М.Тулгат: Манай намд Онц их хурал гэдэг нэр томьёо байхгүй

АН-ын Онц их хурлыг зохион байгуулсан О.Цогтгэрэл, Ц.Туваан, Л.Гантөмөр нар хурлын шийдвэрээ баталгаажуулахаар өнөөдөр /2021.11.10/ Улсын дээд шүүхэд хандаж байна.

Онц их хурлаар О.Цогтгэрэлийг АН-ын даргаар бүртгэж, Л.Гантөмөрийг Ерөнхий нарийн бичгийн даргаар томилсон билээ.

Тэгвэл уг үйл явдалтай зэрэгцэн М.Тулгат нар мэдээлэл хийлээ.

М.Тулгат "Манай намын дүрэмд Онц их хурал гэдэг нэр томьёо байхгүй. Мөн намын нийт гишүүдийн оролцоог жигд хангаж өгөхгүйгээр Их хурлыг зохион байгуулсан. Ардчилал руу нулимж, ардчиллыг муулж байсан хүмүүсийг намын толгой дээр залах гэж оролдсон.

Бид намын даргаа сольсноор асуудлаа үндсээр нь шийдэхгүй.

Миний хувьд АН эв эеээ олно гэсэн итгэл алдраагүй байна. Сая дарга, цэргээ сонгосон тэр асуудлыг хуулиар шийдэх байх гэж бодож байна. Иймд тэр нөхдүүддээ АН-ын үндсэн дүрэмд өөрчлөлт оруулах, бодлого судалгааны төв байгуулах ажилд хамтрах санал тавьж байна" гэлээ.