хэрэгтэй. Чадахгүй бол ажлаа өгөөд хийж чаддаг хүмүүсээр нь хийлгэх хэрэгтэй” хэмээн шүүмжилсэн юм.

Дээр дурдсанчлан хагас жил ачаа бараагаа авч чадаагүй иргэд бухимдалтай байхад энэ оны тавдугаар сард үйлдвэрлэгдэж өнгөрөгч зургаадугаар сард нээлтээ хийсэн Тоёота компанийн Ланд круйзер 300 маркийн авто машин хэдийнэ хил даван орж ирээд байна. Жирийн иргэдийн ачаа бараа жил тойрон хүлээгдэж байхад мөнгөтэй хүмүүсийн ачаа чингэлэг 10 хоногт ирж байгаад бухимдах иргэд байгаа юм. Автомашины бизнес эрхлэгчид болон иргэдийн тээвэрлэсэн авто машинууд Тяньжин, Эрээний боомтод гацаад байгаа бол сүүлийн хэд хоногт Тяньжин боомт дахь Монголын чингэлгүүдийн татан авалт хийгдэхгүй байгаатай холбоотойгоор Япон улсаас импортын машинуудын тээврийг зогсоосон байна хэмээн иргэд бухимдаж байгаагаа хэлж байна. Тэгвэл Тоёота сэйлс Монголиа ХХК зургаадугаар сарын 18-наас долоодугаар сарын 7-ны өдрийн хооронд 12 тэрбум 666 сая төгрөгийн үнэ бүхий Ланд круйзер 300 автомашин 59 ширхэгийг Монголын хилээр оруулаад байгаа юм. Тоёота сэйлс Монголиа ХХК нь Туушин компанийн нэр дээр оруулж ирсэн гэдгийг эх сурвалж баталлаа.

Иргэд ачаа бараагаа авч чадахгүй 6 сар бухимдаж байхад 5-14 хоногийн дотор монголд ирсэн тээврийн хэрэгслүүд нь авто тээврийн контейнер, төмөр замын контейнерээр тээвэрлэгдэн Замын-Үүдээр орж ирсэн баримт байгаа юм. Танилтай, сайдтай ойр хүмүүс ачаагаа цөөн хоногийн дотор авч байгаа нь өөрөө асуудал болоод байна. Гэтэл манайхан бөөсөнд хутга гэгчээр гааль, мэргэжлийн хяналтын хүмүүсээ намнаад эхлэв. Ачаа тээврийг гааль болон мэргэжлийн хяналт хариуцдаггүй бөгөөд шууд чиг үүрэг нь Зам тээврийн хөгжлийн яаманд шууд хамаардаг. Тиймээс Монголын хилээр дайран өнгөрөх болон Монгол Улсад ирэх бүх ачаа Л.Халтар сайдын хариуцлагын асуудал юм. Үүнд, агаарын тээвэр, төмөр зам, авто тээвэр, далайн тээвэр бүгд яамны удирдлагуудын чиг үүргээр хөдөлдөг гэсэн үг.

Иргэдийн чингэлэг жил тойрон саатаж, Зам тээврийн хөгжлийн яаманд танилтай хүмүүсийн ачаа бараа тав хоногт ирж байгаа нь нийгмийн сэтгэлзүйд мөнгөтэй, мөнгөгүй гэсэн давхаргыг илүү гаргаж байна. Бэлтэй давхарга, жирийн иргэдийн ялгаврыг ядаж чингэлэг дээрээ гаргамааргүй байна, Л.Халтар сайд аа. Монгол Улсад орж ирсэн Ланд круйзер 300 маркийн автомашины дэлгэрэнгүй жагсаалтыг хүргэе.