О.Цогтгэрэл АН-ыг хувааснаар ялагдал хүлээлгэнэ

Нөхөн сонгуулийн сургаар ардчиллын нэр зүүсэн нам, хөдөлгөөнүүд идэвхжив. Бүртгэлийн байгууллагын мэдээллээр М.Тулгат тэргүүтэй АН албан ёсных, Увсаас сонгогдсон УИХ-ын гишүүн О.Цогтгэрэлийн толгойлж буй нь албан бус болж таараад байгаа. Гэсэн хэдий ч О.Цогтгэрэл өөрийгөө дарга хэмээн өргөмжлөөд багагүй хугацаа өнгөрлөө. Тэр ийнхүү АН-ыг хуваагдмал харагдуулснаар  гишүүд, дэмжигчдийнх итгэл алдарсан гэхэд болно. Цагтаа Монгол төрийн хоёр баганын нэг гэгдэж байсан нам том жижиг дөрвөн ч сонгуульд дараалан ялагдал хүлээсэн маргашгүй шалтгаан энэ. Гэвч тэрбээр Ерөнхийлөгчийн сонгуулийн өмнө гэнэт даргаар доторсон шигээ сонгуулийн дараа сураг тасарсан.

Улмаар Сонгинохайрхан дүүрэг болон Хэнтий аймгийн нөхөн сонгуульд сэтгэл зүтгэлээрээ оролцох ардчилсан намын гишүүд, дэмжигчдэд дэмжлэг болохгүй нь нэгэнт тодорхой болоод байна. Энэ нь нөхөн сонгуулийн сургаар О.Цогтгэрэлийн жигүүрийнхэн амь орж, үндсэн намаа өөлөх болсноор харагдаж байгаа. Тэд ирэх аравдугаар сарын нөхөн сонгуулийн дүн гарах хүртэл, намын тамга тэмдэг дагасан маргаанаа сэргээх бөгөөд ингэж сонгогчдын санал, сэтгэлийг хуваах үндсэн аргад гаршсан гэдгээ батална. Эцсийн дүнд нь АН-ын гишүүд, дэмжигчид зүтгэл талаар болдог түүх давтагдах нь. Маш товчхоноор бол тэд УИХ-д хоёр мандат авчрах учиртай ирэх намрын нөхөн сонгууль, хэтдээ 2024 онд АН-ыг ялагдал хүлээлгэх нь үндсэн зорилготой мэт харагдаад байгаа. Ер нь өнгөрсөн хугацаанд АН дотор намын шинэчлэл, шинэ салхи нэрээр төрсөн жижиг, бүлэг фракцуудын гаднын дэмжлэгтэй үйл ажиллагаа энэ чиглэлд явж ирсэн байдаг.

Үнэн гэвэл, АН-ын лидерүүд, ардчиллын үзэл санааг тээгчид бүдгэрсэн энэ өдрүүд О.Цогтгэрэл тэргүүтэнд элдэв наймааны боломж олгосон. 2020 оны парламентын сонгуулиар Увс аймаг өрнөсөн үйл явдлууд үүнийг илтгэдэг. Тухайн үед АН-ыг төлөөлсөн О.Цогтгэрэл, МАН-ын нэр дэвшигч Б.Чойжилсүрэнг ханьсан намын нөхдөө хөлдөө чирсэн талаар өнөөг хэр нь МАН, АН төдийгүй улс төрийн хүрээнийхэн ярилцсаар байгаа. Орон нутагт МАНАН үүсгэсэн гэх энэ явдал удаах сонгуулиудын үр дүнгүүдэд нөлөөлөх наймааны хэрэгсэл болсон гэж үздэг. Мөн О.Цогтгэрэл монгол төрийн сонгуулиар удаа дараа “царцаа” зөөсөн асуудал яригддаг бөгөөд тэр албан бус АН-ын даргаар сурсан мэхээ ашиглан тодорсон гэдгийг тухайн үеийн сөргөлдөгчид нь хэлсэн удаа ч бий. Үүнээс АН-д дотоод сонгууль явуулах нэрээр “царцаа” үүрлүүлэн хоёр хуваасан эрхмүүдийн нэр тодрон гардаг. Иймээс л АН-ынхан ирэх намрын нөхөн сонгуульд ялалт байгуулна гэдэгтээ итгэл үнэмшилгүй байгаа юм.

С.СҮЛД