АН-ын бүлэг "40-ИЙН БИДОН"-тойгоо үлдэх үү?!

Оросын алдарт "Алтан загасны үлгэр"-т эцэс төгсгөлгүй шуналаа дарж, хазаарлаж чадаагүй эмгэн эцэстээ эвдэрхий муу тэвштэйгээ үлддэг. Харин орчин цагт энэ үлгэр өнөөгийн парламентад сөрөг хүчний үүргийг гүйцэтгэж байгаа АН-ынханд яв цав тохирчээ.

Тэд эрх мэдлийн төлөө намаа хоёр хувааж, шат шатны сонгуульд ялагдал хүлээж, эцэстээ УИХ-д бүлэгтэй үлдэх эсэх нь ч эргэлзээтэй нөхцөл байдалтай нүүр тулаад байна.

Учир нь, өнөөгийн УИХ дахь АН-ын бүлэг 13 гишүүнтэй. Тэднийг Д.Ганбат даргалдаг бол бүлэгт С.Одонтуяа, Н.Ганибал, Б.Бейсен, А.Адъяасүрэн, Ш.Адьшаа, Н.Алтанхуяг, Ж.Батсуурь, Д.Бат-Эрдэнэ, С.Ганбаатар, Б.Пүрэвдорж, Ц.Туваан, О.Цогтгэрэл нар багтдаг.

Харамсалтай нь, өнгөрсөн долоо хоногт УИХ дахь АН-ын бүлгийн дарга Д.Ганбат мэдээлэл хийхдээ Ц.Тувааныг намаасаа хөөж, С.Ганбаатар болон Н.Алтанхуяг нарыг бүлгийн үйл ажиллагаанд оролцох эрхийг нь хассан талаар мэдэгдсэн билээ.

Харин өнөөдөр /2021.10.18/ үргэлжлүүлэн УИХ-ын гишүүн Ж.Батсуурь, Н.Ганибал нарт сахилгын шийтгэл оноож, намын гишүүнчлэлээс хассан гэх мэдээллийг өглөө.

Ингэснээр УИХ-д 13 гишүүнтэй бүлгийн үйл ажиллагаа явуулж байсан АН-ынхан таван гишүүнээ "хөөгөөд" байна. Одоо УИХ дахь АН-ын бүлэгт Д.Ганбатаас гадна долоон гишүүн үлдлээ. Хэрэв тэднээс хоёр л гишүүн "хөөгдсөн", эсвэл явсан тохиолдолд АН-ынхан парламентад бүлэггүй болно.

Хэзээнээс эв түнжингүй, дотоод хагарал нь тогооноосоо хальж, хоёр хуваагдсан АН-ынхан эв зүйгээ олохгүй, энэ янзаараа гишүүддээ хариуцлага тооцож байгаа нэрээр намаасаа "хөөж, туугаад" байх аваас УИХ дахь АН-ын бүлэгт УИХ-ын дарга асан З.Энхболдын хэлсэнчлэн "40-ийн бидон"-оос нь өөр хүн үлдэхгүй нь бололтой. Тэрбээр өнгөрсөн долоо хоногт зарим гишүүдээ намаасаа хөөж, бүлгээсээ хассан талаарх мэдээллийг хийсэн УИХ дахь АН-ын бүлгийн дарга Д.Ганбатыг "40-ийн бидон" хэмээн егөөдөөд авсан билээ.