С.Эрдэнэ улс төр хийв үү, Б.Пүрэвдорж даргаасаа зөрөв үү?!

Улс төрд нөлөө бүхий хүмүүс өөрсдийн хамаарал бүхий компаниараа дамжуулж "Хөгжлийн банк"-наас их хэмжээний зээл авсан ч эргэн төлөөгүй, тэрхүү зээлээ зориулалтын бусаар ашигласан нь ил болоод байгаа билээ.

Эл асуудалд УИХ-ын дарга Г.Занданшатарын захирамжаар "Хөгжлийн банк"-нд хяналт, шалгалт хийх Ажлын хэсгийг байгуулсан. Ажлын хэсгийн ахлагчаар УИХ-ын гишүүн Б.Баттөмөр ажиллаж байна. Харин бүрэлдэхүүнд УИХ-ын гишүүн Б.Бат-Эрдэнэ, Ц.Даваасүрэн, С.Чинзориг,  Б.Пүрэвдорж нар багтсан.

Өөрөөр хэлбэл, Ажлын хэсэгт эрх баригч намын дөрөв, сөрөг хүчний нэг гишүүн багтжээ. 

Тэгвэл парламентад сөрөг хүчний үүргийг гүйцэтгэж байгаа АН-аас өнгөрсөн долоо хоногт /2022.02.15/ мэдээлэл хийхдээ УИХ-аас байгуулсан "Хөгжлийн банк"-нд хяналт, шалгалт хийх Ажлын хэсэгт АН-аас нэг ч хүн орж ажиллахгүй гэдгээ мэдэгдсэн.

Өөрөөр хэлбэл, АН-аас нэг ч гишүүн Ажлын хэсэгт орж ажиллахгүй бөгөөд өөрсдөө "Хөгжлийн банк"-нд хяналт, шалгалт хийж үр дүнгээ УИХ-аас байгуулагдсан Ажлын хэсгийн дүгнэлттэй тулгаж, олон нийтэд мэдээлнэ гэж тус намын дарга, УИХ-ын гишүүн асан С.Эрдэнэ нар мэдэгдсэн байдаг. 

Гэвч УИХ-аас байгуулсан "Хөгжлийн банк"-нд хяналт, шалгалт хийх Ажлын хэсэгт АН-аас Б.Пүрэвдорж гишүүн багтсан хэвээр байна. Уг нь, намынх нь дарга С.Эрдэнийн мэдэгдснээр бол УИХ-ын гишүүн Б.Пүрэвдорж өнгөрсөн долоо хоногт л Ажлын хэсгээс гарсан байх ёстой байлаа.

Эсвэл "Хөгжлийн банк"-ны асуудалд С.Эрдэнэ улстөржив үү. Тэр иргэд, сонгогчдоосоо оноо авахын тулд сүржин мэдэгдэл хийв үү гэж хардаж болохоор байгаа юм. Үгүй бол УИХ-ын гишүүн Б.Пүрэвдорж намын бодлого, намын даргынхаа үгнээс сөрж, Ажлын хэсгээс гарахгүй гөжив үү. Ямартай ч С.Эрдэнэ нь мэдэгдэл хийсэн, Б.Пүрэвдорж нь лав Ажлын хэсгээс гараагүй л байна.