Ч.Өнөрбаяр: Үзэл санаа, зарчмаа худалдаагүй хоёр хүнээ нэр дэвшүүллээ

УИХ-ын 18, 28 дугаар тойрогт болох нөхөн сонгуульд нэр дэвшигчид өчигдөр /2021.09.01/ албан ёсоор тодорсон билээ. Тухайлбал, АН-аас Хэнтий аймгийн 18 дугаар тойргийн нөхөн сонгуульд УИХ-ын гишүүн асан Б.Гарамгайбаатар, Сонгинохайрхан дүүргийн 28 дугаар тойргийн нөхөн сонгуульд Хотын дарга асан Э.Бат-Үүл нэр дэвшихээр болсон. 

Үүнтэй холбогдуулан өнөөдөр /2021.09.02/ АН-аас мэдээлэл хийлээ. Хэвлэлийн бага хуралд АН-ын дарга М.Тулга,  Ерөнхий нарийн бичгийн дарга Ч.Өнөрбаяр, дэд дарга Р.Эрдэнэбүрэн нар оролцов. 

Энэ үеэр АН-ын дарга М.Тулга "Бид сонгуульд оролцох гэж байгаа юм биш. Сонгуульд орж парламентын гишүүдийн тоогоо нэмэх гээд байгаа юм биш. Данхайсан том дарга нартаа л тэмцэх гээд байгаа юм. Бид маш олон талаас нь харж нэр дэвшигчдээ тодруулсан. Данхар төр, дарга ангитай тогтолцооны эсрэг явах цаг болсон. Ардчилсан хувьсгал 1990 онд дарга ангийн эсрэг тэмцэж эхэлсэн. Тэгвэл хоёрдугаар хувьсал эхлэх цаг нь болсон. Залуус бид ахмадуудтайгаа хамт тэмцэх цаг нь ирсэн байна. Нэгдэх цаг нь болсон байна, үүнийг өнөөдөр зарлаж байна" хэмээн мэдээллийнхээ эхэнд онцоллоо. 

Харин АН-ын Ерөнхий нарийн бичгийн дарга Ч.Өнөрбаяр "АН-ын Үндэсний бодлогын хорооноос хоёр хүнийг нэр дэвшүүлсэн. Үзэл санаа, зарчмаа худалдаагүй хоёр хүнээ нэр дэвшүүллээ. Хувьсгал хийхэд зангиа хэрэггүй. Үзэл санааны хувьсгал хийх цаг нь болсон байна. Нийгэм унтаа байдалд орсон байна. Үүний эхлэл нь УИХ-ын нөхөн сонгууль. Бид эрх мэдэлтэй, дарга нарын хэсгийг дагаар ордоггүй, нэгийгээ үзнэ, тэмцэнэ" гэж ярилаа.