Д.Монголхүү: Х.Баттулгыг үзэн ядсан зүйл байхгүй

МоАХ-ны зөвлөгөөн хоёрдугаар сарын 18-нд болох гэж байна. Энэ талаар МоАХ-ны гишүүн гэгдэх Д.Монголхүүгээс тодрууллаа.

-МоАХ-ны хурал хоёрдугаар сарын 18-нд болох гэж байна. Хурлын бэлтгэл ажил хэрхэн хангагдаж байна вэ?

-Зөвлөгөөний бэлтгэл ажил ерөнхийдөө хангагдсан.

-Энэ хурлаар Х.Баттулгыг удирдлагаас буулгана гэх мэдээлэл байна. Энэ үнэн үү?

-Сүүлийн 10 гаруй жил МоАХ хуралдаагүй. Х.Баттулгыг үзэн ядаад, зайгаа тавьж өгөөч гэсэн юм байхгүй. Монгол Улс бол ТББ-ын хуультай. Хуулийн дагуу уг зөвлөгөөнийг зохион байгуулж байгаа. Зөвлөгөөний гол агуулга нь МоАХ-ын удирдлага солих тухай биш. Хүний эрхийн төлөө дуугардаг хоёрхон байгууллага бий. Нэг нь АН, нөгөө нь МоАХ юм. Энэ хоёр байгууллага өнөөдөр үүргээ гүйцэтгэхгүй болчихоор иргэдийн асуудал хүндрээд байна. Иймд МоАХ сэрээд үүргээ гүйцэтгэх хариуцлагатай үе ирээд байна.

-Өөрийг тань энэ холбооны гишүүн гэхээр эргэлзэх хүн олон бий. Хэзээ МоАХ-ны гишүүн болов?

-Би 1999 онд энэ холбоонд элсэж байсан. Ээж маань намайг 16 настай байхад дагуулж очин, энэ холбооны гишүүн болгосон. Миний гарт батлах нь байна.

-МоАХ-ны газрыг Хөгжлийн банкны барьцаанд тавьж, зээл авсан гэх мэдээлэл цацагдаад байгаа. Уг асуудлыг хэрхэн шийдэх вэ?

-МоАХ-ны анхдагч нараас бүрдсэн ажлын хэсэг байгуулагдаад, асуудлыг судалж эхэлсэн. Урьдчилсан байдлаар бол МоАХ-ны нэр дээр ХУД-т нэг газар байдаг юм билээ.

Тэр газар дээр МоАХ-ны ахмадуудад зориулсан орон сууц барина гэж байсан ч өгөөгүй юм билээ. 11-р хороололд байгаа МоАХ-ны байрны тухай нарийн зүйлийг мэдэхгүй байна.