О.Цогтгэрэл: Д.Ганбат даргын зарласан бүлгийн хуралд орохгүй

АН-аас парламентад сонгогдсон УИХ-ын гишүүн О.Цогтгэрэл, Н.Алтанхуяг, С.Ганбаатар, Ц.Туваан нар өнөөдөр (2022.01.10) Төрийн ордонд цаг үеийн асуудлаар мэдээлэл хийлээ. 

Энэ үеэр УИХ-ын гишүүн О.Цогтгэрэл "Даваа гарагт УИХ дахь нам, эвслийн бүлэг хуралддаг. АН-ын бүлгийн гишүүдээс хоёр нь гадаадад томилолттой яваа. Нэг гишүүн нь орон нутагт ажиллаж байна. Нэг гишүүн эмнэлэгт эмчилгээтэй байна. Тэгэхээр АН-ын бүлгийн гишүүдийн 11 нь энд зогсож байна гэсэн үг.

Өнгөрсөн долоо хоногт АН-ын маргаантай асуудал шийдэгдсэн.

Нам бол гишүүд, төлөөллийн байгууллагаас тогтдог. АН-ын 200 мянган гишүүнээс сонгогдсон Онц их хурлыг зохион байгуулсан Үндэсний бодлогын хороог Улсын Дээд шүүхээс хууль ёсных гэж тогтоосон. Иймд АН-ын дотоод маргаан гэдэг зүйл байхгүй. Нөгөө талын зүгээс ярьж байгаа нөхдөөс Улсын Дээд шүүхийн шийдвэрт тулгуурлаж, асуулт асуугаарай. Энэ долоо хоногт АН-ын Хэрэг эрхлэх газраас олон нийтэд хандаж мэдээлэл хийх болно" гэв. 

Түүнчлэн "Нэгэнт намын үйл ажиллагаа шийдэгдсэн. Тиймээс бүлгийн үйл ажиллагааг шийдэх хэрэгтэй байна. Өнгөрсөн оны аравдугаар сараас УИХ дахь АН-ын бүлгийн дарга Д.Ганбатыг огцруулахаар УИХ-ын даргад бичиг өргөн барьсан. Маш удаан хүлээцтэй хандлаа. Энэ долоо хоногоос эхэлж АН-ын бүлгийн үйл ажиллагааг хэвийн боломжоор хангахыг хүсэж, шаардлага хүргүүлнэ. УИХ-ын даргад хуулиар олгогдсон эрх нь бий, үүрэг нь ч юм.

Одоогоор Д.Ганбат даргын зарласан бүлгийн хуралд бид оролцохгүй байгаа.

Тэр хүн ганцаараа сууж хуралдаж байгаа байх. Цаашдаа өөрсдөө хурлаа хийгээд, шийдвэрээ гаргаад ажиллах болно" гэх мэдээллийг өглөө.